“Profet Samuel,” Ol Stori long OlTesteman (2022)
“Profet Samuel,” Ol Stori long OlTesteman
1 Samuel 2–3
Profet Samuel
Wan boe we Lod i singaotem
Hem i bin wan longfala taem we Ol Man Isrel oli no gat wan profet blong Lod blong lidim olgeta. Be, ol jaj oli bin rul long Isrel blong plante yia. Long taem ia, Hana i karem yangfala boe blong hem Samuel, blong kam stap wetem Ilae we i pris mo jaj blong Isrel. Samuel i helpem Ilae insaed long tempol.
Tufala boe blong Ilae i stap wok tu insaed long tempol, be oli stilim ol ofring we i blong Lod. Sam pipol oli komplen long Ilae, be Ilae i no panisim olgeta.
Wan naet, Samuel i harem wan voes i singaotem hem. Hem i ting se Ilae i singaot mekem se Samuel i go luk hem. Be Ilae i no singaotem hem. Ilae i talem long Samuel blong gobak silip.
Samuel i harem voes ia i singaotem hem nambatu taem. Hem i go luk Ilae mo i askem se Ilae i wantem wanem. Be Ilae i no singaotem hem. Ilae i talem long Samuel blong go silip.
Samuel i harem voes ia i singaotem hem nambatri taem. Hem i go luk Ilae bakegen mo i askem se Ilae i wantem wanem. Long taem ia, Ilae i save se hem i Lod we i stap toktok long Samuel. Ilae i talem long Samuel blong gobak silip. Ilae i talem, sapos Lod i singaot bakegen, Samuel i mas lisin.
Samuel i harem voes ia i singaotem hem bakegen. Long taem ia, Samuel i askem Lod blong i toktok mo bae hem i lisin. Lod i talem long Samuel se hem i no stret blong Ilae blong i letem ol nogud boe blong hem blong wok insaed long tempol. Famli blong Ilae bae i nomo gat raet blong wok long we bakegen.
Long nekis dei, Ilae i askem Samuel wanem Lod i bin talem long hem. Samuel i talem long hem. Ilae i save se Lod i toktok tru long Samuel.
Nius ia i go raon long graon blong Isrel. Ol pipol oli save se Lod i jusum Samuel blong kam profet blong Hem.