Sevem Hemia we I Bin Lus, i kam long Michael T. Malm

15–21 Ogis

Ol Sam 49–51; 61–66; 69–72; 77–78; 85–86

“Bambae Mi Talemaot long Yufala Ol Samting Ia We Hem I Mekem long Mi”

Eksampol blong yu, olsem wan man o woman we i stap lanem gospel, i save i mekem bigfala jenis long laef blong ol pikinini. Serem long olgeta ol eksperiens blong yu long saed blong spirit, abaot taem ia we yu stap lanem gospel.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Serem wetem ol pikinini wan ves aot long Ol Sam, long wan hym o singsing blong ol pikinini we i helpem yu blong filim lav blong Sevya. Givim wan pis pepa long wanwan pikinini.

Tijim Doktrin: Ol Smol Pikinini

Ol Sam 51:10

Taem mi mekem wan rong joes, Jisas Kraes i save helpem mi blong jenis.

Helpem ol pikinini blong andastanem se ol mistek oli pat blong laef long wol ia, mo we yumi kasem help long Jisas Kraes blong winim olgeta.

Samfala Aktiviti we Yu Save Mekem

• Serem wan simpol stori, aot long laef blong yu o insaed long Fren o Liahona, abaot wan pikinini we i mekem wan rong joes be i kasem help tru long Sevya blong kam moa gud (eksampol, wajem vidio ia: “The Shiny Bicycle” long ChurchofJesusChrist.org). Ridim Ol Sam 51:10, mo serem glad ia we yu filim taem Sevya i stap helpem yu gat “wan klin hat” mo “wan spirit we i raet.”

• Soem long ol pikinini aktiviti pej blong wik ia. Poenem wanwan pikja, mo askem ol pikinini blong tokbaot wanem oli luk. Ridim ol toktok long pikja blong helpem ol pikinini blong lanem abaot fasin blong sakem sin mo fogivnes.

Ol Sam 71:8

Mi save tokbaot Jisas Kraes long ol narafala man.

Toktok blong wan pikinini i gat spesel paoa blong tajem hat blong ol man. Givim long ol pikinini tras ia se, testemoni blong olgeta long Jisas Kraes, i save helpem ol narafala man.

Yumi save toktok wetem ol narafala man abaot wanem Jisas i bin mekem from yumi.

Samfala Aktiviti we Yu Save Mekem

• Ridim long ol pikinini Ol Sam 71:8, mo droem wan bigfala maot long bod. Askem olgeta blong helpem yu “fulumap” maot wetem ol samting we yumi save talem abaot Jisas Kraes.

• Pasem wan pikja blong Jisas Kraes i go raon. Askem ol pikinini blong gat wanwan janis blong holem pikja mo talem wan samting we oli save abaot Hem. ?Wanem nao Hem i bin mekem blong yumi? (Ol pikja insaed long Gospel Art Buk oli save givim sam aedia.)

Ol Sam 86:7

Papa long Heven i harem mo ansarem ol prea blong mi.

Plante long Ol Sam oli olsem ol prea i go long God blong askem help, blong Hem i soem rod, o blong proteksen. Tingting long olsem wanem yu save helpem ol pikinini bildimap fet blong olgeta se Papa long Heven i harem mo ansarem olgeta taem oli prea.

Samfala Aktiviti we Yu Save Mekem

• Askem ol pikinini olsem wanem nao oli toktok wetem ol pipol we oli stap longwe. Soem long olgeta Samting we yumi save yusum blong toktok tugeta olsem long fon o wan leta. Ridim long olgeta Ol Sam 86:7. ?Olsem wanem yumi “singaotem” Papa long Heven? ?Olsem wanem nao Hem i ansarem yumi?

• Invaetem ol pikinini blong aktem ol samting we oli mekem evri dei, olsem blong stap wekap, stap kakae brekfas, stap go long skul, o stap go long bed. Helpem olgeta blong faenem ol taem long wan dei we bae oli save prea long Papa long Heven. Testifae se yumi save prea long Hem enitaem, mo Hem bae i harem yumi.

• Singsing tugeta wan singsing abaot prea olsem: “A Child’s Prayer” (Children’s Songbook, 12–13). Tokbaot wan taem we God i bin ansarem ol prea blong yu.

Ol Sam 77:11

“Bae mi tingbaot ol wok blong Lod.”

Ol skripja oli save bildimap fet blong yumi long Jisas Kraes taem oli helpem yumi blong tingbaot “ol sapraes blong bifo.”

Samfala Aktiviti we Yu Save Mekem

• Ridim long ol pikinini Ol Sam 77:11, mo talem long olgeta olsem wanem yu traem blong “tingbaot ol wok blong Lod,” hemia wetem ol wok blong Hem long laef blong yu. Invaetem ol pikinini blong droem ol pikja blong helpem olgeta blong tingbaot ol bigbigfala samting we Hem i bin mekem.

• Soem ol pikja insaed long buk ia, o long Kam Folem Mi—Blong Wanwan Man Woman, mo Famli blong rimaenem ol pikinini ol stori we oli bin lanem insaed long OlTesteman abaot ol gudgudfala samting we Lod i bin mekem blong ol pipol blong Hem. Askem olgeta wijwan long ol stori ia we oli laekem bigwan mo from wanem.

Tijim Doktrin: Ol Bigfala Pikinini

Ol Sam 51

Fasin blong sakem sin i wan jenis blong hat.

Ol Sam 51 i gat insaed sam trutok abaot fasin blong sakem sin. ?Olsem wanem nao yu helpem ol pikinini ia blong faenemaot ol trutok ia?

Samfala Aktiviti we Yu Save Mekem

• Givim wok long wanwan pikinini blong ridim wan skripja refrens long aktiviti pej blong wik ia. Askem olgeta blong faenem ol toktok we oli tijim olgeta wan samting abaot fasin blong sakem sin. Letem olgeta oli raetem ol toktok long bod. Afta we evriwan i serem wan samting, askem ol pikinini olsem wanem oli save ansa long wan fren we i askem: “?Wanem i minim blong sakem sin?”

• Droem wan sep blong hat long bod. Askem ol pikinini blong talem nem blong sam sin we Setan i temtem yumi blong komitim. Raetem ol sin ia insaed long hat. Askem ol pikinini blong faenem toktok ia, hat insaed long Ol Sam 51:10, 17. ?Wanem nao ol ves ia oli tijim yumi abaot fasin blong sakem sin? (luk tu long ves 6). Helpem ol pikinini blong andastanem se, iven sapos yumi stop blong komitim sin, hat blong yumi i nidim blong jenis blong save sakem sin. Askem ol pikinini blong karemaot ol sin insaed long sep blong hat ia long bod mo raetem ol niufala toktok we i tokbaot jenis long hat blong yumi taem yumi sakem sin. Serem testemoni blong yu se God i save “krietem insaed long [yumi] wan klin hat” taem yumi sakem sin (ves 10).

Ol Sam 66:16; 77:11; 78:7

“Bae mi tingbaot ol wok blong Lod.”

Ol laen blong Isrel oli bin tijim ol pikinini blong olgeta abaot ol merikel we God i bin mekem long olgeta “maet i putum hop blong olgeta long God” (Ol Sam 78:7).

Samfala Aktiviti we Yu Save Mekem

• Askem ol pikinini blong serem wetem yu sam long ol fevret stori blong olgeta aot long ol skripja (ol pikja long Gospel Art Buk maet oli save helpem olgeta blong tingting long ol stori). ?From wanem oli laekem ol stori ia? ?Wanem nao ol stori ia oli tijim yumi abaot Lod? Ridim tugeta Ol Sam 77:11; 78:7. ?From wanem i impoten blong “tingbaot ol wok blong Lod”?

• Askem ol pikinini blong ridim Ol Sam 66:16 mo tingting abaot o raetemdaon ol ansa long kwestin ia ?“Wanem nao Lod i bin mekem from sol blong mi?” Afta, letem olgeta oli serem ol ansa blong olgeta sapos oli wantem. ?Wanem nao yumi save mekem blong “oltaem tingbaot” (Moronae 4:3; 5:2) wanem Lod i bin mekem from yumi?

Ol Sam 86:5; 13:15

Lod i wantem blong fogiv.

Taem yumi mekem sin, Setan i wantem yumi blong tingting se Lod bae i neva fogivim yumi. Helpem ol pikinini blong bildim fet blong olgeta se, Lod i “rere blong fogiv mo gat plante sore” (Ol Sam 86:5).

Samfala Aktiviti we Yu Save Mekem

• Soem wan pikja blong Sevya (olsem wan insaed long Kam Folem Mi—Blong Wanwan Man Woman, mo Famli), mo askem ol pikinini wanem toktok bae oli yusum blong tokbaot Hem. Invaetem olgeta blong faenem ol toktok we i tokbaot Hem insaed long Ol Sam 86:5, 13, 15. Sapos i nid, helpem olgeta blong talem mining blong ol toktok ia. ?Wanem nao yumi save talem long wan fren we i filim se God i kros long olgeta taem oli mekem sin?

• Sing wetem ol pikinini wan singsing we i save helpem olgeta blong andastanem fasin blong fogiv blong Sevya, olsem: “Mi Sapraes Tumas we Jisas Hem I Lavem Mi” (STSP, pej 22). Serem testemoni blong yu se Jisas Kraes i wantem blong fogivim yumi.

Stap Leftemap Tingting blong Lanem Samting long Hom

Invaetem wanwan pikinini blong givim wan risen from wanem hem i lavem Papa long Heven mo Jisas Kraes. Leftemap tingting blong olgeta blong serem risen ia wetem wan long hom blong olgeta. Testifae se ol toktok blong olgeta bae i blesem man ia.

Kam Antap long Fasin blong Yumi blong Stap Tij

Soemaot tras. “Sapos [ol pikinini] oli luksave se yu trastem olgeta, tras blong olgeta long tabu paoa blong olgeta bae i gro. … Talem wetem lav se yu save se oli save responsibol blong stap lanem samting olgetawan” (Teaching in the Savior’s Way, 28).