Jenesis 42–46

Josef mo Hadtaem blong Kasem Kaekae

Janis blong wan brata blong mekem famli blong hem i kam wan bakegen

Famli blong Jekob i bin hanggri from se i gat wan hadtaem blong kasem kaekae. Mekem se Jekob i sendem ol boe blong hem oli go long Ijip blong pem kaekae. Hem i holemtaet lasbon boe blong hem, Benjamin, i stap long hom. Hem i bin fraet blong lusum Benjamin, semmak we hem i bin lusum boe blong hem, Josef, plante yia bifo. Hem i no bin save se ol bigfala boe blong hem oli bin salem Josef olsem wan slef.

Jenesis 42:1–4

Long tetaem ia, Josef i kam wan hae lida long Ijip. Hem i responsibol blong salem kaekae long taem blong hadtaem ia. Ol brata oli mit wetem Josef, mo oli askem kaekae long hem. Oli no bin luksave hem.

Jenesis 42:5–8

Josef i luksave olgeta, be hem i mekem olsem se hem i no save olgeta. Josef i askem famli blong olgeta blong luk se papa blong hem mo brata blong hem, Benjamin, tufala i laef yet o no.

Jenesis 42:10–14

Afta, Josef i givim kaekae long ol brata blong hem. Hem i talem olgeta blong oli nomo kambak blong karem kaekae; be sapos oli wantem moa kaekae, bambae oli mas karem lasbon brata blong olgeta, Benjamin, i kam wetem olgeta.

Jenesis 42:15–20

Taem we famli i nomo gat kaekae bakegen, Jekob i bin save se hem i mas sendem Benjamin i go wetem ol nara boe blong hem, oli gobak long Ijip. Jekob i fraet yet, i no wantem letem Benjamin i go. Be Juda, wan long ol brata, i promes se bae hem i lukaotgud long Benjamin blong hem i sef i stap.

Jenesis 43:1–15

Taem we ol brata ia oli gobak long Ijip, Josef i mekem olsem se Benjamin i stilim wan silva kap. Hem i bin wantem blong luk sapos ol bigfala brata blong hem oli jenisim fasin blong olgeta. Juda i plis long Josef se bae i no panisim Benjamin, be bae i panisim hem long ples blong Benjamin.

Jenesis 44

Josef i bin hapi blong luk se ol bigfala brata blong hem oli jenisim fasin blong olgeta. Oli lavem Benjamin inaf blong save protektem hem. Mekem se, long en, Josef i bin talem olgeta se huia hem.

Jenesis 42:21–24; 45:1–4

Josef i fogivim ol brata blong hem from oli bin salem hem blong hem i kam wan slef. Josef i talem se hemia i wei blong Lod blong helpem famli blong olgeta blong save laef tru long hadtaem blong kasem kaekae.

Jenesis 45:5–8

Ol brata blong Josef oli gobak long papa blong olgeta, Jekob, mo i talem long hem evri samting we i bin hapen. Jekob i muvum ful famli blong hem i go long Ijip.

Jenesis 45:24–28; 46:1–26

Fero i welkamem famli blong Jekob. Hem i givim graon mo animol blong mekem se oli save gat plante kaekae. Famli blong Jekob oli bin stap laef long pis blong wan longfala taem.

Jenesis 45:16–23