“22–28 Ogis. Ol Sam 102–103; 110; 116–119; 127–128; 135–139; 146–150; ‘Olgeta Samting We I Gat Laef, Evriwan I Mas Presem Hem,’” Kam Folem Mi—Blong Praemeri: OlTesteman 2022 (2021)
“22–28 Ogis. Ol Sam 102–103; 110; 116–119; 127–128; 135–139; 146–150,” Kam Folem Mi—Blong Praemeri: 2022
Evri Ni Bae I Bodaon, i kam long J. Kirk Richards
22–28 Ogis
Ol Sam 102–103; 110; 116–119; 127–128; 135–139; 146–150
“Olgeta Samting We I Gat Laef, Evriwan I Mas Presem Hem”
Sapos yu nidim sam moa aedia taem yu stap rere blong tij, luk long “Ol Sam Moa Risos blong Stap Tijim Ol Pikinini” mo luk long “Stap Lukluk long Ol Nid blong Ol Smol Pikinini” long stat blong buk ia.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem pikja long aotlaen blong wik ia insaed long Kam Folem Mi—Blong Wanwan Man, Woman mo Famli, mo invaetem ol pikinini blong tokbaot wanem we oli luk long ol pikja ia. Helpem olgeta blong luk ol koneksen bitwin ol pikja ia mo wanem we oli stap lanem insaed long buk blong Ol Sam .
Tijim Doktrin: Ol Smol Pikinini
Tok blong God i olsem wan laet.
Ol pikinini we yu tijim, oli stap long rod blong gobak long Papa long Heven. Tok blong God i save helpem olgeta blong stap long rod ia naoia mo truaot long laef blong olgeta.
Samfala Aktiviti we Yu Save Mekem
-
Soem pikja blong ol samting we oli tokbaot insaed long Ol Sam 119:105, mo invaetem ol pikinini blong putum ol pikja ia long oda taem yu stap ridim ol ves ia. Askem ol pikinini blong ripitim wetem yu ol sentens long ol ves, taem yu poenem ol pikja.
-
Invaetem ol pikinini blong tokbaot olsem wanem oli filim taem oli stap long tudak. ?Wanem sam long ol samting we oli had blong mekem taem ples i tudak? Yu save invaetem wan pikinini blong traem blong sarem ae mo mekem wan samting olsem blong droem wan pikja. ?From wanem ol samting ia oli isi blong mekem taem i gat laet? ?Helpem ol pikinini blong andastanem olsem wanem toktok blong God, olsem we i stap long ol skripja, mo ol toktok blong ol profet we oli stap laef, i saenem rod blong yumi blong gobak long Papa long Heven.
Papa long Heven mo Jisas Kraes, Tufala i save mi mo lavem mi.
Truaot long laef blong yumi, i nidim blong oli stap talem long yumi blong tingbaot se Papa long Heven mo Jisas Kraes, Tufala i save yumi wanwan. Ol Sam 139 i save helpem yu tijim ol pikinini se Tufala i save olgeta mo lavem olgeta.
Samfala Aktiviti we Yu Save Mekem
-
Mekem ol sot lis blong ol samting we yu save abaot wanwan pikinini. Taem yu ridim ol lis ia wan afta narawan, askem ol pikinini blong talemaot huia nao yu stap tokbaot ia. Ridim Ol Sam 139:1–3, mo helpem ol pikinini blong andastanem ol toktok we maet oli no save. Testifae se Papa long Heven mo Jisas Kraes, Tufala i save gud olgeta—Tufala i save ol nem blong olgeta, wanem i stap mekem olgeta i glad mo harem nogud, mo ol samting we oli save gud olsem wanem blong mekem.
-
Ridim Ol Sam 139:23, mo invaetem ol pikinini blong putum han blong olgeta long hat blong olgeta taem bae yu talem “hat” mo blong tajem hed blong olgeta taem bae yu talem “ol tingting.” Serem wan taem we yu bin filim se God i save hat mo ol tingting blong yu.
Mi save presem Lod.
Blong presem God i minim blong soemaot tangkyu blong yumi mo lav blong yumi long Hem. Helpem ol pikinini blong oli lanem se yumi stap presem Hem taem yumi mekem ol samting olsem singsing, prea mo stap obei ol tijing blong Hem.
Samfala Aktiviti we Yu Save Mekem
-
Invaetem ol pikinini blong oli serem ol eksperiens taem we wan man i presem olgeta o bin talem long olgeta se oli bin mekem wan gudfala wok. Serem samfala gud samting aot long Ol Sam 146:6–9 we Lod i bin mekem mo invaetem ol pikinini blong tokbaot ol narafala samting we Hem i bin mekem from yumi. Helpem olgeta blong tingbaot ol wei we oli save presem Hem from ol samting ia.
-
Tugeta singsing wan singsing olsem: “Beauty Everywhere” (Children’s Songbook, 232). Eksplenem se long taem blong ol laen blong Isrel bifo, Ol Sam oli olsem ol singsing we yumi stap singsing long olgeta tedei blong wosipim mo presem God.
Stap Tijim Doktrin: Ol Bigfala Pikinini
Lod i givim long mi kamfot mo hop.
God i save ol tes blong laef blong mi mo ol harem nogud mo Hem i wantem kamfotem mo leftemap tingting blong yumi. Helpem ol pikinini blong bildim fet long Hem long ol taem blong nid.
Hiling, i kam long J. Kirk Richards
Samfala Aktiviti we Yu Save Mekem
-
Askem wan long ol pikinini blong ridim Ol Sam 102:1–2. ?Olsem wanem Lod i save helpem yumi long ol taem blong trabol blong yumi? ?Olsem wanem nao yumi askem Hem blong helpem yumi? Serem wan eksperiens we yu bin filim se God i bin harem ol prea blong yu taem yu bin stap long nid mo invaetem ol pikinini blong serem ol eksperiens mo testemoni blong olgeta.
-
Invaetem ol pikinini blong faenem ol toktok blong kamfot mo hop insaed long Ol Sam 103. ?Olsem wanem nao, ol toktok ia i helpem ol pipol blong fesem ol jalenj? Leftemap tingting blong ol pikinini blong raetemdaon ol sentens we oli faenem we i gat plante mining blong stap rimaenem olgeta se Lod i save helpem olgeta taem oli gat ol tes long laef blong olgeta.
Ol toktok blong God oli helpem mi blong folem rod blong Hem.
I nomata se wol i tudak long wanwan taem, toktok blong God i save saenem rod blong yumi mo helpem yumi blong gobak long Hem.
Samfala Aktiviti we Yu Save Mekem
-
Droem long bod wan pikja blong wan laet (olsem wan hariken laet) mo wan pikja blong ol skripja. Invaetem ol pikinini blong ridim Ol Sam 119:105. ?Olsem wanem laet ia i helpem yumi? ?Olsem wanem nao tok blong God i helpem yumi? Askem ol pikinini blong raetem ol ansa blong olgeta long bod narasaed long ol pikja. ?Olsem wanem nao toktok blong God i wan laet? ?Olsem wanem nao hemia i helpem yumi blong stap long rod we i lidim yumi blong gobak long Papa long Heven?
-
Mekem ol pikinini oli sidaon tutu, mo givim long wanwan grup ol skripja sentens ia: Ol Sam 119:47–48; Ol Sam 119:105; 1 Nifae 1:25; 2 Nifae 31:20. Invaetem olgeta blong ridim ol sentens mo lukaotem wanem we Papa long Heven i bin givim long yumi blong helpem yumi blong stap long rod ia blong gobak long Hem. Invaetem ol pikinini blong tingting hevi mo serem wanem oli filim we i kam long insperesen blong mekem from wanem we oli bin lanem.
-
Tugeta, singsing wan singsing abaot stap folem rod blong God olsem: “Bae Mi Wokbaot Wetem Jisas” (ChurchofJesusChrist.org). ?Wanem nao yumi lanem aot long singsing ia abaot olsem wanem blong stap long raet rod?
Papa long Heven mo Jisas Kraes oli save helpem mi blong save olsem wanem blong kam moa gud.
Ol Sam 139 i tijim se God i save evri samting abaot yumi, mo tu, ol paoa mo ol samting we yumi no strong long olgeta. Sapos yumi lukluk long Hem, Hem i save tijim yumi wanem we yumi nidim blong mekem blong kam moa olsem Hem.
Samfala Aktiviti we Yu Save Mekem
-
Raetem ol toktok blong Ol Sam 139:23–24 long bod mo invaetem ol pikinini blong putum wan laen andanit long ol toktok we i tokbaot ol samting we God i save mekem blong yumi. ?From wanem yumi wantem God blong mekem ol samting ia? ?Olsem wanem nao yumi save invaetem Hem blong “lidim [yumi] long rod we i blong oltaem we i nogat en”?
-
Leftemap tingting blong ol pikinini blong “lukluk” long laef blong olgetawan from ol wei we oli save kam antap gud long olgeta fofala eria blong lukluk long hem insaed long program blong Ol Pikinini mo Ol Yut—long saed blong spirit, sosol, long saed blong bodi mo long waes tingting. Mekem olgeta oli tingbaot se Lod i save olsem wanem oli save kam antap gud long wanwan eria ia, mo leftemap tingting blong olgeta blong lukaotem Hem blong lidim rod blong olgeta.
-
Singsing wan singsing abaot olsem wanem Papa long Heven i save helpem yumi blong kam antap gud, olsem hemia long seken ves blong “Help Me, Dear Father” (Children’s Songbook, 99). Serem olsem wanem Papa long Heven mo Jisas Kraes i bin helpem yu blong kam antap gud.
Stap Leftemap Tingting blong Lanem Samting long Hom
Wanwan taem yu save invaetem wan memba blong famli blong serem wetem klas wanem oli stap mekem blong lanem gospel long hom. Invaetem ol narawan we oli stap blong serem ol aedia ia wetem ol famli blong olgeta.
Stap Kam Antap long Fasin blong Yumi blong Stap Tij
Yusum miusik. Ol praemeri singsing mo ol hym oli save helpem olgeta blong andastanem mo tekem ol trutok blong gospel oli kam pat blong laef blong olgeta long wan memori wei. Singsing tu i save kipim ol pikinini oli stap bisi blong stap lanem samting. (Luk long Teaching in the Savior’s Way, 22.)