“8–14 Ogis. Ol Sam 1–2; 8; 19–33; 40; 46: ‘Hae God I Stap Lukaot Gud long Mi Olsem We Mi Mi Sipsip blong Hem,’” Kam Folem Mi—Blong Praemeri: OlTesteman 2022 (2021)
“8–14 Ogis. Ol Sam 1–2; 8; 19–33; 40; 46,” Kam Folem Mi—Blong Praemeri: OlTesteman 2022
Hae God I Stap Lukaot Gud long Mi Olsem We Mi Mi Sipsip blong Hem, i kam long Yongsung Kim, havenlight.com
8–14 Ogis
Ol Sam 1–2; 8; 19–33; 40; 46
“Hae God I Stap Lukaot Gud long Mi Olsem We Mi Mi Sipsip blong Hem”
Aotlaen ia i stap talem se sam naesfala sentens long Ol Sam we bae i blesem ol pikinini, be no filim se aotlaen ia i limit ia nao. Folem wanem we Spirit i lidim yu blong mekem.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Wan dei bifo, invaetem sam pikinini blong karem i kam long klas ol droing we oli ripresentem ol samting we olgeta mo famli blong olgeta oli bin ridim long Ol Sam long wik ia (luk long Ol Sam 23:1), wan kap (luk long Ol Sam 23:5), o wan hat (luk long Ol Sam 24:4). Invaetem olgeta blong tokbaot ol droing blong olgeta, mo wan ves long Ol Sam we i tokbaot olgeta.
Tijim Doktrin: Ol Smol Pikinini
“Oltaem skae i stap soemaot bigfala paoa blong God.”
Ol Sam 19 mo 33 oli tijim se yumi save faenem pruf blong bigfala paoa mo ol gudgudfala samting blong God we oli stap raonem yumi long naesfala kriesen blong Hem. Helpem ol pikinini blong oli luk han blong God long wol raon long olgeta.
Samfala Aktiviti we Yu Save Mekem
-
Soem long ol pikinini sam pikja blong ol naesfala samting we God i bin krietem, o tugeta, lukluk tru long windo blong luk ol samting ia. Askem ol pikinini wanem oli laekem tumas abaot ol kriesen blong Papa long Heven. Ridim wan long tufala skripja ia Ol Sam 19:1 o 33:5, mo askem ol pikinini wanem oli filim taem oli luk ol kriesen blong Hem.
-
Singsing tugeta wan singsing abaot ol kriesen blong God olsem: “The World Is So Lovely” (Children’s Songbook, 233). Invaetem ol pikinini blong pikimap wan samting we God i krietem (olsem wan samting we oli tokbaot insaed long singsing ia) mo droem wan pikja blong hem blong serem wetem famli blong olgeta.
“Hae God I Stap Lukaot Gud long Mi Olsem We Mi Mi Sipsip blong Hem.”
Sapos ol pikinini oli save lanem samting long yangfala yia se God i stap lukaot gud long olgeta olsem we olgeta oli sipsip blong Hem, bae i isi blong oli folem Hem “long rod blong stap stret mo gud.”
Samfala Aktiviti we Yu Save Mekem
-
Givim long wanwan pikinini aktiviti pej blong wik ia, o givim long olgeta wanwan, wan pikja aot long aktiviti pej. Invaetem olgeta blong lisin taem yu ridim Ol Sam 23. Askem olgeta blong poen i go long, o leftemap wan pikja taem oli harem oli tokbaot long Sam ia. Talem testemoni blong yu se Jisas i stap kea long yumi semmak olsem man blong lukaot sipsip i stap kea long sipsip blong hem.
-
Talem long ol pikinini samfala wei we yu save se Sevya i lavem yu. Invaetem ol pikinini blong stanap wanwan taem blong serem samfala wei we oli save se Jisas i lavem olgeta. Singsing tugeta wan singsing we i save givim sam aedia long olgeta olsem hemia: “I Feel My Savior’s Love” (Children’s Songbook, 74–75).
Jisas Kraes i save tanem harem nogud i go long glad.
Tingting hevi long olsem wanem bae yu helpem ol pikinini blong kasem witnes blong olgetawan long glad ia we Jisas i givim long yumi taem yumi harem nogud.
Samfala Aktiviti we Yu Save Mekem
-
Invaetem ol pikinini blong mekem olsem se oli stap krae taem yu stap ridim Ol Sam 30:5, “Long naet, maet man i save harem nogud i krae.” Mo askem olgeta blong gat plante glad taem yu ridim, “Be long moning i save harem gud, i glad bakegen.” Ripitim ol sentens ia moa long wan taem, mo testifae long ol pikinini se, from Jisas Kraes, ol harem nogud we yumi stap filim long laef ia yumi save riplesem wetem glad.
-
Soem wan pikja blong Sevya, mo talem long ol pikinini sam long ol samting we Hem i bin mekem blong yu we i givim glad long yu. Givim long wanwan pikinini wan janis blong holem wan pikja mo serem wanem Jisas i bin mekem we i givim glad long olgeta.
Stap Tijim Doktrin: Ol Bigfala Pikinini
Lod i givim long mi, pis, paoa mo i soem rod long mi.
Plante long Ol Sam oli testifae long ol blesing blong Lod long laef blong yumi. Yu save yusum Ol Sam blong helpem ol pikinini blong lanem blong trastem Hem mo tanem olgeta i go long Hem.
Samfala Aktiviti we Yu Save Mekem
-
Raetem long bod Lod i . Letem ol pikinini oli jusum wan o moa long ol skripja we i stap ia blong ridim: Ol Sam 23:1; 27:1; 28:1; 28:7; 32:7; 46:1. Askem olgeta blong komplitim sentens ia long bod mo stap yusum wanem oli lanem aot long ol skripja. Helpem ol pikinini blong toktokraon long wanem ol saen ia oli tijim yumi abaot Lod.
-
Soem wan pikja blong wan smol sipsip. Askem long olgeta sam samting we wan smol sipsip i nidim blong stap sef mo helti mo leftemap tingting blong olgeta blong luk insaed long Ol Sam 23:1–4 blong ol aedia. Afta soem wan pikja blong wan pikinini. ?Wanem nao yumi nid blong stap sef mo helti long saed blong spirit? Ridim tugeta Ol Sam 23, mo askem ol pikinini olsem wanem ol samting we man blong lukaot long sipsip i mekem insaed long ol sam, we i save semmak long wanem we Jisas Kraes i mekem blong yumi.
Yumi mas stap klin long saed blong spirit mo klin inaf blong go insaed long ples we Lod i stap long hem.
Blong go insaed long tempol yumi nidim “klin han, mo wan klin hat.”
Taem we ol pikinini oli stap lukluk fored blong go insaed long tempol wan dei, helpem olgeta blong andastanem se oli save rere taem oli stap kam klin long saed blong spirit tru long Atonmen blong Sevya.
Samfala Aktiviti we Yu Save Mekem
-
Soem wan pikja blong tempol long ol pikinini. Invaetem olgeta blong ridim Ol Sam 24:3 mo faenem ol toktok we oli mekem olgeta oli tingbaot tempol. Afta, tugeta, ridim ves 4 blong lanem huia i save go insaed long tempol (talem mining blong ol toktok we oli no stap harem bifo). ?Olsem wanem nao han blong yumi i kasem doti long saed blong bodi? ?Olsem wanem han mo hat blong yumi oli kasem doti long saed blong spirit? ?Olsem wanem nao yumi save klinim han blong bodi blong yumi? ?Olsem wanem nao Sevya i helpem yumi blong klinim ol han mo hat blong yumi long saed blong spirit? (Sapos i help bigwan, eksplenem se “han” long ves ia i ripresentem ol aksen blong yumi mo “hat” i save ripresentem ol samting we hat blong yumi i wantem.)
-
Lukluk tru long ol samting we wan i nidim blong kasem wan tempol rekomen (luk long Russell M. Nelson, “Las Toktok,” Liahona, Nov. 2019, 120–22; o invaetem wan memba long bisoprik blong toktok raon long ol samting ia wetem klas). Invaetem ol pikinini blong oli jusum wan samting we oli filim tru long insperesen blong mekem olgeta oli rere blong stap klin inaf blong go insaed long tempol.
“Stap kwaet mo save se, Mi, Mi God.”
Blong stap tekem taem blong stap revren mo kwaet, i nomata long ol samting we oli stap bisi raon long yumi, i save helpem yumi blong bildimap ol testemoni blong yumi se God i stap laef.
Samfala Aktiviti we Yu Save Mekem
-
Helpem ol pikinini blong lanem baehat fasfala laen aot long Ol Sam 46:10: “Stap kwaet mo save se, Mi, Mi God.” Toktok long olgeta abaot mining blong “stap kwaet,” tugeta long saed blong bodi mo tingting. Serem, wetem ol pikinini, wan eksperiens blong wan taem we “stap kwaet” i givim paoa long testemoni blong yu long Papa long Heven. Askem ol pikinini blong serem eni eksperiens we oli bin gat. ?From wanem blong stap kwaet i impoten wei ia blong save se God i stap laef?
-
Invaetem ol pikinini blong luklukbak wetem yu wanem oli mekem long wan dei olsem. Helpem olgeta blong tingting long ol taem ia long dei blong olgeta taem oli traem blong “stap kwaet” mo filim kolosap long Papa long Heven. Leftemap tingting blong olgeta blong putum wan gol blong yusum ol kaen taem ia long wik we i stap kam blong mekem testemoni blong olgeta i kam strong long Papa long Heven.
-
Invaetem ol pikinini blong mekem lis blong sam samting we yumi save mekem blong save blong yumiwan se Papa long Heven i ril, mo we Hem i lavem yumi. Invaetem olgeta blong jusum wan samting aot long lis blong olgeta we oli wantem mekem.
Stap Leftemap Tingting blong Lanem Samting long Hom
Invaetem ol pikinini blong jusum wan ves we oli laekem long Ol Sam we oli bin tokbaot tedei. Leftemap tingting blong olgeta blong serem ves ia wetem wan memba blong famli o wan fren.
Kam Antap long Fasin blong Yumi blong Stap Tij
Lukluk nomo long ol nid blong ol pikinini. Olsem wan tija, yu stap long wan posisen we i spesel blong andastanem ol nid blong olgeta we yu tijim. Eksperiens blong yu, mo o samting we yu save abaot ol pikinini, mo wanem we Spirit bae i soem long yu bae i helpem yu save wanem aktiviti blong stap lanem samting bae i save bildimap fet blong olgeta long Papa long Heven mo long Jisas Kraes.