“19–25 Septemba. Aesea 40–49: ‘Yufala I Go Toktok Gud long Ol Man blong Mi. Yufala I Leftemap Tingting blong Olgeta,’” Kam Folem Mi—Blong Praemeri: OlTesteman 2022 (2021)
“19–25 Septemba. Aesea 40–49,” Kam Folem Mi—Blong Praemeri: 2022
Stap Hilim Blaen Man, i kam long Carl Heinrich Bloch
19–25 Septemba
Aesea 40–49
“Yufala I Go Toktok Gud long Ol Man blong Mi. Yufala I Leftemap Tingting blong Olgeta”
Plante sentens insaed long Aesea 40–49 i save helpem ol pikinini blong mekem lav mo fet blong olgeta long Lod i kam antap. Lukaotem Spirit blong i lidim yu blong faenem ol sentens ia, taem yu stap stadi.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Ridim Aesea 40:9 wetem ol pikinini mo invaetem olgeta blong mekem olsem se oli stap klaem i go antap long “bigfala hil” mo afta, wanwan i gat taem blong leftemap ol voes blong olgeta mo blong serem wan samting we oli lanem aot long ol skripja, we oli jes ridim i no longtaem—hemia long hom o long Jos.
Tijim Doktrin: Ol Smol Pikinini
Mi save stap wan witnes blong Lod
Lod i rimaenem ol laen blong Isrel se oli bin witnesem plante bigfala samting we i hapen, we Hem i bin mekem from olgeta. Hem i wantem olgeta (mo yumi evriwan) blong stap ol witnes blong Hem, blong stap helpem ol narafala man blong save abaot paoa mo ol gudfala fasin blong Hem.
Samfala Aktiviti we Yu Save Mekem
-
Tokbaot long ol pikinini wan samting we yu bin witnesem. Helpem olgeta blong tingting long ol samting we oli save talemaot long wanwan long olgeta abaot o blong stap wan “witnes” blong—eksampol, wan kaekae we i naes tumas, we oli bin testem, wan ples we oli bin visitim, o wan man we oli save. Ridim long ol pikinini, Aesea 43:10: “Yufala i witnes blong mi. Mi mi jusumaot yufala blong yufala i man blong wok blong m.” Talem long ol pikinini se taem yumi baptaes, yumi promes blong stap wan witnes blong Jisas Kraes (luk long Mosaea 18:9). ?Hem i minim wanem blong stap wan witnes blong Lod?
-
Askem ol pikinini blong serem wanem oli save abaot Jisas Kraes mo gospel blong Hem. Soem long ol ol pikja we bae i givim sam aedia long olgeta (eksampol, ol pikja blong Sevya we i Laef Bakegen long Ded, Buk blong Momon, tempol mo profet we i stap laef). Invaetem olgeta blong tokbaot, wanem ol samting we bae oli save serem wetem ol narafala man, olsem ol witnes blong Lod.
“Mi nomo mi Hae God, mi nomo mi save sevem yufala.”
Jisas Kraes nomo i Man ia we i save sevem yumi long sin mo long ded. Tingting hevi long olsem wanem yu save givim insperesen long ol pikinini blong oli putum tras blong olgeta long Hem.
Samfala Aktiviti we Yu Save Mekem
-
Invaetem ol pikinini blong tingting long wan situesen we maet oli nidim help. (olsem taem oli sik o ol stak long wan hevi ren mo win). Soem samfala samting (o pikja blong ol samting), we bae oli save helpem olgeta long ol kaen situesen ia, mo hemia we bae i no save help. Eksampol. Wan ambrela i save help long taem blong hevi ren mo win, be wan kap blong wota mo wan pensel i no save help long taem ia. Askem ol pikinini blong oli jusum wan samting we bae i save helpem olgeta long situesen ia. Soem ol pikja blong Sevya, blong helpem ol pikinini blong tokbaot, olsem wanem Hem i stap helpem yumi.
-
Ridim long ol pikinini Aesea 43:11, mo askem long olgeta blong poenem pikja blong Jisas, taem oli harem toktok ia “Sevya.” Testifae se from we Jisas Kraes i bin harem nogud mo ded from yumi, mo I bin laef bakegen long ded, Hem i Man ia nomo we i save sevem yumi long ol sin blong yumi mo long ded.
Yumi save gat “ol gudgudfala samting, olsem solwota we i stap brok long sanbij mo rif, we neva i save spel.” (Aesea 48:18).
Blong stap obei long ol komanmen blong God, i karem pis i kam.
Lod i promesem se pis bae i olsem “wan reva” mo fasin blong stap stret mo gud i olsem “ol wef blong solwota” i go long olgeta we oli stap obei long ol komanmen blong Hem.
Samfala Aktiviti we Yu Save Mekem
-
Ridim long ol pikinini Aesea 48:18 Invaetem olgeta blong muvmuvum ol fingga mo ol han blong olgeta olsem wan reva mo ol wef. Tokbaot olsem wanem taem yu stap obei long ol komanmen, i bin helpem yu blong filim plante pis olsem wan reva o i strong olsem wan wef.
-
Droem wan reva long bod. Helpem ol pikinini blong oli tingting long ol komanmen God i bin givim long yumi. Raetem ol komanmen ia long ol pis blong pepa (o droem ol simpol pikja blong olgeta) mo letem ol pikinini oli go wan afta wan, mo putum ol komanmen ia long reva ia we i stap long bod. Helpem ol pikinini blong lanem olsem taem oli obei long ol komanmen, i save karem pis i kam long olgeta.
-
Singsing tugeta wan singsing abaot ol komanmen, olsem “Keep the Commandments” (Children’s Songbook, 146–47). ?Wanem nao singsing ia i tijim abaot from wanem yumi mas obei ol komanmen blong God?
Tijim Doktrin: Ol Bigfala Pikinini
Mi save help blong mekem rere “rod blong Lod.”
Yumi help blong mekem profesi i hapen, insaed long Aesea 40:3–5 tru long taem yumi helpem ol narawan blong gat Lod insaed long laef blong olgeta.
Samfala Aktiviti we Yu Save Mekem
-
Askem wan pikinini blong ridim Aesea 40:3 mo wan narafala pikinini blong ridim ol sentens ia, mo lukaotem ol toktok mo ol sentens we kolosap oli semmak: Mak 1:3–4 (Jon Baptaes); Alma 7:9 (Alma); Doktrin mo Ol Kavenan 33:10–11 (ol misinari blong lata-dei). Helpem olgeta blong poenemaot huia i stap mekem rere “rod ia blong Lod insaed long wanwan sentens. ?Olsem wanem nao ol pipol ia oli mekem rere rod blong Lod? ?Wanem nao yumi save mekem blong help?
-
Droem wan rod long bod, mo ridim wetem ol pikinini Aesea 40:3–5. Askem ol pikinini blong mekem wan lis blong ol samting we maet i stap blokem ol pipol long rod ia. Letem olgeta oli stap karemaot ol samting we i stap blokem man, taem we yu stap tokbaot ol wei we yumi save helpem ol pipol blong winim olgeta samting ia.
Lod i stap wetem mi taem mi stap gotru long ol tes long laef blong mi.
Taem yumi mekem ol kavenan wetem Lod, Hem i mekem ol promes blong stap wetem yumi—iven long taem blong ol tes blong laef blong yumi long wol ia. Helpem ol pikinini blong luk olgetawan se oli pat blong ol kavenan pipol blong Lod, mo olsem olgeta we oli stap kasem ol promes blong Hem.
Samfala Aktiviti we Yu Save Mekem
-
Raetem long bod, Mi mi… mo Bae mi… Invaetem ol pikinini blong ridim Aesea 41:10 mo Aesea 43:1–5 blong faenemaot huia i Lod, mo wanem Hem i talem se bae i mekem. ?Wanem ol narafala sentens we oli ripitim insaed long ol ves ia? ?Olsem wanem nao ol mesej ia oli givim kamfot mo hop long yumi taem we yumi stap fesem ol hadtaem.
-
Ridim tugeta Aesea 48:10, mo tokbaot wanem i wan oven, mo ol defren wei we oli blong stap yusum. Eksplenem se ol aean samting, oli stap mekem i kam klin o naes insaed long wan bigfala oven. ?From wanem nao wan bigfala oven i wan gudfala eksampol blong tokbaot ol hadtaem? ?Olsem wanem nao ol hadtaem blong yumi i save mekem yumi kam klin? (luk long Alma 62:41).
Lod bambae i neva fogetem mi.
Taem yumi filim se yumi stap longwe long Lod from ol sin, ol tes blong laef, o eni narafala risen, mesej blong Aesea 49:14–16 i save karem pis i kam long laef.
Samfala Aktiviti we Yu Save Mekem
-
Askem ol pikinini blong ridim Aesea 49:14. ?Wanem nao i save mekem ol pipol oli filim se oli stap olgetawan o filim se oli sakemaot olgeta? ?Olsem wanem nao yumi save helpem ol narafala man oli save se Lod i no fogetem olgeta. ?Olsem wanem nao yumi save se Hem i no fogetem yumi?
-
Invaetem ol pikinini blong tokbaot wan we oli save mo we bae oli neva fogetem hem, olsem wan memba blong famli o wan fren. Toktokraon long olsem wanem wan mama i filim abaot ol pikinini blong hem, mo olsem wanem Lod i filim abaot yumi. Afta, askem ol pikinini blong ridim Aesea 49:15–16. Folem ol ves ia, ?from wanem nao Lod bae i neva fogetem yumi? Invaetem ol pikinini blong serem ol filing blong olgeta abaot Jisas Kraes.
Stap Leftemap Tingting blong Lanem Samting long Hom
Invaetem ol pikinini blong tingbaot wan samting we oli lanem tedei mo we oli wantem blong lan moa abaot samting ia. Helpem olgeta blong raetem wan kwestin abaot samting ia, mo bae oli save askem long papa, mama o wan narafala memba blong famli blong olgeta.
Kam Antap long Fasin blong Yumi blong Stap Tij
Stretem folem ol nid blong ol pikinini. Sapos yu tijim ol smosmol pikinini be yu filim insperesen blong tijim olgeta wan long ol prinsipol insaed long aotlaen, anda long “Ol Bigfala Pikinini,” o nara wei i go raon, stretem wan long ol aktiviti ia i go wetem wan prinsipol ia blong mitim ol nid mo hamas oli save mekem, long ol pikinini we yu stap tijim.