“Profet Josua,” Ol Stori long OlTesteman (2022)
“Profet Josua,” Ol Stori long OlTesteman
Dutronome 10; 31; 34; Josua 1; 3–6; 10–11; 21; 24
Profet Josua
Wan las tes bifo oli go insaed long promes graon
Lod i singaotem Josua blong i niu profet, afta we Lod i tekem profet Moses i go long heven. Taem we Ol Man Isrel oli bin kamp kolosap long Jodan Reva, Lod i talem se i taem blong oli muv i go long promes graon.
Dutronome 34:1–9; Josua 1:1–4; Alma 45:19
Promes graon i stap long Kenan, be i gat ol nogud pipol we oli bin stap long ples ia. Lod i talem long Josua blong hem i stap strong mo blong hem i gat paoa long tingting. Wetem help blong Lod, Ol Man Isrel bae oli winim graon ia, Kenan.
Josua i pulum tugeta wan ami. Lod i talem long ol olgeta blong oli tekem ol flat ston blong Ol Ten Komanmen mo ol nara skripja. Ol pris oli tekem ol samting ia we oli putum olgeta insaed long wan bokis, we oli singaotem ak blong kavenan. Afta, ami i rere blong krosem Jodan Reva. Reva i dip mo taed blong hem i strong.
Dutronome 10:5; 31:25–26; Josua 1:10–11; 3:1–11
Josua i bin promesem blong Ol Man Isrel se Lod bae i helpem olgeta blong oli krosem reva ia.
Josua i bin askem long 12 pris blong oli tekem ak blong kavenan i kam, mo blong oli wokbaot insaed long wota. Taem ol pris ia oli putum leg blong olgeta insaed long reva, wota i bin seperet.
Ol Man Isrel oli bin krosem reva, be long drae graon. Josua i bin askem Ol Man Isrel blong oli tekem 12 ston aot long bed blong reva ia we i drae. Hem i hivimap ol ston ia blong i mekem se Ol Man Isrel oli tingbaot merikel blong Lod long dei ia.
Josua i lidim ami blong Ol Man Isrel i go long graon blong Kenan. Oli kasem wan bigfala taon ia we oli singaotem Jeriko. Bigfala taon ia i wan strong taon, mo i gat ol wol we oli hae antap we oli raonem taon ia. Lod i talem long Josua olsem wanem blong winim Jeriko. Hem i talem se bae Ol Man Isrel oli maj raon long Jeriko evri dei blong sikis dei. Josua i bin obei long Lod.
Josua i talem long ol pris blong oli tekem ak blong kavenan i go long fored blong Ol Man Isrel. Evri dei, ami ia i maj raon long Jeriko, mo seven pris oli stap blo long bubu blong olgeta. Evri nara Man Isrel oli stap nomo, oli no toktok.
Long nambaseven dei, ami i maj raon long Jeriko seven taem. Taem we ol pris oli stap blo bubu blong olgeta, Josua i talem long Ol Man Isrel blong oli singsingaot. Wantaem nomo, ol wol blong Jeriko oli foldaon i go long graon, mo ami blong Josua oli tekem bigfala taon ia.
Lod i bin helpem Ol Man Isrel, olsem we Hem i bin promesem. Ami blong Josua i bin gohed blong winim graon blong Kenan, mo Ol Man Isrel oli stat blong laef long ples ia nao. Josua i bin mekem olgeta oli stap tingbaot ol merikel mo ol promes blong Lod. Hem i bin askem Ol Man Isrel blong oli jusum blong wok blong Lod.