“Abaot OlTesteman,” Ol Stori long OlTesteman (2022)
“Abaot OlTesteman,” Ol Stori long OlTesteman
Abaot OlTesteman
Ol promes blong Papa long Heven long ol pikinini blong Hem longtaem finis i pas
Fasfala pat blong Tabu Baebol, hem i OlTesteman. Olgeta skripja ia, oli bin raetem longtaem finis, iven bifo we Jisas Kraes i bon i kam long wol ia. Insaed long hem, i gat olgeta stori we oli helpem yumi blong gat fet long Hem. Buk ia i stap tijim se wanwan man, woman long wol ia i pat blong famli blong Papa long Heven, mo Hem i lavem ol pikinini blong Hem.
Dutronome 7:7–9; Aesea 45:10–12
Long OlTesteman, oli singaotem Jisas Kraes se Hem i Jehova, mo Lod. Hem i stap folem ol instraksen blong Papa long Heven. Stat long taem blong Adam mo Iv, Papa long Heven i bin sendem Lod Jisas Kraes blong Hem i toktok i go long ol profet blong Hem. Papa long Heven i sendem Tabu Spirit blong helpem yumi save se ol toktok blong profet oli tru.
Eksodas 6:2–3; 2 Kronikel 20:20; Amos 3:7; 2 Pita 1:21; Moses 2:1
Lod i bin promesem long profet Ebraham mo waef blong hem, Sarae, se bambae famli blong tufala bae i gro i kam bigwan, mo bae i blesem ful wol ia. Apuboe blong tufala, Jekob, i gat wan bigfala famli, mekem se oli bin kam wan nesen. Oli bin stap singaotem olgeta se laen blong Isrel, o Ol Man Isrel. Ol profet oli tijim olgeta blong lukluk i go fored, oli wet long taem ia we bambae Jisas Kraes i kam.
Jenesis 15:5–6; 17:1–8; Dutronome 18:15; Aesea 7:14
Plante stori long OlTesteman oli soem olsem wanem Lod i bin kipim ol promes we Hem i bin mekem long Ol Man Isrel.
Jenesis 9:13–17; Jeremaea 11:4–5; Hibrus 11:1–35
Taem we Ol Man Isrel oli bin stap lisin long ol profet, mo oli bin stap obei long ol komanmen, Lod i bin helpem olgeta. Taem we oli no bin obei, Hem i no bin save helpem olgeta.
Dutronome 11:26–28; Job 36:11–12
Yu pat blong famli blong Papa long Heven. Papa long Heven i wan man we i kaen, mo Hem i lavem yu. Hem i gat wan plan blong yu. From Lod Jisas Kraes, bambae yu save gobak stap wetem Papa long Heven bakegen. Semmak olsem we oli bin tijim long Laen blong Isrel, yu save jusum blong gat fet long Lod mo obei long ol komanmen blong Hem.