“17–23 Oktoba. Jeremaea 30–33; 36; Ol Krae 1; 3: ‘Olgeta we Naoia Oli Stap Harem Nogud, Oli Stap Krae, Mi Mekem Olgeta Oli Harem Gud Bakegen,’” Kam Folem Mi—Blong Praemeri: OlTesteman 2022 (2021)
“17–23 Oktoba. Jeremaea 30–33; 36; Ol Krae 1; 3,” Kam Folem Mi—Blong Praemeri: 2022
Krae blong Profet Jeremaea, i kam long wan kaving we i kam Nasaret Skul
17–23 Oktoba.
Jeremaea 30–33; 36; Ol Krae 1; 3
“Olgeta we Naoia Oli Stap Harem Nogud, Oli Stap Krae, Mi Mekem Olgeta Oli Harem Gud Bakegen”
Ol buk blong Jeremaea mo Ol Krae bae oli had blong ol pikinini oli andastanem, be oli save lanem ol lesen aot long ol prinsipol we oli oli tijim insaed long ol buk. ?Wanem nao yu filing mo tingting we yu wantem serem?
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Pasem raon wan kopi blong Baebol. Taem ol pikinini oli holem buk, askem olgeta blong serem wan samting we oli laekem abaot OlTesteman—ating wan prinsipol o wan fevret stori, we oli bin lanem long hem, long haos o long Jos.
Tijim Doktrin: Ol Smol Pikinini
Papa long Heven mo Jisas Kraes i lavem mi.
Blong filim “lav ia we i no gat en” blong Papa long Heven mo Jisas Kraes bae i helpem ol pikinini we yu tijim blong kam kolosap long Tufala.
Samfala Aktiviti we Yu Save Mekem
-
Soem long ol pikinini sam samting (o ol pikja blong ol samting) we i save stap longtaem mo sam we oli no save stap longtaem, olsem wan aean mane mo wan pis blong wan frut. Askem ol pikinini se wijwan long ol samting ia bae i save stap longtaem bitim narawan. Ridim Jeremaea 31:3, mo helpem ol pikinini blong andastanem se lav we Papa long Heven mo Jisas Kraes i gat long olgeta i “no gat en.”
-
Askem ol pikinini blong serem olsem wanem Papa long Heven mo Jisas Kraes, Tufala i soem “lav mo kea” long olgeta (Jeremaea 31:3). Blong givim ol aedia long ol pikinini, singsing wan singsing abaot lav blong Tufala from yumi, olsem “I Feel My Savior’s Love” o “My Heavenly Father Loves Me” (Children’s Songbook, 74–75, 228–29). Sapos i posibol, soem ol pikinini blong ol samting we we i singsing i stap tokbaot. ?Olsem wanem nao yumi filim taem yumi tingbaot lav blong Papa long Heven mo Jisas Kraes?
Ol skripja i save givim insperesen long yumi blong sakem sin mo tanem yumi i go long Lod.
Ol skripja oli toktok blong God.
Lod i bin talemaot long Jeremaea blong raetemdaon ol toktok blong Hem, mo oli bin sevem ol samting we hem i raetem, blong yumi long buk blong Jeremaea. Helpem ol pikinini blong mekem lav blong olgeta long ol skripja i kam moa bigwan, mo ples ia yumi faenem toktok blong God.
Samfala Aktiviti we Yu Save Mekem
-
Invaetem wan pikinini blong mekem olsem se hem i Jeremaea, mo invaetem ol narafala pikinini blong stap olsem Baruk. Helpem pikinini ia we i stap olsem Jeremaea blong talem sam toktok aot long Jeremaea 36:3 mo bae ol narafala pikinini oli mekem olsem se oli stap raetemdaon, olsem Baruk. Testifae se ol skripja tedei oli “ol toktok blong Lod” (Jeremaea 36:4) we Hem i askem ol profet blong raetemdaon.
-
Soem wan buk blong ol pikinini mo wan kopi blong ol skripja, mo askem ol pikinini blong tokbaot wanem nao oli luk i defdefren long tufala buk ia. ?Wanem i mekem ol skripja i spesel? Helpem ol pikinini blong andastanem se ol skripja oli toktok blong God, we ol profet oli bin raetem, semmak olsem buk blong Jeremaea, i wanem we God i bin talem long Jeremaea blong raetem.
Mi save serem wanem we mi stap lanem aot long ol skripja.
Ol pikinini oli save kam wan bigfala paoa long olgeta we oli stap raon long olgeta. Olsem Baruk, olgeta oli save serem wanem we oli stap lanem long ol skripja, long ol narawan.
Samfala Aktiviti we Yu Save Mekem
-
Invaetem ol pikinini blong mekem ol aksen folem ol toktok we yu stap ridim (o talem long wan sot toktok) Jeremaea 36:4–10, olsem blong mekem olsem se oli stap raet long wan buk (luk long ves 4), stap holem ol aean blong kalabus (luk long ves 5), mo stap ridim ol skripja long ol pipol (luk long ves 8, 10). Tokbaot bigwan se, Baruk i bin gat strong paoa long tingting blong ridim ol toktok blong Jeremaea long ol pipol iven ol lida long Jerusalem oli no wantem hem blong mekem. Helpem ol pikinini blong tingbaot wan samting we oli bin lanem aot long OlTesteman, mo blong tingting long ol wei we oli save serem samting ia wetem ol narafala wan.
-
Singsing long wan singsing abaot ol skripja olsem hemia “Search, Ponder, and Pray” (Children’s Songbook,109). Serem testemoni blong yu abaot ol skripja, mo invaetem ol pikinini blong serem ol testemoni blong olgeta tu.
Tijim Doktrin: Ol Bigfala Pikinini
Mi save kipim ol kavenan blong mi wetem God.
Ol tijing blong Jeremaea abaot kavenan ia we i niu mo no gat en blong Lod, i save helpem ol pikinini we yu tijim, blong oli save mekem i kam strong filing blong hat blong olgeta, blong wantem kipim ol kavenan blong olgeta.
Samfala Aktiviti we Yu Save Mekem
-
Droem wan sep blong hat long bod, mo invaetem haf long ol pikinini blong ridim Jeremaea 31:31–34 mo narafala haf blong ol pikinini blong ridim Jeremaea 32:38–41. Invaetem tufala grup blong go long bod mo raetem ol samting we oli lanem aot long ol ves blong olgeta, abaot ol kavenan blong God, insaed long sep blong hat ia. ?Olsem wanem nao taem se yumi gat loa blong God long hat blong yumi, (luk long Jeremaea 31:33) i defren long wei we yumi stap ridim insaed long ol skripja? ?From wanem yumi wantem mekem ol kavenan wetem God? ?From wanem Hem i wantem mekem kavenan wetem yumi?
-
Blong luklukbak long ol kavenan we yumi mekem taem yumi kasem baptaes, invaetem ol pikinini blong mekem wan jat we i gat tu kolom long wan pis pepa, we i taetol blong hem i Ol Promes blong Mi mo Ol Promes blong God. Askem olgeta blong fulumap insaed long jat ia taem bae oli yusum taetol seksen ia “The Baptismal Covenant” in the Gospel Topics article “Baptism” (topics.ChurchofJesusChrist.org) o Mosaea 18:10,13; Doktrin mo Ol Kavenan 20:37. Invaetem ol pikinini blong putum pepa ia long hom blong helpem olgeta tingbaot blong kipim ol kavenan blong olgeta.
Ol skripja oli toktok blong God.
Stori ia long Jeremaea 36 i save helpem olgeta blong lanem aot long ol eksampol blong ol pipol we oli akseptem toktok blong Lod insaed long ol skripja.
Samfala Aktiviti we Yu Save Mekem
-
Raetem ol kwestin ia long bod: ?From Wanem? ?Huia i tingting se ol skripja oli impoten? ?Huia i i tingting se ol skripja oli no impotem?. Ridim tugeta Jeremaea 36:1–3, mo askem ol pikinini se, from wanem Lod i wantem Jeremaea blong raetemdaon ol toktok blong Hem. Afta, askem ol pikinini blong wok tugeta, tu tu long wan grup, blong ridim Jeremaea 36:5–8, 20–25 mo talemaot se huia nao i soem se ol skripja oli impotem mo huia i no soem se ol skripja oli impoten. Tokbaot from wanem yu ting se ol skripja oli impoten tumas. Serem wan sentens o stori we i gat bigfala mining long yu. Invaetem ol pikinini blong serem blong olgeta tu.
-
Invaetem ol pikinini blong yusum aktiviti pej blong wik ia, blong praktisim blong stap serem wetem olgetawan, stori insaed long Jeremaea 36. Invaetem olgeta blong serem testemoni blong olgeta abaot ol skripja.
Sevya i mekem i posibol blong mi kasem fogivnes long ol sin blong mi.
Olsem we buk blong Ol Krae i tokbaot long wan wei blong poem, oltaem bae harem nogud taem yumi mekem sin. Ol filing ia i save givim insperesen long yumi blong jenisim laef blong yumi blong kasem fogivnes long Papa long Heven.
Samfala Aktiviti we Yu Save Mekem
-
Eksplenem long ol pikinini se, from we ol laen blong Isrel oli no bin sakem sin, Jerusalem mo tempol long ples ia i bin smas gud. Askem ol pikinini blong tokbaot olsem wanem bae oli filim, sapos olgeta tu oli bin stap laef long Jerusalem long tetaem ia. Ridim tugeta Ol Krae 1:1–2,16. ?Wanem nao ol toktok ol sentens insaed long ol ves ia i helpem yumi blong andastanem, olsem wanem ol laen blong Isrel oli bin filim long taem ia. ?Long wanem wei nao mesej ia long Ol Krae 3:22–26 i bin givim hop long olgeta?
-
Invaetem ol pikinini blong tingting long wan taem we oli bin harem nogud from wan joes we oli bin mekem we i no gud. ?Wanem nao oli faenem Ol Krae 3:22–26 we i helpem olgeta blong save se Lod i wantem blong fogivim olgeta oltaem?
Stap Leftemap Tingting blong Lanem Samting long Hom
Invaetem ol pikinini blong askem ol memba blong famli blong olgeta, blong serem ol eksperiens we i go wetem ol prinsipol we yufala i bin stadi long hem long klas Eksampol. Sapos yufala i toktokraon long ol skripja, ol pikinini oli save askem wan memba blong famli blong serem olsem wanem hem i save ol skripja oli tru.
Kam Antap long Fasin blong Yumi blong Stap Tij
Pulum Tingting blong Ol Pikinini Maet bae yu nidim blong tingting long ol samting we yu save krietem blong pulum tingting blong ol smosmol pikinini. Eksampol. Yusum ol pikja, ol singsing, ol gem mo ol narafala aktiviti.