Jona 1–4

Profet Jona

Stap lanem blong trastem sore blong Lod

Jona i wan profet. Lod i bin givim woning long ol pipol long Nineve se bae Hem i prapa spolem siti blong olgeta sapos oli no sakem sin.

Jona 1:1–2

Be ol pipol blong Nineve oli ol enemi blong Ol Man Isrel. Jona i no wantem prij long olgeta. Hem i jiam long wan sip mo i sel longwe longwe aot long Nineve.

Jona 1:3

Taem Jona i stap long sip, wan bigfala strong win mo ren i kam. Ol man long sip oli fraet from laef blong olgeta. Oli askem Jona blong prea long Lod blong i sevem olgeta.

Jona 1:4–6

Jona i save se Lod i bin sendem strong win mo ren from se hem i stap ronwe long wanem we Lod i bin askem hem blong mekem. Jona i wantem sevem ol pipol long sip ia. Hem i talem se sapos oli sakem hem i go long solwota, strong win mo ren ia bae i stop.

Jona 1:12

Ol man ia oli no bin wantem sakem Jona i go long solwota. Oli traem blong pul blong sip i go long graon, be win mo ren i strong tumas. Long en, oli sakem Jona i go long solwota.

Jona 1:13–15

Strong win mo ren i stop. Be afta, wan bigfala fis i solemdaon Jona.

Jona 1:15, 17

Jona i bin stap insaed long bel blong fis ia blong tri dei mo tri naet. Long taem ia, Jona i prea mo sakem sin. Hem i wantem mekem wanem we i stret mo lisin long Lod. Lod i harem ol prea blong Jona mo i mekem fis i spet aot long Jona i go long drae graon.

Jona 1:17; 2:1–10

Bakegen, Lod i talem long Jona blong prij long ol pipol blong Nineve. Jona i obei long taem ia. Hem i go long Nineve mo talem long ol pipol blong sakem sin o bae Lod i prapa spolem siti blong olgeta. King mo ol pipol blong hem oli sakem sin. Lod i fogivim olgeta mo i no prapa spolem Nineve.

Jona 3

Be Jona i no bin glad se Papa God i no prapa spolem ol pipol ia. Hem i ting se oli inaf blong God i fogivim olgeta.

Jona 4:1–2

Blong tijim wan lesen long Jona, Lod i mekem wan plant i gro blong blokem Jona long san. Afta plant ia i ded, mo Jona i harem nogud from plant ia.

Jona 4:5–9

Lod i stap tijim Jona wan lesen abaot ol pikinini blong Hem. Jona i lanem se hem i mas harem nogud taem ol pipol oli no sakem sin mo hem i mas hapi taem oli sakem sin.

Jona 4:10–11