“Kriesen blong Wol Ia,” Ol Stori long OlTesteman (2022)
“Kriesen blong Wol Ia,” Ol Stori long OlTesteman
Jenesis 1–2; Moses 1–3; Ebraham 3–5
Kriesen blong Wol Ia
Wan naesfala hom blong ol pikinini blong Papa long Heven
God, Papa blong yumi long Heven i presentem plan blong sevem man long heven. !Yumi evriwan i singaot from glad! Bae yumi save kam long wol blong kasem wan bodi blong mit mo bun. Taem yumi stap long wol, bae yumi lanem blong folem Boe blong God we Hem i Lod Jisas Kraes. Lod i krietem wol folem ol instraksen blong God.
Jenesis 1:1; Job 38:4–7; Moses 1:32–33; 2:1; Ebraham 3:22–27
Long fas dei, Lod i seraotem laet long tudak. Hem i singaotem laet ia dei mo tudak ia naet.
Jenesis 1:3–5; Moses 2:3–5; Ebraham 4:1–5
Long nambatu dei, Hem i seraotem ol wota bitwin ol klaod long skae mo ol solwota long wol ia.
Jenesis 1:6–8; Moses 2:6–8; Ebraham 4:6–8
Long nambatri dei, Lod i mekem ol bigfala solwota mo drae graon. Hem i putum nem blong ol wota ia solwota mo drae graon graon. Hem i mekem graon i naes tumas wetem ol flaoa, ol frut, ol plant mo ol tri.
Jenesis 1:9–13; Moses 2:9–13; Ebraham 4:9–13
Long nambafo dei, Hem i krietem san blong i saen long dei taem. Afta Hem i krietem mun wetem ol sta blong saen long naet.
Jenesis 1:14–19; Moses 2:14–19; Ebraham 4:14–19
Long nambafaef dei, Lod i mekem ol fis long solwota mo ol pijin long skae. Hem i blesem ol animol ia blong oli kam plante mo Hem i blesem ol fis blong oli fulumap ol wota.
Jenesis 1:20–23; Moses 2:20–23; Ebraham 4:20–23
Long nambasikis dei, Hem i krietem ol animol long graon, sam we oli wokbaot mo sam we oli krip.
Jenesis 1:24–25; Moses 2:24–25; Ebraham 4:24–25
Papa long Heven mo Lod oli kam daon long wol long namba sikis dei. Oli krietem man mo woman folem fasin mo pikja blong God. Papa long Heven i talem long tufala blong lukaot long tufalawan mo gat ol pikinini. Oli trastem man mo woman tu blong lukaot long graon mo ol animol.
Jenesis 1:26–27; Moses 2:26–27; Ebraham 4:26–31; 5:7–8
Papa long Heven i glad wetem evri samting we Tufala i bin krietem. Long nambaseven dei, Tufala i spel long evri wok blong Tufala. Wol ia i naes tumas mo i fulap wetem laef.