“Elaeja mo Ol Pris blong Bal,” Ol Stori long OlTesteman (2022)
“Elaeja mo Ol Pris blong Bal,” Ol Stori long OlTesteman
1 King 18
Elaeja mo Ol Pris blong Bal
Profet blong Lod agensem ol giaman pris
Kingdom blong Isrel i gohed blong safa from oli no gat wota. King Ahab i talem long ol pipol blong folem wan giaman god we nem blong hem Bal.
Lod i sendem profet Elaeja blong mitim Ahab. Elaeja i invaetem evri pipol blong kam antap long top blong wan maonten. Hem i invaetem king mo ol pris blong hem i go long wan jalenj blong luk sapos Lod o Bal i tru God.
Elaeja i eksplenem jalenj ia. Hem mo ol pris bae oli sakrifaesem wan man buluk long olta, be bae oli no laetem faea olgetawan. Be, bae ol pris oli prea long Bal blong statem wan faea. Afta Elaeja bae i prea long Lod blong i statem wan faea. Elaeja i save se God ia nomo we i tru bae i statem faea.
Ol pris blong Bal oli prea i go long god blong olgeta stat long moning kasem aftenun, be i nogat samting i hapen. Elaeja i mekem fani wetem olgeta mo i talem se, ating god blong olgeta, Bal, i stap slip.
Ol pris oli stat blong kros, oli jiam long olta mo singsingaot kasem tudak. Oli hop se god blong olgeta bae i ansa, be yet i no gat faea.
Afta hem i taem blong Elaeja. Hem i bildim wan olta i go long Lod, i digim graon raon long olta mo i rere long sakrifaes.
Elaeja i askem ol pipol blong fulumap fo barel blong wota mo kapsaetem olgeta tri taem, i go long ol wud blong olta blong hem. Wud i mo olta i dring gud wota. Wota i fulumap hol we oli digim raon long olta.
Elaeja i prea long Lod blong soem paoa blong tru God. Faea blong Lod i kam daon mo i bonem sakrifaes ia, ol wud, ol ston mo wota. Ol pipol oli save se God blong Elaeja Hem i tru God. Elaeja i prea se bae taem blong drae taem bae i stop, mo Lod i sendem ren.