“1–7 Ogis. Esra 1; 12 12; -14; Nehemaea 21; 38-40; 42: ‘Esra 1; 3–7; Nehemaea 2; 4–6; 8: “Mi Mi Stap Mekem Wan Bigfala Wok’” Kam Folem Mi—Blong Praemeri: OlTesteman 2022 (2021)
“1–7 Ogis. Job 1–3; 12–14; 19; 21–24; 38–40; 42,” Kam Folem Mi—Blong Praemeri: OlTesteman 2022
Ol Jajmen blong Job, i kam long Joseph Brickey
1–7 Ogis
Job 1–3; 12–14; 19; 21–24; 38–40; 42
“Be Tingting blong Mi Bambae I Stap Strong long Hem Nomo”
Taem yu stadi long stori blong Job, ?Wanem mesej nao yu faenem we i blong laef blong yuwan? ?Wijwan long ol mesej ia nao yu filim se ol pikinini we yu tijim oli nidim blong harem?
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem long ol pikinini wan pikja blong Job (luk long aotlaen blong wik ia long Kam Folem Mi—Blong Wanwan Man, Woman mo Famli). Askem long ol pikinini wanem nao filing blong man ia long pikja. Invaetem ol pikinini blong serem eni samting bakegen we oli save abaot Job.
Tijim Doktrin: Ol Smol Pikinini
Papa long Heven mo Jisas Kraes bae oli helpem mi long ol hadtaem, taem we mi gat fet long Tufala.
Job i trastem God mo i gohed blong stap fetful iven taem we hem i fesem ol tes blong laef we i had tumas. Stori blong Job i save helpem fet blong ol pikinini i kam strong long Papa long Heven mo Jisas Kraes, mekem se bae oli rere blong fesem ol tes blong laef blong olgetawan.
Samfala Aktiviti we Yu Save Mekem
-
Invaetem ol pikinini blong serem wanem oli save abaot Job, mo helpem olgeta blong andastanem wanem i hapen long hem (luk long Job 1–2; “Job” insaed long Ol Stori long OlTesteman). Askem ol pikinini olsem wanem bae oli filim sapos olgeta oli Job. ?Huia i save helpem yumi taem oli samting oli mekem yumi harem nogud long laef blong yumi? Soem wan pikja blong Jisas Kraes, mo eksplenem se fet blong Job long Lod i helpem hem long taem blong tes blong hem (luk long Job 1:21).
-
Ridim long ol pikinini ol toktok blong Job insaed long Job 13:15: “Mi trastem hem.” Helpem ol pikinini blong andastanem wanem i minim blong trastem God; tokbaot long olgeta abaot ol narafala man we oli trastem olgeta. Eksampol, ?wanem nao yumi trastem ol papa mo mama blong yumi blong mekem? ?Wanem nao yumi trastem ol pikinini blong yumi blong mekem? ?Wanem nao yumi trastem Papa long Heven mo Jisas Kraes blong mekem? Soem tras blong yu long Papa long Heven mo Jisas Kraes, mo helpem ol pikinini blong tingting long ol wei we oli save soem se oli lavem mo trastem Tufala.
Jisas Kraes Hem i Ridima blong mi.
Job i bin winim ol tes blong laef blong hem mo safa from fet blong hem long Lod. ?Olsem wanem nao bae yu helpem ol pikinini blong oli bildimap fet blong olgeta long Jisas Kraes we i Ridima blong yumi?
Samfala Aktiviti we Yu Save Mekem
-
Soem wan pikja blong Jisas antap long Kros, o hemia we oli berem Hem long hol blong ston (luk long Gospel Art Buk, ol namba 57, 58). Askem ol pikinini blong eksplenem wanem nao i stap hapen insaed long pikja. Ridim testemoni blong Job long ol pikinini; hem i stap long Job 19:25. Soem wan pikja blong Sevya we i laef bakegen long ded (luk long Gospel Art Buk, ol namba 59, 60; luk tu long aktiviti pej blong wik ia), mo testifae se Jisas Kraes i bin laef bakegen long ded mo Hem i laef tedei. ?From wanem yumi stap talem tangkyu se Jisas Kraes i bin laef bakegen long ded?
-
Soem wan pikja blong Job, mo eksplenem se Job i bin stap long plante harem nogud from se skin blong hem i fulap wetem plante soa. Hem i lusum hom blong hem mo ol pikinini blong hem oli bin ded. Be Job i save wan samting we i impoten tumas we i givim hem kamfot. Ridim Job 19:25, mo askem ol pikinini wanem nao Job i bin save. Serem wetem ol pikinini olsem wanem yu save se Jisas Kraes i stap laef, mo invaetem olgeta blong serem testemoni blong olgeta abaot Hem.
Pikjaman i stap lukluk i go antapJob, i kam long Gary L. Kapp
-
Invaetem ol pikinini blong kalarem aktiviti pej ia blong wik ia. Taem oli mekem olsem, plei o singsing long singsing abaot Jisas we i Laef Bakegen long Ded olsem: “Did Jesus Really Live Again?” o “Jesus Has Risen” (Children’s Songbook, 64, 70). Askem olgeta blong serem wanem oli filim abaot Jisas, mo helpem olgeta blong andastanem se yumi save gat ol gudfala filing aot long Tabu Spirit blong helpem yumi save se Jisas Kraes i ril.
Stap Tijim Doktrin: Ol Bigfala Pikinini
Papa long Heven mo Jisas Kraes bae Tufala i helpem mi blong winim ol jalenj taem mi stap gat fet long Tufala.
Evriwan i gat ol dei we i had, mo sam pipol oli gat ol tes blong laef we i stap blong wan longfala taem. Fet blong Job long God i sapotem hem tru long ol tes blong laef blong hem. Tingting long olsem wanem stori blong hem i save bildimap fet blong olgeta long Papa long Heven mo Jisas Kraes mekem se bae oli save fesem ol tes blong laef blong olgeta naoia mo long fiuja.
Samfala Aktiviti we Yu Save Mekem
-
Askem ol pikinini blong serem wanem oli save abaot stori blong Job. ?Hem i wanem kaen man? ?Wanem i hapen long hem? ?Hao nao bae hem i fesem ol jalenj blong hem? Poenem ol ves ia insaed long Job 1–2 blong helpem olgeta blong talem stori (luk long Job 1:1, 13–22; 2:7–10; luk tu long “Job” insaed long Ol Stori long OlTesteman). Invaetem ol pikinini blong serem wanem oli filim we i stamba mesej long stori blong Job.
-
Soem sam pikja blong Jisas Kraes we i stap toktok wetem ol narafala man, mo askem ol pikinini wanem oli filim we ol pikja ia i tijim abaot huia nao Jisas Kraes mo Hem i olsem wanem. ?Wanem nao yumi save abaot Hem? Invaetem ol pikinini blong ridim sam long ol ves ia blong faenemaot sam samting we Job i bin save abaot Lod: Job 12:10, 13, 16; 19:25–27. ?From wanem hem i impoten blong save ol samting ia abaot Sevya?
-
Invaetem ol pikinini blong ridim Job 19:14–19, mo askem olgeta wanem nao ol ves ia oli talem abaot olsem wanem ol narafala pipol oli stap tritim Job. ?Wanem nao bae yumi filim sapos i bin hapen long yumi? Invaetem ol pikinini blong ridim Job 19:23–27 blong faenemaot olsem wanem Job i faenem kamfot long situesen ia. ?Wanem nao ol ves ia oli stap tijim yumi abaot Sevya? ?From wanem i impoten blong save se Hem i laef mo we Hem i lavem yumi? (luk long John 17:3).
-
Singsing tugeta wan singsing we i testifae long Jisas Kraes olsem: “Mi save Ridima Hem I Laef” (STSP, pej 38). ?Wanem nao singsing ia i talem abaot from wanem i impoten blong gat wan testemoni se Jisas Kraes i stap laef? Talem long ol pikinini olsem wanem yu save se Sevya i stap laef mo from wanem yu glad tumas from save ia. Leftemap tingting blong olgeta blong serem ol filing mo testemoni blong olgeta.
Ol gud fren oli helpem mo leftemap tingting blong wanwan long olgeta.
Taem we Job i stap traehad, ol fren blong hem oli talem se God i stap panisim hem from we hem i mekem sin. Stori ia i save helpem yu blong tijim ol pikinini long wan moa gud wei blong mekem samting taem wan fren i gat ol jalenj (luk long Job 16:1–5).
Samfala Aktiviti we Yu Save Mekem
-
Askem ol pikinini blong luklukbak long plante hadtaem we i bin hapen long Job (luk long Job 1:13–19; 2:7). Ridim tugeta Job 19:14, 19, mo stap lukaotem olsem wanem nao fren blong Job i bin fesem ol tes blong laef blong hem (luk tu long Job 22:1–5). Invaetem ol pikinini blong pikjarem long maen blong olgeta se, olgeta nao, oli ol fren blong Job—?olsem wanem nao bae oli traem blong help? Leftemap tingting blong olgeta blong tingting long wan fren we maet i stap go tru long wan hadtaem, mo mekem plan blong wan samting we oli save mekem blong soem lav mo sapot long fren blong olgeta.
-
Askem ol pikinini blong mekem wan lis blong ol kwaliti blong wan gudfala fren, mo blong talem nem blong wan fren we i gat ol kwaliti ia. Soem wan pikja blong Jisas Kraes. ?Long ol wanem wei nao Jisas i wan gudfala fren long wanwan long yumi? ?Olsem wanem nao yumi save folem eksampol blong Hem?
Stap Leftemap Tingting blong Lanem Samting long Hom
Invaetem ol pikinini blong serem, wetem famli memba blong olgeta o wan fren, wan wei we Papa long Heven mo Jisas Kraes i save helpem olgeta taem we oli stap fesem hadtaem.
Stap Kam Antap long Fasin blong Yumi blong Stap Tij
Testifae abaot ol blesing we Lod i promesem. Taem we Lod i givim wan komanmen, oltaem Hem i promesem ol blesing we i kam taem yumi stap kipim komanmen ia. Taem yu stap invaetem ol pikinini blong laef folem wan gospel prinsipol, serem ol promes we God i bin mekem, tru long ol profet, wetem olgeta we oli laef folem prinsipol ia. Mo tu, yu save serem testemoni from ol blesing we yu gat taem yu stap laef folem prinsipol ia.