“Jekob mo Esao,” Ol Stori long OlTesteman (2022)
“Jekob mo Esao,” Ol Stori long OlTesteman
Jenesis 25–27
Jekob mo Esao
Tu brata wetem wan raet nomo blong fasbon
Aesak mo Rebeka i gat twin boe, Jekob mo Esao. Esao i save gud olsem wanem blong kilim ol animol. Jekob i laef long wan simpol laef mo i folem Lod.
Esao i fasbon. Olsem oltaem, fasbon nao i stap kasem blesing blong raet blong fasbon long papa blong hem. Raet blong fasbon i minim se bae hem i lidim famli mo gat moa graon mo animol blong help blong kea long famli. Be Esao i kea moa long hemwan bitim famli blong hem, mo hem i no obei long papa mo mama blong hem mo long Lod.
Wan dei, Esao i go lukaotem animol blong kilim mo i kambak. Hem i hanggri tumas mo i plis long Jekob blong fidim hem. Lod i wantem Jekob blong i karem blesing blong raet blong fasbon from se Esao i no naf blong karem. Jekob i askem Esao blong givim raet blong fasbon long hem mo hem bae i givim sam kaekae long Esao. Esao i agri mo i givim raet blong fasbon long Jekob.
Jenesis 25:23, 29–34; Hibrus 11:20
Rebeka mo Aesak i wantem wanem we i moa gud blong ol pikinini blong tufala. Oli harem nogud from Esao i gohed blong mekem ol samting we hem i wantem be i no wanem we Lod i wantem.
Aesak i kam olfala mo i nomo save lukluk. Bifo hem i ded, hem i askem Esao blong lukaot wan animol blong kilim mo kukum blong hem blong i kakae mo enjoem.
Rebeka i save se i taem blong Aesak blong givim blesing blong raet blong fasbon.
Rebeka i askem Jekob blong karem tu animol mekem se bae hem i save kukum kaekae bifo Esao i kambak. Afta Jekob bae i kasem blesing ia.
Jekob i dresap olsem Esao mo i karem kaekae i kam long papa blong hem. Aesak i givim blesing blong raet blong fasbon. Taem Esao i kambak, hem i kros tumas long Jekob. Be raet blong fasbon i go long Jekob from se hem i stap obei ol komanmen blong Lod mo Esao i no mekem.