“Ol Bigbigfala Panis blong Ijip,” Ol Stori long OlTesteman (2022)
“Ol Bigbigfala Panis blong Ijip,” Ol Stori long OlTesteman
Eksodas 4–5; 7–12
Ol Bigbigfala Panis blong Ijip
Ol joes blong Fero agensem Lod
Moses i trastem Lod mo i gobak long Ijip. Moses wetem brata blong hem Eron, tufala i go luk Fero mo askem long hem blong lego Ol Man Isrel oli go fri mo aot long Ijip. Fero i kros mo i no wantem blong lego olgeta i go. Hem i fosem Ol Man Isrel blong wok moa had.
From se Fero i no lisim long Lod, trabol i kasem ol man Ijip we ol nogud panis. Faswan, evri wota long Ijip i jenis i go long blad. Moses i askem Fero bakegen blong i lego Ol Man Isrel oli go, be Fero i talem no.
Nekis samting, Lod i sendem ol frog i go long Ijip. Oli stap evri ples. Fero i talem se bae hem i lego Ol Man Isrel i go sapos ol frog oli go. Lod i mekem ol frog i go longwe, be Fero i no lego Ol Man Isrel go. Afta, Lod i sendem ol laos mo ol flae.
Nekis samting, evri animol blong fam blong ol man Ijip oli ded, be i nogat wan animol blong Ol Man Isrel i ded. Afta ol man Ijip oli gat ol soa long bodi blong olgeta we i soa we.
Wan bigfala win mo ren blong ol ston blong aes wetem faea tu i kam long Ijip. Hemia i prapa spolem ol samting.
Fero i stil no wantem letem Ol Man Isrel i go. Afta Lod i sendem ol lokis, mo oli kakae evri kaekae blong ol pipol.
Afta i bin gat tri dei blong tudak. Long taem blong fulap long ol panis ia, Fero i promes blong lego Ol Man Isrel i go sapos ol panis ia oli stop, be hem i giaman evri taem.
Afta long naen defren kaen panis, Fero i stil no wantem lego Ol Man Isrel i go. Lod i talem long Moses se bae wan nara panis i kam. Lod i gaedem mo protektem Ol Man Isrel taem oli stap wet from fridom blong olgeta.