“29 Ogis–4 Septemba: Ol Proveb 1–4; 15–16; 22; 31; Prija 1–3; 11–12: ‘Sapos Man I Wantem Haremsave Mining blong Ol Samting, Hem I Mas Savegud Hae God,’” Kam Folem Mi—Blong Praemeri: OlTesteman 2022 (2021)
“29 Ogis–4 Septemba: Ol Proveb 1–4; 15–16; 22; 31; Prija 1–3; 11–12,” Kam Folem Mi—Blong Praemeri: 2022
29 Ogis–4 Septemba
Ol Proveb 1–4; 15–16; 22; 31; Prija 1–3; 11–12
“Sapos Man I Wantem Haremsave Mining blong Ol Samting, Hem I Mas Savegud Hae God”
Taem yu stap stadi long Ol Proveb mo Prija, tingbaot ol pikinini we yu stap tijim. ?Wanem mesej nao long ol skripja ia, we i save helpem olgeta blong filim kolosap long Papa long Heven?
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Droem long bod ol pikja blong ol samting we oli stap talem insaed long buk blong Ol Proveb, olsem wan sep blong Hat, wan laet o wan rod. Helpem ol pikinini blong ridim Ol Proveb 3:5; 4:18,26, mo invaetem olgeta blong serem wan samting we oli lanem abaot ol samting ia aot long ol skripja ia.
Tijim Doktrin: Ol Smol Pikinini
Mi save trastem Lod wetem ful hat blong mi.
Taem yumi trastem Lod wetem ful hat blong yumi, yumi gat fet long Hem mo save se bae Hem i helpem yumi.
Samfala Aktiviti we Yu Save Mekem
-
Askem wan pikinini blong holem wan pikja blong Sevya mo soem taem yu stap ridim Ol Proveb 3:5. Talem long ol pikinini abaot, wanem i minim long yu blong stap trastem Lod. Invaetem ol pikinini blong mekem wan sep blong hat long ol han blong olgeta, o putum han blong olgeta long hat blong olgeta taem oli stap ripitim sentens ia “yu mas trastem Hae God long olgeta [hat] blong yu”, mo mekem olsem blong sam taem.
-
Droem wan bigfala sep blong hat long bod, mo helpem ol pikinini blong tingting long ol samting we oli save mekem blong soem se oli trastem Lod. Invaetem olgeta blong droem ol aedia blong olgeta insaed long sep blong hat ia o long wan pis pepa. Leftemap tingting blong olgeta blong serem ol aedia blong olgeta wetem ol famli blong olgeta.
Ol pikinini oli save givim “wan ansa we i gud” tru long ol toktok blong olgeta we i kaen (Ol Proveb 15:1).
Mi save yusum ol toktok we oli kaen.
Long oltaem we tumas tingting i fasfas o no glad, yumi save go tru long temtesen ia blong ansa wetem filing blong kros. Ol Proveb 15:1,18 i tijim yumi olsem wanem blong tanem kros i go longwe.
Samfala Aktiviti we Yu Save Mekem
-
Ridim Ol Proveb 15:1 long ol pikinini, mo eksplenem eni toktok o sentens we maet i no klia long olgeta. Tokbaot long olgeta sam eksampol blong ol situesen we, wan pikinini i stap kros (olsem wan rao bitwin wan brata o sista). Helpem olgeta blong tingting long “ol ansa we i gud” o ol toktok we i kaen, we oli save yusum be i no blong toktok strong wetem kros. Helpem olgeta blong stap talem ol samting ia long wan gudfala voes o wan kwaet voes.
-
Singsing wan singsing abaot fasin blong stap kaen olsem “Kindness Begins with Me” (Children’s Songbook,145). ?Wanem nao singsing ia i tijim yumi abaot fasin blong stap kaen?
-
Blong helpem ol pikinini blong andastanem wanem i minim blong “no stap kros kwik” (Ol Proveb 15:18), talem wan stori blong yu abaot taem we yu (o wan man we yu save) i filim kros be i bin jusum blong stap kaen. Letem ol pikinini tu oli serem ol eksperiens blong olgetawan. Helpem ol pikinini blong tingting long ol samting we oli save mekem bitim we blong stap kroskros. Eksampol. Oli save tingbaot Jisas, askem Papa long Heven blong helpem olgeta, singsing long wan singsing blong Praemeri long olgetawan o sapos i posibol, kamaot mo wokbaot i go longwe.
Mi save serem ol samting we mi gat wetem ol narafalawan.
Ol smosmol pikinini oli save helpem ol pipol we oli stap raon long olgeta we oli gat nid. ?Olsem wanem yu save givim insperesen long olgeta blong serem wanem we oli gat wetem ol narawan?
Samfala Aktiviti we Yu Save Mekem
-
Soem long ol pikinini sam long ol pikja blong ol narafala man we oli stap givim seves o stap helpem ol pipol we oli gat nid, mo tu, soem sam pikja blong Sevya (olsem long Gospel Art Buk, ol namba 42, 44,46). Askem ol pikinini blong talem long yu wanem nao i stap hapen long wanwan pikja. Ridim long ol pikinini Ol Proveb 22:9. Eksplenem long olgeta se, wan wei blong givim seves i blong stap givim “bred long ol pua man,” be i gat plante moa wei blong helpem olgeta we oli stap long nid. Invaetem ol pikinini blong dro wan pikja blong olgetawan we oli stap helpem wan narafala man.
-
Karem i kam long klas, sam samting we yu save serem wetem ol pikinini, olsem ol pikja o ol kala pensel. Taem yu givim wan long wanwan pikinini, bae yu stap talem “Bae mi serem wetem [mo talem nem blong pikinini ia we yu stap givim samting long hem].” Letem blong wanwan long ol pikinini oli gat taem blong serem ol samting ia wetem wan narawan. ?Wanem sam nara samting we yumi save serem wetem ol narafala man?
-
Singsing tugeta wan singsing abaot seves, olsem “‘Give,’ Said the Little Stream” (Children’s Songbook,236). O soem vidio ia blong “Gordon Hinckley: Lessons I Learned as a Boy” (ChurchofJesusChrist.org). Askem ol pikinini, olsem wanem oli filim taem oli helpem ol narafala man.
Tijim Doktrin: Ol Bigfala Pikinini
Ol Proveb 1:7; 2:5; 15:33; 16:6; Prija 12:13
Blong “fraet long God” i minim se, blong stap lavem mo obei long Hem.
Wan long ol impoten mesej long Ol Proveb mo Prija i blong “fraet long God, mo obei ol komanmen blong hem” (Prija 12:13). Tingting long wei we bae yu helpem ol pikinini blong oli andastanem se i minim wanem blong fraet long God.
Samfala Aktiviti we Yu Save Mekem
-
Invaetem ol pikinini blong raetemdaon wan lis blong sam samting we ol pipol oli stap fraet long hem. Afta, askem olgeta blong ridim Ol Proveb 1:7 mo Prija 12:13. ?I minim wanem blong fraet long God? Blong helpem olgeta ansarem kwestin ia, askem wan pikinini blong ridim ves ia bakegen, mo karemaot toktok ia “fraet” mo putum “respek.” Ripitim aktiviti ia wetem ol toktok olsem,“lav,” “fasin blong stap obei,” o “obei.” ?Olsem wanem hemia i jenisim tingting blong yumi, long wanem i minim blong fraet long God?
-
Invaetem wanwan pikinini blong jusum wan long olgeta ves ia blong ridim, mo stap lukaotem toktok ia “fraet”: Ol Proveb 1:7; 2:5; 15:33; 16:6. Askem ol pikinini blong serem wanem ol ves blong olgeta i stap tijim abaot ol blesing we i kam taem yumi fraet long Lod, we i minim se yumi soem fasin blong stap kwaet mo respek long Hem (luk tu long Ol Proveb 14:26–27). ?Olsem wanem nao yumi soem long Lod se yumi lavem Hem mo respektem Hem?
“Yu mas trastem Hae God long olgeta tingting [hat] blong yu.”
-
Ridim tugeta Ol Proveb 3:5–7, mo invaetem ol pikinini blong listimdaon ol samting we ol ves ia oli tokbaot, we bae yumi mas mekem mo no mas mekem. Askem olgeta, wanem oli filim abaot wanwan long olgeta samting ia se, i minim wanem. ?Wanem ol kwaliti we yumi save luk long ol pipol we yumi trastem? ?Wanem nao ol kwaliti we Lod i gat, we i helpem yumi blong trastem Hem?
-
Blong soem wanem i minim blong, “I nogud yu ting se save ya blong yu naoia, hem i naf blong givhan long yu,” askem ol pikinini blong , traem mekem wan pis wud o wan pensel i lei long ol defdefren samting, olsem wan buk o wan pis pepa. ?Wijwan samting nao i wok gud? ?From wanem hem i impoten blong “trastem Lod” mo blong no ting se save blong yu ya blong naoia, hem i naf blong givhan long yu”?
“Spos yu toktok gud long wan man we i kros, bambae yu save mekem tingting blong hem i kam kwaet.”
Blong stap toktok strong wetem kros, oltaem i krietem wan situesen we i had mo i save go moa wos. Ol ves ia i tijim se ol toktok blong yumi mo ol fasin blong yumi i save karemaot fasin blong stap kros.
Samfala Aktiviti we Yu Save Mekem
-
Raetem ol toktok ia kros mo traehad long bod mo tokbaot wan eksampol blong wan raorao we oli pikinini oli stap fesem. Afta, askem ol pikinini blong ridim Ol Proveb 15:1,18; 16:32 mo lukaotem advaes we oli save givim long ol pikinini we oli stap raorao. Wanwan taem we ol pikinini bae oli serem ol aedia, invaetem olgeta blong ravemaot pat blong ol toktok long bod. Invaetem olgeta blong karemaot ol toktok ia wetem olgeta we i tokbaot ol fasin olsem hemia blong Kraes, we i karem pis i kam.
-
Helpem ol pikinini blong tingting long stori long ol skripja, taem we Sevya i givim eksampol blong wanem oli tijim long Ol Proveb 15:1,18; 16:32. Blong kasem ol aedia, oli save lukluk insaed long Jon 8:1–11; 18:1–11. Singsing tugeta wan singsing abaot eksampol blong Sevya, olsem “Mi Traem blong Kam Olsem Jisas” (Liahona, Epril 2012, 64). ?Long wanem wei nao bae yumi folem eksampol blong Jisas taem yumi stap kam go tugeta wetem ol memba blong famli, ol fren mo ol narawan?
Stap Leftemap Tingting blong Lanem Samting long Hom
Helpem ol pikinini blong jusum wan ves we oli ridim long klas we oli bin laekem. Leftemap tingting blong olgeta blong serem wetem ol famli blong olgeta mo talemaot long famli blong olgeta wanem we oli lanem aot long ves ia.
Stap Kam Antap long Fasin blong Yumi blong Stap Tij
Kam antap olsem wan tija we i olsem Kraes. Tingting hevi long ol wei we yu save kam antap long saed blong fasin blong save helpem ol pikinini, blong bildimap fet blong olgeta long Papa long Heven mo Jisas Kraes. Ol kwestin blong evaluesen blong wanwan man i stap long pej37 blong Teaching in the Savior’s Way i save help.