“5–11 Septemba. Aesea 1–12: ‘Hae God I God blong Mi, mo Hem I Stap Sevem Mi,’” Kam Folem Mi—Blong Praemeri: OlTesteman 2022 (2021)
“5–11 Septemba. Aesea 1–12,” Kam Folem Mi—Blong Praemeri: 2022
Profet Aesea I Tokbaot Finis Taem Kraes Bae I Bon, i kam long Harry Anderson
5–11 Septemba
Aesea 1–12
“Hae God I God blong Mi, mo Hem I Stap Sevem Mi”
Ol toktok blong Aesea i had blong man i andastanem. Taem yu stap tingting long olsem wanem blong tij abaot Aesea, lukluk nomo long ol trutok we i simpol, we i save mekem fet blong olgeta i kam strong moa long Jisas Kraes.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Invaetem ol pikinini blong serem wan samting we oli mekem i no longtaem i pas, we i blong laef folem gospel, olsem blong talem wan prea, soem fasin blong stap kaen long wan narafala man o blong stap obei long ol narafala komanmen.
Tijim Doktrin: Ol Smol Pikinini
Insaed long tempol yumi lanem abaot Jisas Kraes.
Aesea i tokbaot finis taem ia we tempol, “hil ya we haos blong mi i stap long hem,” bae i pulum tingting blong pipol aot long “evri nesen.” Yu save yusum profesi ia, blong helpem ol pikinini blong oli lukluk fored long taem we oli save go long tempol.
Samfala Aktiviti we Yu Save Mekem
-
Askem ol pikinini blong droem hom blong olgeta. Afta, ridim tugeta Aesea 2:2, mo invaetem olgeta blong droem wan pikja blong “haos blong Lod,” we hem i wan tempol. Ridim ves3 tugeta, mo invaetem olgeta blong ademap long ol pikja blong olgeta, plante pipol we oli stap kam long tempol, mo gat tu, ol famli blong olgeta. ?From wanem yumi wantem go long haos blong Lod? Serem testemoni blong yu abaot ol blesing we i kam, taem yumi stap lanem abaot Lod insaed long haos blong Hem.
-
Askem wan pikinini blong holem mo soem wan pikja blong tempol, mo askem ol pikinini, wanem nao oli luk long pikja ia. Askem olgeta, wanem nao oli laekem abaot tempol. Ridim tugeta Aesea 2:2–3 mo talem long olgeta blong lisin long sam moa risen, from wanem yumi save lavem tempol. Talem long ol pikinini, from wanem yu lavem tempol.
-
Singsing wetem ol pikinini, wan singsing abaot tempol, olsem “I Love to See the Temple” (Children’s Songbook,95). Helpem olgeta blong faenem ol toktok mo ol sentens insaed long singsing ia, we i tijim, wanem i wan tempol mo wanem yumi stap mekem long tempol.
-
Droem wan rod antap long bod, mo putum wan pikja blong tempol o Sevya long wan en (luk long Divelopmen blong Yuwan: Gaedbuk blong Ol Pikinini, 2–3). Letem ol pikinini oli gat taem blong go, wan afta wan, blong stap droem olgetawan, taem oli stap wokbaot long rod ia. Taem oli stap mekem, invaetem olgeta blong ripitim sentens ia long Aesea 2:3: “Bambae yumi save folem ol rod we hem i jusumaot.” ?Wanem nao yumi save mekem blong folem rod we Lod i jusum?
“!Wan pikinini boe bambae i bon long mifala! !Pikinini ya bambae yu yu givim long mifala, ” (Aesea 9:6).
Aesea i bin profesae long saed blong Jisas Kraes.
Evri profet oli testifae abaot Jisas Kraes, i gat tu, olgeta we oli bin laef bifo Hem i bon, olsem Aesea. Tingting long wanem ol pikinini oli save lanem abaot Jisas aot long profesi blong Aesea long Aesea 9:6.
Samfala Aktiviti we Yu Save Mekem
-
Serem wetem ol pikinini “Isaiah the Prophet” (insaed long Old Testament Stories). Stop wanwan taem, blong mekem se ol pikinini oli save tokbaot wanem Aesea i bin save abaot Jisas Kraes plante yia bifo Hem i bon. Ridim long ol pikinini Aesea 9:6, mo invaetem olgeta blong ripitim wetem yu wanwan “taetol nem” we Aesea i bin talem we “bambae oli singaot hem,” Jisas Kraes, long hem.
-
Raetem long ol pis pepa sam long ol taetol ia blong Jisas Kraes, we i stap long Aesea 9:6 (luk long aktiviti pej blong wik ia). Invaetem wanwan pikinini blong jusum wan pis pepa, mo helpem pikinini ia blong ridim taetol ia long klas. Tokbaot wetem ol pikinini, abaot wanem mining blong taetol ia long yu. Givim wan pikja blong Kraes long wan long ol pikinini, mo askem hem blong serem wan samting abaot Jisas mo afta, pasem pikja i go long wan narafala pikinini. Ripitim aktiviti ia kasem taem we evri pikinini oli gat janis blong mekem.
Tijim Doktrin: Ol Bigfala Pikinini
From Jisas Kraes, mi save sakem sin mo kam klin.
Aesea i bin laef long wan taem we plante pipol oli tanem olgeta longwe long Lod. Be Lod i promesem olgeta se bae Hem i fogivim ol sin blong olgeta, sapos nomo oli sakem sin. Hem i mekem promes ia tu wetem yumi.
Samfala Aktiviti we Yu Save Mekem
-
Askem ol pikinini blong ridim Aesea 1:2–4 mo tokbaot sam long ol risen, we i mekem se Lod i no glad wetem ol pipol blong Juda. Afta, ridim Aesea 1:16–19 tugeta mo lanem wanem we Lod i invaetem ol pipol blong mekem. Helpem ol pikinini blong andastanem ol had toktok mo ol sentens, taem oli nidim. Blong helpem olgeta blong luksave ves18, soem wan kala red we i braet wan samting we i waet gud. ?Wanem nao yumi lanem abaot sore blong Jisas, aot long ol ves ia? Invaetem ol pikinini blong serem, olsem wanem nao oli stap filim abaot presen blong fogivnes we i blong Jisas Kraes, mo serem ol filing blong yu tu.
-
Helpem ol pikinini blong lanem baehat Aesea 1:18. Raetem ves ia long bod, mo invaetem ol pikinini blong ripitim laod tugeta wanwan taem, mo stap ravemaot wan toktok wanwan taem kasem taem we oli save talem baehat. Yu save yusum tu pis blong pepa mo raetem ol toktok we i stap long ves ia long hem. ?From wanem oltaem i impoten blong tingbaot wanem ves ia i stap tijim? Toktokraon long olsem wanem taem yumi kasem baptaes mo blong stap tekpat long sakramen, i mekem se promes ia i save kam long yumi.
Insaed long tempol, yumi lanem abaot Jisas Kraes.
Profesi blong Aesea abaot “hil ya we haos blong mi[Lod] i stap long hem” i talemaot sam long ol blesing we i kam taem yumi stap wosip insaed long tempol, folem wetem ol blesing we i kam long ol las dei. Tingting hevi long olsem wanem bae yu givim insperesen long ol pikinini blong lukaotem ol blesing ia.
Samfala Aktiviti we Yu Save Mekem
-
Askem ol pikinini blong ridim wanem we Aesea i bin luk long Aesea 2:2–3 mo droem wan pikja blong wanem oli ting se Aesea i bin luk. Eksplenem se Aesea i singaotem tempol “hil ya we haos blong mi[Lod] i stap long hem.” ?From wanem nao bigfala hil hem i wan gudfala saen blong tempol?
-
Invaetem ol pikinini blong ridim Aesea 2:2–3,5 mo jusum long wanwan ves ia, wan samting we i givim insperesen long olgeta blong go long tempol wan dei. Afta, ridim ves4 tugeta, mo toktokraon long olsem wanem tempol i help blong karem i kam pis, we ves ia i stap tokbaot. Helpem olgeta blong tingting long ol wei we oli save rere naoia blong go long tempol wan dei.
Aesea i profesae abaot Jisas Kraes.
Aesea i profesae long taem we wan pikinini bae i bon mo bae i sidaon long jea blong king Deved mo bildimap wan kingdom we i no gat en. ?Olsem wanem nao yu save helpem ol pikinini we yu tijim, blong andastanem ol profesi ia abaot Jisas Kraes?
Samfala Aktiviti we Yu Save Mekem
-
Askem o pikinini blong givim ol eksampol blong ol taetol nem we wan man i save gat, olsem ol taetol blong wan wokman long ples blong wok, long wan koling, long wan tim o long wan famli. ?Wanem nao ol taetol ia oli talem abaot man ia we i kasem? Helpem ol pikinini blong lukaotem ol taetol nem we Jisas Kraes i gat, insaed long Aesea 7:14 mo 9:6–7. ?Wanem nao wanwan long ol taetol nem ia i tijim yumi abaot Hem? ?Wanem bakegen nao yumi lanem abaot Jisas Kraes aot long ol ves ia?
-
Ridim tugeta Matiu 1:21–23 mo Luk 1:31–33, mo toktokraon long olsem wanem ol profesi blong Aesea, insaed long Aesea 7:14; 9:6–7 oli bin hapen, taem Jisas Kraes i bin bon.
Stap Leftemap Tingting blong Lanem Samting long Hom
Askem ol pikinini blong tingting long wan samting we oli bin lanem. abaot Sevya, we oli save serem long hom wetem famli blong olgeta, olsem wan long ol taetol nem blong Jisas Kraes.
Stap Kam Antap long Fasin blong Yumi blong Stap Tij
Helpem ol pikinini blong bildimap tras long olgetawan. Sam pikinini bae oli filim se oli no gat paoa blong lanem gospel olgetawan. Wan wei blong bildimap tras blong olgetawan i blong presem olgeta taem oli tekpat insaed long klas. Promesem long ol pikinini se bae Tabu Spirit i helpem olgeta taem oli stap lanem samting.