Eksodas 11–12; 14–15

Pasova

Lod i protektem

Fero i no wantem letem Ol Man Isrel oli go fri, mekem se Lod i talem long Moses se bae Hem i sendem wan las bigbigfala panis. Bae fasbon pikinini blong evri famli long graon blong Ijip bae i ded, iven fasbon blong evri animol blong olgeta.

Eksodas 11:1, 4–10

Lod i promesem se, sapos Ol Man Isrel oli folem ol instraksen blong Hem, bae bigbigfala panis ia bae i pas ova long olgeta mo bae i no spolem olgeta.

Eksodas 12:3, 13, 23

Lod i talem long wanwan famli blong Laen blong Isrel blong mekem sakrifaes blong wan smol sipsip we i stret evriwan, mo pentem ol saed doa blong haos wetem blad blong smol sipsip ia.

Eksodas 12:4–7

Lod i talem long Ol Man Isrel blong kuk mo kakae smol sipsip ia hariap. Taem oli stap kakae, bae oli dresap mo bae oli rere blong lego hom blong olgeta. Lod i talem se sapos Ol Man Isrel oli mekem olgeta samting ia, bae fasbon blong olgeta i sef long bigbigfala panis ia.

Eksodas 12:8–11

Olsem we Lod i givim woning, bigbigfala panis ia i bin kam. Evri fasbon long Ijip i bin ded, mo bigfala boe blong Fero tu i ded. Be bigbigfala panis ia i pas ova long evri hom we i bin gat blad blong sipsip long saedsaed doa blong haos. Fasbon blong Ol Man Isrel, Lod i bin sevem olgeta from se Ol Man Isrel oli bin obei long Hem.

Eksodas 12:12–13, 29–30

Taem we Fero i luk se boe blong hem i ded from bigbigfala panis ia, hem i talem long Moses mo Eron blong tekem evri Man Isrel mo aot long Ijip.

Eksodas 12:31–33

Ol Man Isrel oli aot, be Fero i kros tumas. Hem i pulum ami blong hem oli kam wanples wetem ol kat blong faet mo oli ronem Ol Man Isrel.

Eksodas 12:37–41; 14:5–8

Ol Man Isrel oli kamp long Red Si. I no longtaem afta, Fero mo ami blong hem oli kasem Ol Man Isrel. Taem Ol Man Isrel oli luk Ol Man Ijip oli kam, oli bin fraet. Be Moses i talem long Ol Man Isrel se bae Lod i protektem olgeta.

Eksodas 14:9–14

Taem we Ol Man Ijip oli kam kolosap moa long olgeta, Lod i talem long Moses blong leftemap stik blong hem. Moses i mekem, mo Lod i seraotem solwota. Ol Man Isrel oli bin krosem solwota, be long drae graon. Oli bin ronwe long Fero mo ami blong hem.

Eksodas 14:15–16, 21–22

Ami blong Ijip i ronem Ol Man Isrel. Taem we evri Man Isrel i sef long narasaed blong solwota, Lod i letem wota i kamdaon. Ami blong Ijip i draon long solwota.

Eksodas 14:23–30

Ol Man Isrel oli fri nao. Oli singsing ol singsing, oli danis mo talem tangkyu long Lod. Oli bin tingbaot Pasova oltaem; oli tekem se hemia i taem we Lod i sevem laef blong olgeta mo i bin lidim olgeta aot long Ijip.

Eksodas 14:31; 15:1–22