Jeremaea, i kam long Walter Rane

10–16 Oktoba.

Jeremaea 1–3; 7; 16–18; 20

“Taem Mi Mi No Wokem Yu Yet long Bel blong Mama blong Yu, Be Mi Mi Save Yu Finis”

“Gol blong evri tija … i blong tijim doktrin blong gospel we i klinwan, tru long Spirit, blong save helpem ol pikinini blong God blong oli bildimap fet blong olgeta long Sevya mo kam moa olsem Hem” (Teaching in the Savior’s Way, kova long fored).

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Raetem ol ki toktok long ol pis pepa, aot long stadi blong wik ia long Jeremaea; ol toktok olsem profet, wota we i laef, kam tugeta, mo klei o graon. Putum ol pepa insaed long wan kontena, mo invaetem ol pikinini blong jusum wan, mo serem eni tingting we oli gat abaot wanem we i stap long pis pepa. Helpem olgeta blong luk, olsem wanem toktok ia i go wetem wan samting we Jeremaea i bin tijim.

Tijim Doktrin: Ol Smol Pikinini

Jeremaea 1:5

Papa long Heven i bin save mi, bifo mi bon i kam long wol ia.

From se yumi bin laef wetem God bifo yumi bin kamdaon long wol ia, Hem i save yumi, iven sapos yumi no save tingbaot Hem. ?Olsem wanem nao bae yu helpem ol pikinini we yu stap tijim blong oli andastanem trutok ia?

Samfala Aktiviti we Yu Save Mekem

• Ridim long ol pikinini Jeremaea 1:5, mo eksplenem se God i bin save profet Jeremaea bifo hem i bon i kam long wol ia. Talem long wanwan pikinini se Papa long Heven i bin save hem tu, bifo hem i bon i kam long wol ia, mo we Hem i sendem wanwan long yumi i kam ia from wan stamba tingting.

• Soem long ol pikinini wan pikja blong wan bebi, mo askem ol pikinini sapos oli save wea nao bebi ia i bin stap laef long hem, bifo i bon i kam long wol ia. Singsing tugeta wan singsing abaot, laef bifo long wol ia wetem God, olsem “Mi pikinini blong God (STSP, pej 58)o “I Lived in Heaven” (Children’s Songbook, 4). Tokbaot ol filing long saed blong spirit we i kam abaot singsing ia. Serem testemoni blong yu se, yumi evriwan i bin wantaem, laef wetem Papa long Heven mo Hem i sendem yumi kamdaon long wol ia.

Jeremaea 1:7

Oli singaotem ol profet blong oli talem ol toktok blong Lod.

Koling blong Jeremaea i soem wanem nao Lod i askem ol profet blong mekem. ?Olsem wanem nao yu save helpem ol pikinini we yu tijim blong oli save gat wan strong tingting blong folem wan profet we i stap laef?

Samfala Aktiviti we Yu Save Mekem

• Soem wan pikja blong profet we i stap laef, mo invaetem olgeta blong serem wanem oli save abaot hem. ?Wanem nao ol profet oli stap mekem? Ridim long ol pikinini wanem Lod i bin talem long wan narafala profet insaed long Jeremaea 1:7. Invaetem ol pikinini blong oli wokbaot long sem ples we oli stanap long hem, taem bae yu ridim: “go long ol man we mi bambae mi sanem yu yu go long olgeta,” mo blong oli mekem se oli stap toktok taem bae yu ridim: “yu mas talemaot olgeta samting we mi bambae mi talem long yu.” Serem testemoni blong yu se ol profet oli mekem mo talem wanem we Lod i givim oda long olgeta blong mekem.

• Soem pikinini blong ol profet aot long ol skripja (luk long Gospel Art Buk, Ol Magasin blong Jos, mo Kam Folem Mi—Blong Wanwan Man, Woman mo Famli). Letem ol pikinini oli talem long yu wanem oli save abaot ol profet ia. Talem long wan sot toktok abaot wan samting we, wanwan long olgeta i bin mekem blong helpem wok blong God. Serem testemoni blong yu se God i singaotem ol profet blong talemaot ol toktok mo givim seves long ol pipol blong Hem.

Jeremaea 16:16

Mi save helpem ol pikinini blong Papa long Heven blong kambak long Hem.

Taem hem i kwotem Jeremaea 16:16, Presiden Russell M. Nelson i bin talem: “Ol misinari blong yumi oli bin lukaotem olgeta blong Isrel we oli bin seraot; oli bin lukaotem olgeta ‘long ol hol long ston” mo oli bin go hukum olgeta, semmak olsem long taem bifo.” (“Kam Tugeta blong Isrel we I Seraot,” ).

Samfala Aktiviti we Yu Save Mekem

• Taem yu stap ridim Jeremaea 16:16, invaetem ol pikinini blong mekem olsem se oli stap hukum fis o lukaotem ol animol blong sutum. Eksplenem se ol man we oli pulum fis, mo ol man blong lukaot mit long bus, insaed long ves ia, oli save ripresentem ol misinari. Invaetem ol pikinini blong mekem olsem se oli ol misinari. ?Wanem nao ol misinari oli stap mekem? ?Olsem wanem nao yumi save helpem olgeta?

• Krietem wan gem we i blong stap majem ol samting, long aktiviti pej blong wik ia. Taem wan pikinini i faenem ol pikja we oli save majem tugeta, tokbaot wanem nao pikja ia oli stap soem se yumi save helpem ol pikinini blong Papa long Heven, blong kambak long Hem.

Tijim Doktrin: Ol Bigfala Pikinini

Jeremaea 1:4–19

Oli singaotem ol profet, blong talem ol toktok blong Lod.

?Olsem wanem nao yu save helpem ol pikinini blong mekem fet mo hamas save i kam moa strong, blong oli save andastanem wok blong ol profet insaed long kingdom blong God?

Samfala Aktiviti we Yu Save Mekem

• Jusumaot sam ki toktok aot long ves Jeremaea 1 we tijim ol impoten trutok abaot ol profet, olsem ol ves 5, 7, 10, mo 19. Invaetem wanwan pikinini blong pikimap wan ves mo ridim, mo serem wan samtaem we hem i lanem abaot ol profet long ves ia. Invaetem sam pikinini blong serem testemoni blong olgeta abaot, stap folem profet.

• Soem wan pikja blong profet we i stap laef, mo singsing tugeta wan singsing abaot ol profet, olsem “We Listen to a Prophet’s Voice” (Hymns, no.22). Helpem ol pikinini blong mekem wan lis blong ol samting we profet we i stap laef i bin askem yumi blong mekem. Jusum wan mesej blong profet long konfrens we i jes pas, mo helpem ol pikinini blong faenem kaonsel long mesej blong hem. ?Olsem wanem nao yumi stap folem profet? Toktok raon long, olsem wanem nao kaonsel blong ol profet i stap helpem yumi blong folem Papa long Heven mo Jisas Kraes, long wan wei we i moa gud.

• Soem vidio ia “Why Do We Have Prophets?” (ChurchofJesusChrist.org), mo askem ol pikinini olsem wanem nao bae oli eksplenem long wan fren, se from wanem i wan blesing blong gat wan profet we i stap laef (luk long Ol Toktok blong Bilif 1:6, 9). Invaetem ol pikinini blong serem ol filing blong olgeta abaot profet we i stap laef.

Jeremaea 16:14–15

Mi save stap pat blong kam tugeta blong Isrel.

Mesej blong kam tugeta blong Isrel i stap long Jeremaea 16:14–15 i givim wan gudfala janis blong tokbaot long ol pikinini, abaot misinari mo famli histri wok. Hemia i wan wei we yumi save “stanap olsem ol witnes blong God” (Mosaea 18:9).

Samfala Aktiviti we Yu Save Mekem

• Tugeta, ridim Jeremaea 16:14, mo askem ol pikinini blong serem ol ditel abaot ol samting we oli tingbaot abaot hao “(Lod) … i tekemaot ol bubu blong yumi long Ijip bifo” (luk long Eksodas 14). Invaetem olgeta blong ridim Jeremaea 16:15 blong faenemaot ol samting we bae i hapen, we Jeremaea i bin talem, we bae oli no save fogetem bitim hemia. Eksplenem se Isrel i bin seraot olbaot long wol, be Lod i promesem se, bae oli kam tugeta bakegen long Hem mo Jos blong Hem. Hemia oli singaotem kam tugeta blong Isrel. ?Olsem wanem nao hemia i semmak long ol laen blong Isrel we Lod i karemaot olgeta long slef?

• Serem toktok ia blong Presiden Russell M. Nelson: “Eni taem yu mekem eni samting we i helpem eniwan—long eni saed blong vel—evri taem yu tekem wan step fored blong stap mekem ol kavenan wetem God mo stap kasem baptaes mo tempol odinens we i nid long bihaf blong olgeta, yu stap help blong karem Isrel i kam tugeta” (Russell M. Nelson mo Wendy W. Nelson, “Hope of Israel” [wol yut divosen, 3 Jun 2018, i kam komplitim wanem i stap long New Era mo Ensign, 15 Ogis 2018 ChurchofJesusChrist.org ?Olsem wanem nao yumi help blong karem Isrel i kam tugeta?

• Singsing tugeta wan singsing abaot misinari wok, olsem “I Hope They Call Me on a Mission” o “Called to Serve” (Children’s Songbook, 169,174), o soem vidio blong “Your Day for a Mission” (ChurchofJesusChrist.org). Askem ol pikinini abaot wanem oli lanem aot long singsing o vidio ia, abaot, from wanem wan i save jusum blong givim seves long wan misin.

Stap Leftemap Tingting blong Lanem Samting long Hom

Invaetem ol pikinini blong karem wan kopi blong aktiviti pej blong wik ia mo pleiplei gem blong majem ol samting wetem ol famli blong olgeta. Leftemap tingting blong olgeta blong toktok wetem ol famli blong olgeta, abaot olsem wanem misinari wok i bin blesem olgeta.

Stap Kam Antap long Fasin blong Yumi blong Stap Tij

Helpem ol pikinini blong luksave huia Spirit. Oltaem, tabu miusik i stap invaetem paoa blong Tabu Spirit. Taem yu singsing wetem ol pikinini, tekem taem blong helpem olgeta blong luksave ol filing long saed blong spirit, we i stap konfemem trutok, long wanem we oli stap lanem.