Ol Jajmen blong Job, i kam long Joseph Brickey

1–7 Ogis

Job 1–3; 12–14; 19; 21–24; 38–40; 42

“Be Tingting blong Mi Bambae I Stap Strong long Hem Nomo’’

Taem yu stap ridim abaot Job, Spirit bae i gaedem yu blong faenem aot ol impoten trutok we hem i blong yu. Raetemdaon wanem yu faenemaot, mo tingting hevi long olsem wanem ol trutok ia i blong yu.

Raetemdaon Ol Filing mo Tingting blong Yu

Hem i nomol blong stap tingting se from wanem ol rabis samting i stap hapen long ol gudfala pipol—o long mata ia, from wanem ol gudfala samting i hapen long ol pipol we oli rabis. ?From wanem bae God, we Hem i stret, bae i letem hemia blong i hapen? Ol kwestin olsem oli lukluk tru long ol tru long eksperiens blong Job, wan long ol gudfala man we ol rabis samting oli hapen long hem. From se ol hadtaem blong Job, ol fren blong hem oli stap tingting se sapos hem i wan gudfala man o no. Job i gohed blong stap long wan fasin we i stret mo gud mo stap tingting se sapos i gat wan stret God, i stap o no. Be iven we hem i stap safa mo stap tingting, Job i gohed blong stap tru mo gat fet long Jisas Kraes. Long Buk blong Job, oli kwestinim abaot fet mo oli testem be oli neva lego evriwan. Be hemia i no minim se evri kwestin oli ansarem. Be Buk blong Job i tijim se kasem taem oli ansarem evri kwestin, yumi save gat ol kwestin mo fet semtaem, mo nomata wanem i hapen naoia, yumi save talem abaot Lod blong yumi se: “Be Tingting blong Mi bambae i stap strong long Hem nomo” (Job 13:15).

Blong gat wan bigfala lukluk long Buk blong Job, luk long “Job” insaed long Gaed long Ol Skripja (olskripja.ChurchofJesusChrist.org).

Ol Aedia blong Skripja Stadi blong Yuwan

Job 1–3; 12–13

Tras blong mi long Papa long Heven mo Jisas Kraes bae i save helpem mi blong stanap strong long fet oltaem nomata wanem samting mi fesem.

Long stat long ol japta long Job oli traem blong talem rol blong Setan olsem enemi blong yumi o man blong yumi blemem, be i no blong talem olsem wanem God mo Setan tufala i wok tugeta. Taem yu stap rid abaot Setan we i askem blong save traem Job (luk long Job 1: 9–11; 2:4–5), maet yu tingting se semmak samting i save hapen long yu. Maet yu askem yuwan, ?wanem nao ol risen blong mi blong mi gohed blong stap fetful long God? Tingting hevi long ol tes we God i bin givim long Job mo wei we hem i fesem olgeta (luk long Job 1:20–22; 2:9–10). ?Wanem nao yu bin lanem long hem we maet bae i helpem yu blong fesem ol tes blong yu?

Iven we Job i stap traehad blong stap fetful, ol hadtaem blong hem mo ol safaring blong hem, oli gohed nomo (teknot ol harem nogud blong hem long japta 3). I tru we, ol safaring blong hem i kam moa bigwan, mo ol fren blong hem i talem se God i stap panisim hem (luk long Job 4–5; 8; 11). Taem yu stap ridim pat blong ansa blog Job long ol japta 12–13, tingting long wanem Job i save abaot God we i mekem hem i gogohed blong i trastem Hem, iven hem i stap safa mo ol kwestin we oli nogat ansa long hem. ?Wanem nao yu save abaot God we i helpem yu fesem ol jalenj? ?Olsem wanem nao yu kam blong save ol trutok ia, mo olsem wanem oli mekem fet blong yu i kam moa strong?

Job 19

Jisas Kraes Hem i Ridima blong mi.

Samtaem ol trutok we oli moa impoten oli soem long yumi long medel blong ol harem nogud blong yumi. Tingting hevi long ol hadtaem we Job i tokbaot long Job 19:1–22 mo ol trutok hem i talem long Job 19: 23–27. Afta tingting hevi olsem wanem yu save se Ridima blong yumi i stap laef. ?Wanem i defren long save ia we i mekem yu i eksperiensem ol hadtaem ia we i had tumas?

Luk tu long Doktrin mo Ol Kavenan 121:1–12; 122.

Job, i kam long Gary L. Kapp

Job 21–24

“Mo sapos hem i traem blong faenemaot fasin blong mi, bambae hem i luk laef blong mi we i klin gud.”

Taem yu stap rid moa long ol raorao blong Job wetem ol fren blong hem abaot ol risen from wanem Job i stap safa, yu maet tingting hevi long hao nao bae yu ansarem kwestin ia long medel blong raorao blong olgeta: “From wanem ol man we oli stret mo gud samtaem oli safa mo ol rabis man samtaem oli no panisim olgeta? Tingting long hemia taem yu stap ridim Job 21–24. ?Wanem nao yu save abaot Papa long Heven mo plan blong Hem blong help blong givim ol ansa? Luk, eksampol 2 Nifae 2:11–13; Mosaea 23: 21–23; 24:10–16; Ebraham 3: 22–26; Dallin H. Oaks, “Opposition in All Things,” Liahona, May 2016, 114–17.

Luk tu long L. Todd Budge “Wan Tras we I Semmak Oltaem mo I Wantem Gohed,” Liahona, Nov. 2019, 47–49.

Job 38; 40; 42

Lukluk blong God i bigwan bitim hemia blong mi.

Kros from ol fren blong hem i blemem hem ( luk long Job 16:1–5.; 19: 1–3), Job i gohed blong krae long Lod askem wan ansa long ol safaring blong hem (luk long Job 19: 6–7; 23: 1–9; 31). Elda Neal A. Maxwell hem i bin luk se “taem we yumi no save gat fasin blong save wet longtaem, blong ting se yu save evri samting long taem blong God” olsem we Job i ting se hem i save, “yumi stap traem blong talem se yumi save se wanem nao i stret. Yufala ting se i defren smol—yumi we yumi werem ol hanwaj, i wantem givim kaonsel long Hem we i lukluk long evri samting” (“Hope through the Atonement of Jesus Christ,” Ensign, Nov 1998, 63). Tingting hevi long ol toktok ia we yu ridim long ansa blong God long Job long ol japta 38 mo 40. ?Wanem nao ol trutok we hem i stap tijim Job long hem? ?From wanem ol trutok ia oli impoten blong yumi save taem yumi stap traehad wetem wanem i kam agens yumi mo ol kwestin we yumi gat long ples ia? ?Wanem nao i tajem yu abaot ansa blong Job long Job 42: 1–6?

Ol Aedia blong Famli Skripja Stadi mo Haos Naet

Job 1:20–22.Blong andastanem olsem wanem Job i filim, olsem we oli tokbaot long ol ves ia, famli blong yu save ridim “Job” long Ol Stori long OlTesteman o yufala i save aktem Job 1:13–22. ?Wanem nao yumi save lanem aot long eksampol blong Job?

Job 14:14.?Hao nao bae yumi ansarem kwestin blong Job long ves ia? ?Olsem wanem nao Alma 11: 42–44 bae i save helpem yumi? (Luk tu long vidio ia: “He Lives—Celebrate Easter Because Jesus Christ Lives,” ChurchofJesusChrist.org.)

Job 16:1–5.Nao yumi stap olsem ol fren blong Job, we oli jajem mo talem nogud hem taem hem i nidim kamfot; (luk long Job 16:1–4; luk tu long Jon 7:24). ?Hao nao ol toktok blong yumi i save mekem ol narafalawan oli kam moa strong long taem blong ol harem nogud blong olgeta? (luk long Job 16:5).

Job 19:23–27.Afta we yufala i ridim olgeta ves ia, ol memba blong famli oli save serem olsem wanem oli kam blong save se Ridima blong yumi i laef. Maet yu wantem wok tugeta blong putum ol toktok blong testemoni blong yu (o ol droing blong pikinini blong yu blong Sevya) long wan buk, olsem wan famli jenol (luk long ves 23). Yu save singsing wan singsing we i testifae abaot Sevya, olsem “Mi Save Ridima Hem I Laef” (Singsing Tabu mo Singsing blong Ol Pikinini, pej 38), mo serem ol toktok we i mekem fet blong yu long Hem i kam moa strong.

Job 23:8–11.?Wanem nao hem i minim blong bambae hem “i luk laef blong mi we i klin gud” long ol hadtaem blong yumi? (luk tu vidio ia: “The Refiner’s Fire,” ChurchofJesusChrist.org). ?Huia bakegen we yumi save long hem we i bin mekem hemia finis? Maet ol pikinini oli glad blong mekem wan samting we bae oli raetem ol toktok long ves 10 long hem. Maet yu wantem toktok raon long hao nao Jisas Kraes i winim ol hadtaem blong Hem (luk long Luk 22: 41–44; Doktrin mo Ol Kavenan 19: 16–19).

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Mi Save Ridima Hem I Laef,” STSP, pej 38.

Stap Kam Antap long Stadi blong Yuwan

Pikjarem long maen. Ol gudfala tingting i save kam taem yumi traem blong putum yumiwan long olgeta skripja. Eksampol, putum yuwan long situesen blong Job; bae hemia i save helpem yu blong tingting hevi long rilesensip blong yu wetem Papa long Heven mo Jisas Kraes.

Job mo Ol Fren blong Hem, i kam long Ilya Repin