Ol Man stap Jikim Kraes, i kam long Carl Heinrich Bloch

26 Septemba–2 Oktoba

Aesea 50:57

“Olgeta Samting we I Stap Mekem Yumi Harem Nogud, Hem I Karem Olgeta Evriwan. Ol Sobodi we Hem I Karem, Hemia Ol Sobodi blong Yumi.””

Aesea 50:57 i gat insaed sam naesfala lanwis we ol pikinini yu tijim, bae oli no andastan. Taem yu stap tij, tingting hevi long ol simpol trutok, we ol toktok ia oli stap tijim, mo olsem wanem yu save helpem ol pikinini blong lanem olgeta.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Leftemap tingting blong wanwan pikinini blong serem, olsem wanem oli save se Jisas Kraes i lavem olgeta. Askem olgeta blong soem wanem oli stap mekem, blong soem se oli lavem Jisas.

Tijim Doktrin: Ol Smol Pikinini

Aesea 53:4 .

Jisas Kraes i safa from mi, from se Hem i lavem mi.

Tru long atonmen mo sakrifaes blong Hem, Jisas Kraes i safa from ol sin blong yumi mo tekem long Hemwan “ol sobodi blong yumi” mo “ol harem nogud blong yumi.” ?Wanem bae yu testifae abaot long saed blong Atonmen blong Sevya, long ol pikinini?

Samfala Aktiviti we Yu Save Mekem

• Soem ol pikja blong Sevya we i stap harem nogud long kros mo long Garen blong Getsemane(luk long Gospel Art Buk, ol namba 56, 57, o ol japta 51–53 insaed long Ol Niu Testeman Stori). Askem ol pikinini blong tokbaot wanem oli luk long ol pikja, mo serem wanem oli save, we i stap hapen long ol pikja ia. ?From wanem Jisas i safa from yumi?

• Ridim Aesea 53:4long ol pikinini: “Olgeta samting we i stap mekem yumi harem nogud, hem i karem olgeta evriwan. Ol sobodi we hem i karem, hemia i sobodi blong yumi.” Soem long ol pikinini wan samting we i hevi (o wan pikja we i soem wan hevi samting) mo invaetem olgeta blong mekem olsem se, oli stap leftemap wan hevi samting. Eksplenem se “sobodi” mo “filing blong harem nogud” (o blong no glad) i save filim, olsem se, oli hevi mo i had blong karem. Testifae se Jisas Kraes bae i helpem yumi blong karemaot ol samting ia, from se Hem i lavem yumi.

Aesea 55:6

Mi save lukaotem Lod mo singaotem Hem.

Tingting hevi long olsem wanem yu save helpem ol pikinini blong andastanem wanem i minim blong “lukaotem” Jisas truaot long laef blong olgeta.

Samfala Aktiviti we Yu Save Mekem

• Haedem wan pikja blong Jisas, samples, insaed long rum, mo invaetem ol pikinini blong faenem. Ridim toktok ia “!Yufala i save faenem Hem, yufala i mas lukaot hem” long Aesea 55:6. Askem ol pikinini long samfala wei we oli save lukaotem Lod—we i minim se, oli traehad blong lanem abaot Hem mo kam kolosap long Hem. Evri taem we wan pikinini i givim ansa, haedem pikja bakegen, mo invaetem pikinini blong “lukaotem” pikja ia.

• Helpem ol pikinini blong lanem singsing ia “Seek the Lord Early” (Children’s Songbook,108) o wan narafala singsing abaot wei blong stap kam kolosap moa long Sevya. Yusum aktiviti pej blong wik ia blong helpem ol pikinini blong jusum wan samting we bae oli mekem blong “lukaotem … Lod.”

• Ridim sentens ia: “Naoia Hae God i stap kolosap long yumi, … yufala i prea long hem,” we i stap long Aesea 55:6. ?Olsem wanem yumi singaotem o prea long Papa long Heven? Askem ol pikinini blong tokbaot wanem oli stap talem long ol prea blong olgeta. Testifae se Papa long Heven i lavem olgeta mo harem olgeta taem oli prea.

Tijim Doktrin: Ol Bigfala Pikinini

Aesea 51–52

Lod i invaetem mi blong “[mi] kam strong bakegen.”

Long Aesea 51 mo52, Lod i yusum ol toktok olsem “yufala i wekap,” “yufala i stanap,” mo “mas strong bakegen” blong givim insperesen long ol pipol blong Hem blong oli laef i go kasem mak blong tabu paoa we oli save kasem. Tingting long olsem wanem ol sentens ia oli save givim insperesen long ol pikinini we yu tijim.

Samfala Aktiviti we Yu Save Mekem

• Bifo klas, raetem long bod sam long ol sentens ia, aot long Aesea 51–52 we i soem ol aksen we Lod i wantem ol pipol blong Hem blong mekem, olsem “Yufala i luklukgud long skae,” “Wekap,” “Girap,” “No sidaon long das, girap,” mo “Harem Gud” (Aesea 51:6,17; 52:2,9). Letem ol pikinini oli gat wanwan taem blong aktem wan long ol sentens ia, mo afta, ol narafala pikinini we oli stap, bae oli traem blong talemaot aksen ia. Afta wanwan i gat janis blong mekem hemia, soem long ol pikinini sentens ia long ol skripja, mo toktokraon, wetem olgeta, ol mining blong sentens ia long saed blong spirit. ?Wanem nao Lod i stap askem yumi blong mekem? ?Olsem wanem nao yumi save mekem wanwan long ol samting ia?

• Invaetem ol pikinini blong ridim Aesea 51:1, 4,7, mo faenemaot, huia Lod i stap toktok long olgeta mo wanem Hem i wantem olgeta blong mekem. ?Wanem i minim blong “lisin gud” long Lod? Blong mekem i moa klia, askem wan blong givim sam simpol instraksen we bae ol narawan oli mas folem. ?From wanem samtaem i had blong lisin mo obei long Lod? ?Olsem wanem nao yumi stap soem long Lod se yumi “lisin gud” long Hem?

From Lav, i kam long woman we i katem statiu ia, Angela Johnson

Aesea 53:3–9

Jisas Kraes i tekem long Hemwan ol sin mo harem nogud blong mi.

?Olsem wanem nao yu save yusum ol toktok blong Aesea blong helpem ol pikinini blong andastanem moa wanem we Sevya i bin mekem from olgeta?

Samfala Aktiviti we Yu Save Mekem

• Soem sam pikja we oli soem safaring mo ded blong Jisas Kraes (eksampol, luk long Gospel Art Buk, ol namba 56, 57, 58). Ridim tugeta Aesea 53:3–6, 9, mo invaetem ol pikinini blong lukaotem ol sentens we oli tokbaot ol samting we oli stap hapen insaed long ol pikja ia. Testifae se, handred yia bifo Jisas Kraes i bin safa from yumi, ol profet olsem Aesea, oli bin stap tij abaot ol impoten taem ia. ?From wanem nao i impoten blong ol pipol oli mas save ol samting ia plante plante ia bifo i hapen? (luk long Alma 39:15–19).

• Invaetem ol pikinini blong ridim Aesea 53:4–7 mo faenem ol toktok we i tokbaot wanem we Sevya i safa long hem, from yumi. Askem olgeta blong raetem ol toktok ia long bod. ?From wanem nao Hem i safa “ol harem nogud,” “ol sobodi,” mo “ol rabis fasin” blong yumi? (luk tu long Alma 7:11–12). Serem wetem ol pikinini, olsem wanem Sevya i bin helpem yu blong karemaot ol harem nogud mo ol sobodi blong yu. Letem olgeta oli serem wanem oli filim abaot Sevya mo wanem Hem i bin mekem from olgeta.

Aesea 55:7–9

Ol wei blong Lod oli moa hae bitim ol wei blong mi.

Taem yumi andastanem se ol tingting mo ol wei blong Lod oli moa hae bitim hemia blong yumi, i kam moa isi blong trastem Hem.

Samfala Aktiviti we Yu Save Mekem

• Askem ol pikinini se huia nao bae oli go long hem, taem oli stap fesem wan problem we i had, mo from wanem. Wetem ol pikinini, ridim Aesea 55:8–9, mo askem olgeta blong lisin long from wanem yumi mas lukaotem Lod blong i lidim yumi taem yumi nidim help.

• Droem long bod, skae mo graon, mo makem olgeta Ol Heven mo Wol. Afta invaetem ol pikinini blong ridim Aesea 55:9 blong faenemaot wanem we Lod i komperem abaot ol heven mo wol, mo askem olgeta blong makem ol narafala samting long ol droing ia. ?Wanem nao i minim se, ol wei blong Lod oli “moa hae” bitim blong hemia blong yumi? ?From wanem i impoten blong save hemia?

• Toktok raon wetem ol pikinini abaot sam long ol wei blong Lod we oli hae bitim blong yumi. Eksampol: ?Wanem i wei blong Hem blong tritim ol man we oli mekem sin) (luk long Mak 2:15–17). ?Wanem i wei blong Hem blong stap lidim ol narafala man? (luk long Matiu 20:25–28). ?Olsem wanem nao ol wei blong Hem oli defren long wei blong ol narafala man? Talem long ol pikinini, olsem wanem yu bin lanem blong trastem ol tingting mo ol wei blong Hem we oli hae moa.

Stap Leftemap Tingting blong Lanem Samting long Hom

Talem long ol pikinini blong putum wan gol we i save helpem olgeta blong kam moa kolosap long Jisas Kraes, folem wanem we oli bin lanem long klas tedei. Invaetem olgeta blong serem gol ia wetem wan memba blong famli.

Stap Kam Antap long Fasin blong Yumi blong stap Tij

Helpem ol smol pikinini blong lanem samting aot long skripja. Blong helpem ol smol pikinini blong lanem samting aot long skripja, lukluk long wan ves blong skripja nomo fastaem, o iven, wan impoten sot toktok nomo fastaem. Samtaem yu save ridim wan sentens mo invaetem ol pikinini blong stanap o leftemap han blong olgeta, taem oli harem wan spesel toktok o sentens we yu wantem lukluk nomo long hem.