Kam Folem Mi, i kam long Scott Sumner

24–30 Oktoba.

Esikel 1–3; 33–34; 36–37; 47

“Bambae Mi Mekem Laef blong Yufala I Kam Niuwan. Bambae Mi Givim Niufala Tingting long Yufala”

Bae yu no save gat inaf taem blong tijim evri prinsipol insaed long Esikel. Lukaotem spirit blong i lidim yu long wanem blong yu lukluk nomo long hem mo leftemap tingting blong ol pikinini blong gohed blong stap lanem samting long hom.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Letem ol pikinini oli gat wanwan taem blong stap droem ol pikja blong wan samting we oli jes lanem aot long ol skripja i no long taem i pas. Ol narafala pikinini oli save gesem se, wanem ia pikinini ia i stap droem.

Tijim Doktrin: Ol Smol Pikinini

Esikel 3:17

Ol profet oli olsem ol wajman we oli stap wonem yumi long denja.

Esikel i olsem wan wajman we i stap wonem Ol Laen blong Isrel long ol denja we oli no save luk. Helpem ol pikinini blong luk olsem wanem ol profet blong yumi tedei oli olsem ol wajman.

Samfala Aktiviti we Yu Save Mekem

• Ridim long ol pikinini wanem we Lod i talem long Esikel insaed long Esikel 3:17. Invaetem olgeta blong mekem ol aksen we i go wetem ol toktok, olsem blong poenem ae blong olgeta, sora mo maot blong olgeta, taem bae yu ridim ol toktok ia “wajman,” “lisin,” mo “maot.”

• Lidim ol pikinini blong wokbaot raon long rum. Wonem olgeta abaot ol denja we oli save stap raon long wokbaot blong olgeta ia, olsem ol reva blong jiam ovarem, ol branj blong tri we oli blokem rod we oli mas go andanit, o blong stap longwe long ol animol we oli denja. Letem ol pikinini oli kam, mo wanwan i gat janis blong stap olsem wan lida. Tokbaot olsem wanem ol profet blong yumi oli stap wonem yumi abaot ol denja we yumi no save luk.

• Soem wan pikja blong profet we i stap laef, taem bae yufala i singsing tugeta wan singsing abaot ol profet olsem las ves blong “Follow the Prophet” (Children’s Songbook, 110–11). Eksplenem long ol pikinini olsem wanem, long yu, wan profet i olsem wan wajman.

Esikel 37:15–19

Ol skripja oli stap tijim mi abaot Jisas Kraes.

Esikel i komperem Haos blong Isrel long tu (2) stik we tufala i kam wan. Tufala stik ia i olsem simbol we i ripresentem Baebol mo Buk blong Momon, we tufala i kam wan blong testifae abaot Kraes.

Samfala Aktiviti we Yu Save Mekem

• Givim wan kopi blong Buk blong Momon long sam pikinini; givim wan kopi blong Baebol long ol narafala pikinini. Long sot toktok, talem wanem i stap long Esikel 37:15–19 mo eksplenem se Lod i bin talem long Esikel blong raet long tufala stik; wan i ripresentem Baebol, mo narawan i ripresentem Buk blong Momon. Ridim ves 17, mo invaetem wanwan pikinini we i gat wan buk blong ol skripja we i defren long blong olgeta, mo “joenem olgeta” tugeta mekem se bae oli “kam wan [long han blong olgeta].” Tokbaot olsem wanem Baebol mo Buk blong Momon i helpem yumi blong mekem fet blong yumi long Papa long Heven mo Jisas Kraes , i kam strong moa.

• Yusum ol pikja long Gospel Art Buk o aot long ol buk blong Kam Folem Mi blong ol yia we oli pas finis, mo helpem ol pikinini blong serem ol stori abaot Jisas, aot long Baebol mo Buk blong Momon. Askem olgeta blong serem from wanem oli tangkyu blong gat tufala buk blong skripja ia.

Esikel i bin luk, long visen, wan reva we i ron, we i aot long tempol mo i hilim Ded Si.

Esikel 47:1–12

Ol bigfala blesing oli kam tru long tempol.

Visen blong Esikel abaot wan reva blong hilim man we i ronaot long tempol, i save helpem ol pikinini blong lanem se ol tempol oli karem ol blesing oli kam insaed long laef blong yumi.

Samfala Aktiviti we Yu Save Mekem

• Soem wan kap blong wota long ol pikinini. ?Olsem wanem wota i blesem yumi? Talem long ol pikinini abaot visen blong Esikel abaot wota ia we i stap ronaot long tempol (luk long Esikel 47:1–12). Soem pikja long aotlaen blong wik ia insaed long Kam Folem Mi—Blong Wanwan Man, Woman mo Famli (luk tu long vidio “And the River Will Grow,” ChurchofJesusChrist.org). Talem long ol pikinini abaot ol blesing we yu kasem, olsem reva we i ronaot long tempol we Esikel i luk long visen.

• Invaetem ol pikinini blong dro wan pikja blong olgetawan i stap go long tempol. Singsing tugeta wan singsing we i tokbaot ol blesing blong tempol, olsem “Families Can Be Together Forever” (Children’s Songbook,188). ?Wanem nao singsing ia i tijim long yumi abaot tempol we i blesem yumi?

Tijim Doktrin: Ol Bigfala Pikinini

Esikel 2:3–4; 3:7; 36:26–27

Jisas Kraes i save helpem mi blong jenisim hat blong mi.

Esikel i yusum ol sentens olsem “niu hat” mo “niu spirit” blong tij abaot kaen jenis ia we Sevya i tekem i kam insaed long laef blong yumi.

Samfala Aktiviti we Yu Save Mekem

• Askem ol pikinini blong lukluk insaed long Esikel 2:3–4; 3:7 mo faenem ol toktok we i tokbaot Ol Laen blong Isrel. Afta, invaetem olgeta blong ridim Esikel 36:26–27 blong lanem olsem wanem Sevya i wantem blong helpem olgeta blong jenis. ?Wanem toktok we i save tokbaot “niu hat” mo “niu spirit” we Hem i givim long yumi? (luk long eksampol ia, Mosaea 3:19; 5:2).

• Askem ol pikinini blong tingting long ol samting “stronghed tumas” o “stronghat” pipol (Esikel 2:4; 3:7) oli save mekem. Eksampol. Olsem wanem bae oli tekem aksen folem kaonsel blong wan papa, mama o wan profet? ?Wanem bae oli mekem taem oli luk wan man we i stap long nid? ?Wanem nao bae yumi mekem taem Sevya i mekem hat blong yumi i kam sofsof?

Esikel 37:19–23

Baebol mo Buk blong Momon i help blong “joenem” yumi i go long Jisas Kraes.

“Stik blong Juda” (Baebol) blong Esikel, mo “stik blong Josef” (Buk blong Momon), tufala i wok tugeta blong joenem Isrel i go long Sevya (luk long Esikel 37:19).

Samfala Aktiviti we Yu Save Mekem

• Leftemap wan kopi blong Baebol mo Buk blong Momon, mo eksplenem from wanem oli filim se i gud blong gat tugeta buk ia. Ridim long olgeta Esikel 37:19, mo eksplenem se “stik blong Josef” ia, hem i Buk blong Momon, we ol jeneresen blong Josef long Ijip oli bin raetem; mo “stik blong Juda” hem i Baebol, we ol plante pat, Ol Jiu nao oli bin raetem. Afta, tugeta, ridim ves 21–23 mo 2 Nifae 3:12, mo mekem lis blong ol blesing we oli kam from yumi gat tugeta buk ia.

• Putum wan pikja blong Jisas long medel blong rum, mo askem ol pikinini blong muvum ol jea blong olgeta i go long ol defdefren ples, folem saedsaed long wol blong rum ia. Mo afta, askem olgeta blong yusum Topical Guide blong faenem ol skripja insaed long Baebol mo Buk blong Momon we i tij abaot Jisas Kraes (sapos oli nidim, soem long olgeta olsem blong mekem hemia). Afta we wanwan pikinini i serem wan skripja, invaetem evri pikinini blong muvum ol jea blong olgeta i go kolosap long pikja blong Jisas. Gohed blong mekem olsem kasem taem we evriwan oli “joen” bakegen long Hem.

Esikel 47:1–12

Ol blesing blong tempol oli save hilim hat mo ol famli blong yumi.

Wota we i stap ron, we i aot long tempol we Esikel i bin luk long visen, i karem laef i kam long evri samting we hem i tajem. Semmak, ol blesing we oli kam long tempol, ol save hilim yumi long saed blong spirit mo karem laef we i no save finis i kam.

Samfala Aktiviti we Yu Save Mekem

• Long bod, mekem wan lis blong ol ki toktok mo sentens we oli go wetem Esikel 47:1–12, olsem tempol, reva, draeples, Ded Si, plante fis, mo tri we i karem fulap frut. Invaetem wanwan pikinini blong jusum wan long ol samting ia blong droem. Afta, ridim ol ves tugeta, mo invaetem ol pikinini blong soem ol droing blong olgeta taem oli harem oli ridim nem blong wanem oli droem. ?Wanem blesing we i kam aot long reva, long visen ia? (luk long ves 8–9,12).). Helpem ol pikinini blong luksave olsem wanem ol blesing ia oli olsem ol blesing we Papa long Heven mo Sevya, oli givim long olgeta we oli kipim ol kavenan blong tempol.

• Soem vidio “And the River Will Grow” (ChurchofJesusChrist.org). O tugeta, ridim wanem Elda Dale G. Renlund i bin tijim visen blong Esikel insaed long “Famli Histri mo Tempol Wok: Siling mo Hiling” ( Liahona, Mei 2018, 46–50). Talem long ol pikinini olsem wanem famli histri wok mo tempol i karem hiling blong Sevya i kam long yu. Invaetem ol pikinini blong serem ol filing blong olgeta abaot tempol.

Stap Leftemap Tingting blong Lanem Samting long Hom

Invaetem ol pikinini blong serem wetem ol famli blong olgeta, wan samting we oli bin lanem tedei, mo wan samting we bae oli wantem blong lanem moa abaot.

Stap Kam Antap long Fasin blong Yumi blong Stap Tij

Sapotem fasin blong stap lanem samting long hom. “Wan long ol gol blong yu olsem wan tija, i blong leftemap tingting blong olgeta we yu tijim blong ol save gat ol eksperiens blong olgetawan insaed long ol skripja” (Teaching in the Savior’s Way, 36).