“12–18 Septemba. Aesea 13–14; 24–30; 35: ‘From Samting Ya, Bambae Mi Mi Mekem Olgeta Oli Sek. Bambae Mi Stap Mekem Ol Samting blong Sapraes,’” Kam Folem Mi—Blong Praemeri: OlTesteman 2022 (2021)
“12–18 Septemba. Aesea 13–14; 24–30; 35,” Kam Folem Mi—Blong Praemeri: 2022
Tabu Bus, i kam long Brent Borup
12–18 Septemba
Aesea 13–14; 24–30;35
“From Samting Ya, Bambae Mi Mi Mekem Olgeta Oli Sek. Bambae Mi Stap Mekem Ol Samting blong Sapraes”
Afta long plante prea mo stadi long Aesea 13–14; 24–30;35, mekem plan blong ol aktiviti blong helpem ol pikinini blong lanem samting. Ol aedia blong aktiviti andanit ia, oli save stretem folem ol yia blong olgeta.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Invaetem ol pikinini blong stanap, sapos oli wantem blong serem wan samting we oli jes lanem i no longtaem i pas, abaot gospel long hom o long jos. Givim janis long wanwan pikinini blong serem wanem oli gat blong talem.
Tijim Doktrin: Ol Smol Pikinini
I bin gat wan wo long heven.
Bifo oli krietem wol ia, Papa long Heven i bin jusum Jisas Kraes blong stap olsem Sevya blong yumi. Aesea 14:12–14 i tokbaot hae tingting we Setan i bin soem long laef bifo laef long wol ia, long wan kaonsel long Heven.
Samfala Aktiviti we Yu Save Mekem
-
Yusum “Fas Toktok: Plan blong Papa blong Yumi long Heven” (insaed long Ol Niu Testeman Stori, 1–3) o singsing ia “I Lived in Heaven” (Children’s Songbook,4) blong talem long ol pikinini abaot Wo ia long Heven, bifo yumi bin bon i kam long wol ia. (Taem yu stap mekem hemia, talem tu ol sentens ia aot long Aesea 14:12–14 we i tokbaot Setan.) Afta, invaetem ol pikinini kam wan afta wan, blong talem stori ia bakegen long yu. Tokbaot bigwan se Jisas Kraes i bin folem plan blong Papa long Heven mo i bin kam Sevya blong yumi.
-
Long bod, droem wan sep blong hat wetem toktok ia Setan mo wan fes we i no glad insaed long hem. Eksplenem se Setan i talem long hat blong hem se, “[Mi] stap tingbaot blong stanemap bigfala jea blong [mi] antap long ol sta ya we oli antap olgeta” (Aesea 14:13), we i minim se hem i wantem kam moa gud bitim Papa long Heven. Invaetem wan pikinini blong droem wan narafala sep hat, we bae hemia i gat toktok ia, Jisas, mo wan fes we i glad insaed long sep blong hat ia. Helpem ol pikinini blong andastanem se Jisas i wantem blong mekem wanem Papa long Heven i askem Hem blong mekem (luk long Moses 4:1–2). ?Olsem wanem nao yumi save folem eksampol blong Jisas?
“Hem bambae i mekem we ded bambae i go lus olgeta” (Aesea 25:8).
Jisas i bin laef bakegen long ded.
Jisas Kraes i save kamfotem yumi long taem blong bigfala harem nogud we yumi stap filim long taem we i gat wan ded. From se Hem i winim ded, yumi tu, bae yumi girap bakegen long ded.
Samfala Aktiviti we Yu Save Mekem
-
Soem wan pikja blong Jisas we i Laef Bakegen long ded, mo askem ol pikinini blong serem wanem oli save abaot pikja ia. Serem stori blong Jisas we i bin girap bakegen long ded, sapos i nidim (luk long “Jisas I Bin Girap Bakegen,” insaed long Ol Niu Testeman Stori, 139–44). Plei o singsing long wan singsing abaot Laef Bakegen long Ded, olsem “Jesus Has Risen” (Children’s Songbook,70), mo invaetem ol pikinini blong serem olsem wanem hemia i mekem olgeta i filim, blong save se Jisas i bin laef bakegen long ded.
-
Tokbaot wetem ol pikinini wan man we yu save, we i ded finis. ?Yumi filim olsem wanem taem wan man we yumi lavem i ded? Askem ol pikinini blong droem wan fes blong wan man we i stap krae. Afta, ridim Aesea 25:8 long olgeta. ?Wanem nao Jisas bae i mekem long ol wota blong ae blong yumi, taem yumi misim wan man we i ded? Invaetem ol pikinini blong droem wan fes we i glad. Serem testemoni blong yu se Jisas i bin laef bakegen long ded, yumi save filim kamfot taem wan man i ded, mo save se wan dei bae yumi evriwan i laef bakegen long ded wan dei.
Lod i putumbak jos blong Hem tru long profet Josef Smit.
Gospel we I Bin Kambak i wan “[gudfala wok mo wan wok blong sapraes]” (Aesea 29:14). Serem wetem ol pikinini sam long ol samting blong sapraes we Lod i bin mekem—mo gohed blong mekem—blong putumbak gospel blong Hem long dei blong yumi.
Samfala Aktiviti we Yu Save Mekem
-
Invaetem ol pikinini blong talem wanem oli save abaot Josef Smit. Sapos i nidim, serem wetem olgeta, “Fas Visen blong Josef Smit” (insaed long Ol Doktrin mo Kavenan Stori, 9–12). Ridim Aesea 29:12, mo eksplenem se no mata Josef Smit oli luk hem olsem wan man we i no “skul”, tru long plante man, be Jisas Kraes i putumbak gospel tru long hem.
-
Ridim Aesea 29:14 long ol pikinini, mo serem wetem olgeta ol narafala toktok we i minim semmak samting olsem “gudfala wok” mo “sapraes wok.” Soem sam aetem we i ripresentem sam long ol gudfala wok blong Lod, long taem blong ol las dei ia, olsem wan pikja blong Josef Smit, taem hem i stap kasem prishud (luk long Gospel Art Buk, ol namba 90, 93,94) o wan blong Buk blong Momon. Invaetem ol pikinini blong jusum wan aetem mo serem from wanem i wan gudfala wok long olgeta.
Tijim Doktrin: Ol Bigfala Pikinini
Aesea 24:3–5; 29:7–10; 30:8–14
Apostasi i minim blong tanem yumi longwe aot long Lod mo ol profet blong hem.
Blong stap ridim ol woning abaot ol denja blong apostasi, i save helpem ol pikinini blong jusum blong stap tru long Lod mo folem ol profet blong Hem.
Samfala Aktiviti we Yu Save Mekem
-
Raetem toktok ia apostasi long bod. Invaetem ol pikinini blong lukaotem wan mining blong toktok ia insaed long “Apostasi” insaed long Gaed Long Ol Skripja (olskripja.ChurchofJesusChrist.org). Invaetem olgeta blong ridim Aesea 24:5; 30:9–11 mo mekem lis blong ol samting we ol pipol oli stap mekem long taem blong apostasi. Afta, invaetem ol pikinini blong jenisim ol aetem insaed long lis i go long ol samting we yumi save mekem blong stap tru long Lod.
-
Serem ol pikinini, blong oli sidaon tutu, mo givim long wanwan grup ol skripja ves ia blong oli ridim: Eksodas 15:233; Aesea 29:7–10; o Aesea 30:8–14. Invaetem olgeta blong droem ol pikja we i ripresentem wanem oli ridim. Taem oli stap serem ol droing blong olgeta, helpem olgeta blong tokbaot wanem ol toktok blong Aesea oli tijim abaot risen from wanem, yumi mas stap tru long Lod.
Restoresen blong gospel i wan “gudfala wok.”
?Olsem wanem yu save helpem ol pikinini blong andastanem, se oli pat blong “gudfala wok” ia blong Lod (Aesea 29:14) long ol las dei ia?
Samfala Aktiviti we Yu Save Mekem
-
Soem pikja blong ol gudfala samting we i hapen taem gospel i bin kambak (luk long Gospel Art Buk, ol namba 90–95, o aktiviti pej blong wik ia). Ridim tugeta Aesea 29:14, 18,24, mo invaetem ol pikinini blong lukaotem ol toktok mo ol sentens, we i go wetem ol samting we i hapen long ol pikja ia. Askem ol pikinini olsem wanem oli save helpem “gudfala wok” ia blong Lod (ves 14).
-
Serem wan sot eksperiens blong helpem ol pikinini oli andastanem wanem restoresen i stap minim. Eksampol. Tokbaot wan samting we i bin lus, afta olsem yu bin fanem. Helpem ol pikinini blong komperem eksampol ia, i go wetem Restoresen blong gospel. Folem skripja ia Aesea 29:13–15, ?from wanem yumi nidim Restoresen? ?Wanem ol gudfala wok we Lod i mekem blong putumbak gospel blong Hem?
Ol tijing blong Aesea oli poenem rod long mi i go long Jisas Kraes.
Ol tijing blong Aesea i save poenem rod i go long ol pikinini we yu tijim, i go long Sevya, mo helpem olgeta blong tingbaot ol samting we Hem i bin mekem from olgeta.
Samfala Aktiviti we Yu Save Mekem
-
Raetem ol skripja refrens ia long ol seperet pis blong ol pepa: Aesea 14:3; Aesea 25:8; Aesea 28:16; Matiu 11:28–30; 1 Korin 15:53–57; Hileman 5:12. Givim ol pepa ia long ol pikinini, mo invaetem olgeta blong raetem ol trutok we oli lanem, long ol pepa ia, aot long ol ves ia mo wok tugeta blong komperem ol ves ia we i tijim ol trutok ia, we kolosap oli semmak. Folem ol ves ia, ?wanem ol gudfala samting we Lod i bin mekem from yumi?
-
Askem ol pikinini blong jusum wan sentens aot long Aesea 14:3; 25:8; o 28:16 we oli rimaenem olgeta long Jisas Kraes. Invaetem olgeta blong raetem sentens ia long wan pis pepa, mo droem wan pikja blong Sevya, we oli save putum insaed long ol hom blong olgeta.
Stap Leftemap Tingting blong Lanem Samting long Hom
Invaetem ol pikinini blong raetem wan not abaot o droem wan pikja blong wan samting we oli bin lanem long klas tedei. Leftemap tingting blong olgeta blong serem wetem ol famli o wan memba blong klas, we i no bin kam long Praemeri klas tedei.
Stap Kam Antap long Fasin blong Yumi blong Stap Tij
Jenisim ol aktiviti blong mitim nid blong ol pikinini wetem disabiliti. Ol smosmol jenis long ol aktiviti, i save mekemsua se evri pikinini i save lanem samting. Eksampol. Sapos i gat wan aktiviti we i askem blong stap soem wan pikja, yu save singsing wan singsing nomo blong mekem se pikinini we i no save luk samting, bae i save tekpat tu.