Jisas long Haos blong Prea long Nasaret, i kam long Greg K. Olsen

3–9 Oktoba.

Aesea 58–66

“!Ol Man blong Mi! Bambae Mi Mi Kam long Taon Ya Jerusalem”

Ol aedia long aotlaen ia, i stap ia blong givim insperesen long yu. Yu no filim se, i wan mas blong folem olgeta olsem we i stap, be folem wanem we smol voes blong Spirit, bifo mo long taem blong lesen.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Plante long ol toktok blong Aesea oli testifae mo tij abaot Sevya. Soem wan pikja blong Jisas Kraes, mo invaetem ol pikinini blong serem wan samting we oli lanem abaot Hem long wik ia.

Tijim Doktrin: Ol Smol Pikinini

Aesea 58:13–14

Sabat i save kam wan dei blong glad long mi.

Sabat i wan dei blong yumi tingbaot Lod mo spel long evri aktiviti blong yumi blong evri wik. ?Olsem wanem nao yu save helpem ol pikinini we yu tijim blong oli mekem Sabat i wan dei blong glad?

Samfala Aktiviti we Yu Save Mekem

• Askem ol pikinini blong ripitim sentens ia plante taem: “Olgeta. Yufala i mas mekem Sabat dei i tabu, i blong mi” (Aesea 58:13). Eksplenem se “i tabu, ” i minim wan samting we i karem glad i kam. Askem ol pikinini blong serem sam samting we i karem glad i kam long olgeta. Testifae se Lod i givim long yumi Sabat dei from se Hem i wantem yumi blong gat glad. Talem long ol pikinini from wanem Sabat i wan dei blong glad long yu.

• Ridim Aesea 58:14long ol pikinini: “Bambae yufala i kasem glad ya we i stap kamtru long ol man we oli stap obei long mi.” Eksplenem long ol pikinini se Sabat i wan spesel dei—wan taem we yumi save tingbaot, ol samting we Papa long Heven mo Jisas i bin mekem blong helpem yumi stap glad. Helpem ol pikinini blong tingting long ol samting we oli save mekem blong tingbaot Papa long Heven mo Jisas. Invaetem olgeta blong droem ol aedia blong olgeta, mo serem ol pikja wetem wanwan long olgeta, mo ol famli blong olgeta.

“Mi mi Hae God, mi nomo bambae mi laet blong yufala, gogo i no save finis”(Aesea 60:19). Wan Presen we I Laet, i kam long Eva Timothy

Aesea 60:1–3

Mi save saenem laet blong Sevya long ol narafala man.

Aesea i profesae se, long ol las dei, ol pipol blong Lod bae oli kam wan laet blong olgeta we oli stap long tudak. Tingting long olsem wanem, yu save helpem ol pikinini blong “girap” mo “saen.”

Samfala Aktiviti we Yu Save Mekem

• Invaetem ol pikinini blong sarem ae blong olgeta taem yu stap ridim Aesea 60:1–3. Askem olgeta blong openem ae blong olgeta, taem oli harem toktok ia “laet” mo sarem ae, taem oli harem toktok ia “tudak.” Eksplenem se Jisas Kraes mo Gospel blong Hem oli olsem wan laet, we i helpem yumi blong luk rod blong yumi i gobak long Papa long Heven.

• Givim long wanwan pikinini, wan pikja blong wan laet (olsem wan pikja blong san, wan kandel o wan balb blong laet). Helpem olgeta blong tingting long ol wei we oli save serem laet blong Sevya wetem ol narafala man. Taem oli serem wanwan aedia, invaetem olgeta blong “girap” mo “saenem” laet blong olgeta, taem oli leftemap pikja blong olgeta. Talem long ol pikinini abaot ol wei we yu bin luk olgeta oli stap serem laet blong Sevya.

• Singsing tugeta wan singsing abaot fasin blong stap serem laet, olsem “Shine On” (Children’s Songbook,144). Helpem ol pikinini blong harem save ol toktok long singsing we i kam sapotem wanem we oli bin lanem aot long Aesea 60:1–3.

Aesea 61:1–3

Jisas Kraes i Sevya mo Ridima blong mi.

Aesea 61:1–3 i stap tokbaot misin blong Sevya we i stap tijim mo hilim ol pipol, long wan wei we i gat paoa. Lukaotem ol wei blong helpem ol pikinini blong luk olsem wanem, Jisas Kraes i save tijim mo hilim olgetawan.

Samfala Aktiviti we Yu Save Mekem

• Taem yu stap ridim Aesea 61:1 letem ol pikinini oli holem ol pikja blong Jisas we i stap tij, i stap hilim man mo i helpem ol narafala man (luk long Gospel Art Buk). Eksplenem se God i sendem Jisas Kraes blong mekem ol samting ia long bihaf blong yumi. Askem ol pikinini blong serem ol filing blong olgeta abaot Jisas Kraes. Testifae abaot lav we Sevya i gat long wanwan long ol pikinini.

• Aesea 61:3 i stap tokbaot se olgeta we oli stap lisin mo obei long Lod, oli olsem “ol tri [blong stret mo gud fasin].” Droem wan tri long bod, mo invaetem ol pikinini blong tingting long ol stret mo gud samting we oli save mekem. Blong wanwan aedia we oli givim, letem ol pikinini oli droem wan lif long tri ia.

Tijim Doktrin: Ol Bigfala Pikinini

Aesea 58:6–11

Fasin blong livim kakae i blesem mi mo ol narafala man we oli stap long nid.

Samfala pikinini we yu tijim, oli bigwan inaf blong livim kakae. Be olgeta we oli no bigwan inaf, oli save kam antap long save blong olgeta blong stap lanem abaot loa ia blong Sevya we i blong livim kakae, mo stap rere blong livim kakae taem oli rere from.

Samfala Aktiviti we Yu Save Mekem

• Raetem long bod: ?From wanem nao yumi livim kaekae? mo ?Olsem wanem yumi livim kaekae? Invaetem ol pikinini blong raetem sam ansa we oli tingting se i stret, long bod. Leftemap tingting blong olgeta blong luklukbak long “Livim Kaekae, Fasin blong” insaed long Gaed long Ol Skripja (olskripja.ChurchofJesusChrist.org) mo Aesea 58:6–11 blong faenem ol ansa we oli save yusum tu. ?Olsem wanem sapos Aesea 58:6–11 i helpem yumi taem yumi filim se, blong livim kaekae, i wan had samting blong mekem?

• Serem wetem ol pikinini wan eksperiens blong yuwan, abaot fasin blong livim kaekae, o wan stori we yu bin ridim aot long wan magasin blong Jos. Toktok bigwan abaot ol blesing we oli kam taem yumi livim kaekae wetem wan stamba tingting long saed blong spirit. Sapos eniwan long ol pikinini i bin livim kakae bifo, invaetem olgeta blong serem ol eksperiens blong olgeta. Leftemap tingting blong ol pikinini blong toktok long papa mo mama blong olgeta, abaot wanem i minim blong livim kakae. Helpem olgeta blong andastanem wanem i minim blong livim kakae wetem wan tru stamba tingting mo wetem wan hat we i wantem prea.

• Ridim tugeta Aesea 58:6–7, mo eksplenem se wan wei blong “letem olgeta we oli hanggri oli kam kakae wetem [yumi],” taem yumi livim kakae, i taem yumi donetem mane we bae yumi spendem long kaekae blong yumi long taem ia, i go olsem fast ofring blong yumi. Soem long ol pikinini wan donesen risit blong taeting mo ol fast ofring, mo eksplenem olsem wanem blong fulumap. Invaetem o pikinini blong ridim Aesea 58:8–10, mo stap lukaotem ol blesing we oli promesem, we bae i kam taem yumi livim kaekae. ?Olsem wanem nao fasin blong livim kaekae i save blesem yumi mo olgeta we oli stap long nid?

Aesea 61:1–3

Jisas Kraes i Sevya mo Ridima blong mi.

Tingting hevi long wanem bes wei nao yu save yusum ol toktok blong Aesea blong mekem testemoni blong ol pikinini long saed blong Jisas Kraes, se Hem i Sevya mo Ridima blong olgeta, i kam moa strong.

Samfala Aktiviti we Yu Save Mekem

• Givim smol taem long ol pikinini blong oli ridim Aesea 61:1–3 olgetawan. Mo afta, invaetem olgeta blong raet long wan pis pepa o long wan stadi jenol, wanem nao ol ves ia oli tijim olgeta abaot Jisas Kraes. Invaetem sam long ol pikinini blong serem ol tingting blong olgeta.

• Invaetem ol pikinini blong serem wan sentens aot long ol ves ia we oli gat spesel mining long olgeta, mo blong oli eksplenem se from wanem. ?Olsem wanem nao ol ves ia oli helpem yumi blong andastanem, wanem nao Jisas Kraes i kam long wol blong mekem?

Aesea 65:17–25

Mileniom bae hem i wan taem blong pis mo glad.

Aesea i bin luk wan taem we ol pipol blong God bae oli gat pis mo glad. Profesi ia bae i kam blong hapen taem Jisas Kraes bae i kambak long wol ia mo bae Hem i rul blong wan taosen yia—wan taem we oli singaotem Mileniom.

Samfala Aktiviti we Yu Save Mekem

• Aesea 65:17–25 i stap tokbaot se wol ia bae i kam olsem wanem taem we Sevya bae i kambak bakegen. Seraotem ol pikinini long ol smol grup, mo givim long wanwan grup, sam long ol ves ia. Afta sam minit i pas, tugeta, mekem wan lis long bod long hao laef bae i defren long “niufala wol” we oli tokbaot long ol ves ia (ves 17). ?From wanem hemia bae i wan taem blong stap “harem gud, gogo i no save finis”? (ves 18).

• Bifo klas i stat, rere long sam pis pepa mo raetem ol toktok mo ol sentens aot long namba ten toktok blong bilif. Invaetem wan pikinini blong talem baehat toktok blong bilif ia, mo askem ol pikinini blong putum ol toktok long ol pis pepa ia, long oda. Helpem ol pikinini blong andastanem, wanem toktok blong bilif ia, i tijim yumi abaot Mileniom.

Stap Leftemap Tingting blong Lanem Samting long Hom

Invaetem ol pikinini blong serem wan samting we oli lanem tedei abaot Sevya wetem ol famli blong olgeta. Leftemap tingting blong olgeta blong ridim ol skripja blong olgeta wetem famli blong olgeta long wik ia.

Stap Kam Antap long Fasin blong Yumi blong Stap Tij

Askem ol kwestin we oli givim insperesen. Askem ol kwestin we oli invaetem ol pikinini blong oli tingting plante o tingting moa bigwan. Eksampol: Tingting long ol kwestin we bae i leftemap tingting blong olgeta blong serem ol testemoni mo ol eksperiens blong olgeta.