“Adam mo Iv,” Ol Stori long OlTesteman (2022)
“Adam mo Iv,” Ol Stori long OlTesteman
Jenesis 2–3; Moses 3–5; Ebraham 5
Adam mo Iv
Stap kasem eksperiens taem yumi stap mekem ol joes
Adam mo Iv, oli ol fas pikinini blong Papa long Heven blong laef long wol ia. Oli bin laef long naesfala Garen blong Iden, we eni kaen plant mo tri i raonem olgeta. God, Papa blong yumi long Heven mo Lod Jisas Kraes i bin visitim tufala mo toktok long tufala.
Jenesis 2:8–9; 3:8; Moses 3:8–9; Ebraham 5:8, 14–19
God i letem tufala blong kakae frut blong evri tri, be wan ia nomo, bae tufala i no kakae. Sapos tufala i kakae frut blong tri blong save abaot wanem i gud mo nogud, bae tufala i mas aot long garen ia mo bae tufala i ded long en. Setan i bin giaman long Adam mo Iv. Setan i talem se sapos oli kakae frut ia, bae oli save wanem i gud mo nogud, be bae oli no ded.
Jenesis 2:16–17; 3:1–5; Moses 3:9; 4:6–11; Ebraham 5:9, 12–13
Iv i jusum blong kakae frut.
Iv i givim frut ia long Adam. Hem tu, i jusum blong kakae frut ia.
God mo Lod i bin visitim tufala, be Adam mo Iv oli fraet mo oli haed. God i askem sapos oli bin kakae frut blong tri blong save abaot wanem i gud mo nogud.
Adam mo Iv i talem long God se tufala i bin jusum blong kakae frut ia. From joes blong tufala, tufala i mas aot long Garen blong Iden. Oli seraotem olgeta long God, be Hem i gat wan plan blong olgeta. Naoia tufala i save wanem i gud mo nogud mo save gat ol pikinini.
Jenesis 3:16–24; Moses 4:15–31
Adam mo Iv oli promes blong obei evri komanmen blong God. Oli tijim tufala blong mekem ol animol sakrifaes. Taem oli stap obei, oli lanem moa abaot Boe blong God, Jisas Kraes. Tufala tugeta i bin filim bigfala glad from bae Hem i helpem famli blong olgeta blong gobak long God.