Jenesis 39–41

Josef long Ijip

Wan slef i kam wan lida

Oli salem Josef olsem wan slef long wan man we nem blong hem i Potifa. Potifa i bin wok blong Fero, we i man we i rul long Ijip. Potifa i save luk se Lod i bin stap helpem Josef. Hem i bin trastem Josef, mo i putum hem blong lukaot long haos blong hem, mo evri samting we hem i gat.

Jenesis 39:1–6

Waef blong Potifa i laekem Josef. Hem i bin wantem blong Josef mo hem, bae i brekem ol komanmen blong Lod. Josef i talem no long hem.

Jenesis 39:7–10

Waef blong Potifa i no wantem lisin, mekem se Josef i ronwe. Waef blong Potifa i kros long Josef.

Jenesis 39:11–12

Hem i soem wan pis klos blong Josef long Potifa. Hem i giaman long Potifa long saed blong Josef. Potifa i putum Josef i go long kalabus.

Jenesis 39:13–20

Josef, oli bin seperetem hem finis long famli blong hem. Hem i kam wan slef, mo naoia, hem i wan prisena. Be Lod i stil helpem Josef. Josef i no givap. Lod i blesem gadman blong kalabus blong i luk gudsaed blong Josef. Gadman ia i stat blong trastem Josef, mekem se i putum se Josef bae i lukaot long ol nara prisena.

Jenesis 39:21

Josef i mitim tufala prisena, mo wan i stap brekem bred, mo wan i jif wokman, we tufala i bin wok blong Fero. Tufala i bin gat ol defren kaen drim. Tru long paoa blong Lod, Josef i bin eksplenem mining blong drim blong tufala. Drim blong jif wokman, i minim se bae hem i kam fri. Tri dei afta, oli mekem wokman ia i kam fri mo i go wok blong Fero bakegen.

Jenesis 39:22–23; 40:1–21

Wan dei, Fero i no glad from ol drim blong hem. I no gat wan i save talem mining blong ol drim ia.

Jenesis 41:1–8

Afta, jif wokman i tingbaot se Josef i save eksplenem ol drim.

Jenesis 41:9–13

Oli tekemaot Josef long kalabus blong hem i save eksplenem ol drim blong Fero. Josef i talem se ol drim ia oli minim se Ijip bae i gat seven yia wetem plante gudfala kaekae, be afta, bae i gat seven yia blong hadtaem blong kasem kaekae, mo bae i gat smol kaekae nomo. Josef i bin talem long Fero se Ijip i mas sevem plante moa kaekae long taem blong ol gudfala yia ia.

Jenesis 41:14–36

Fero bin save se wanem we Josef i bin talem abaot ol drim blong hem, oli tru. Hem i mekem Josef i kam fri long kalabus, mo i mekem Josef i hae lida long Ijip. Blong seven yia, Josef i bin helpem Ijip blong hivimap moa kaekae.

Jenesis 41:37–53

Hadtaem blong kasem kaekae i kam. Long tetaem ia, i no gat wan man i save mekem kaekae i gro. Ol pipol oli bin travel i go long Ijip blong pem kaekae ia we Josef i bin stap hivimap. From Josef, Ol Man Ijip oli bin hivimap inaf kaekae blong helpem olgeta mo ol nara man blong oli laef tru long hadtaem ia blong kasem kaekae.

Jenesis 41:54–57