Ol Tingting blong Kipim long Maen

Stap Ridim Poem long OlTesteman

Long ol buk insaed long OlTesteman we oli kam bifo Buk blong Job, yumi faenem plante stori—ol stori we oli tokbaot ol spesel taem we i hapen long wan lukluk long saed blong spirit. Noa i bildim wan sip, Moses i karemaot ol pipol blong Isrel long Ijip, Hana i prea blong gat wan boe, mo i gat moa. Stat wetem Job, yumi faenem wan defren stael blong stap raet, taem ol man blong raetem OlTesteman oli raet long lanwis blong raetem poem blong talemaot ol filing we oli dip o ol profesi we oli impoten long wan wei we i save stap oltaem long tingting blong man.

Yumi bin luk sam eksampol finis blong poem i stap truaot long ol histri buk blong OlTesteman. Mo stat long Job i go, bae yumi luk plante moa long hem. Ol Buk blong Job, Sam, mo Ol Proveb, kolosap evriwan oli ol poem, olsem sam pat blong ol raeting blong ol profet olsem, Aesea, Jeremaea, mo Amos. From se blong ridim poem i defren long hao yumi ridim wan stori, blong andastanem i nidim wan defren lukluk blong save. Hemia i sam long ol tingting we yu save mekem riding blong poem blong yu long OlTesteman i gat mining.

Kam blong Save Poem blong Hibru

Faswan, bae i helpem yu blong putum long maen se Hibru long OlTesteman hem i no blong i saon semmak, olsem ol narafala kaen poem. Mo iven we saon i saon semmak, plei blong toktok, mo fasin blong ripitim ol saon oli ol besik pat we olfala Hibru lanwis i yusum long poem, oli lus evriwan long taem blong translesen. Wan long ol pat ia we bae yu luk save hem i ol tingting o aedia we oli stap ripit, samtaem oli singaotem “semsemmak.” Ves ia long Aesea i gat wan simpol eksampol:

• !Putum paoa blong yu long yu, O Saeon!

• Werem ol naes klos blong yu, O Jerusalem (Aesea 52:1).

Long Ol Sam 29 i gat plante laen we i semsemmak—hemia i wan eksampol:

• Ol man oli harem voes blong hem;

• Oli save se hem i King (Sam 29:4).

Mo hemia i blong save se nambatu laen we i semsemmak long faswan i mekem se skripja ia i isi blong oli andastanem:

• Mi mekem ol tut blong yufala i klin gud, long evri taon blong yufala,

• Mi mi mekem we yufala i gat hadtaem blong kasem kaekae (Amos 4:6).

Long ol eksampol ia, wan aedia oli ripitim be i defren smol. Teknik ia i save mekem aedia we oli stap ripitim i kam moa klia, taem oli yusum ol defren wei blong eksplenem mo developem aedia ia.

Long narafala kes, tufala sentens we i semsemmak i yusum semmak lanwis blong soem tu defren aedia, olsem we oli soem long eksampol ia:

• Spos yu toktok gud long wan man we i kros, bambae yu save mekem tingting blong hem i kam kwaet:

• Be spos yu tok strong, long hem, bambae yu mekem hem i kros moa (Ol Proveb 15:1).

Semsemmak laen ia i no hapen olsem ia nomo. Ol man we oli raetem, oli minim blong raetem olsem ia. I letem olgeta blong talemaot ol filing blong olgeta long saed blong spirit o ol trutok long wan wei we i luk olsem se long tugeta, i gat paoa mo i naes. Mekem se taem yu luk semsemmak laen long ol raeting blong OlTesteman, askem yuwan olsem wanem i helpem yu blong andastanem mesej blong man we i raetem. Eksampol, ?wanem nao Aesea i stap traem blong talem we i go wetem “paoa” wetem “naes klos” mo “Saeon” wetem “Jerusalem”? (Aesea 52:1). ?Wanem nao yumi save andastanem abaot toktok ia “toktok gud” sapos yumi save se “toktok strong” hem i narasaed blong toktok ia toktok gud? (Ol Proveb 15:1).

Hem I Putumbak Sol blong Mi i kam long Walter Rane

Poem blong Hibru olsem wan Niu Fren

Maet i save helpem yu blong komperem poem long taem we yu mitim wan niu man. Eksampol, yu save komperem blong ridim poem blong OlTesteman, long taem we yu mitim wan man blong wan kantri we i stap longwe mo kalja blong wan defren kantri we i no toktok sem lanwis olsem yumi—mo i hapen se i gat ova tu taosen yia. Man ia, long fastaem we i talem sam samting long yumi, yumi no andastanem nating, be hemia i no minim se man ia i no gat wan samting we i no gat valiu blong talem long yumi. Wetem fasin blong save wet longtaem mo gat sore, man ia we yumi jes kam blong save bae hem i kam wan gudfala fren. Yumi jes nid blong spendem sam taem tugeta, traem blong luk ol samting long wei we hem i lukluk blong hem. Yumi save faenem long hat blong yumi se yumi kam blong andastanem gud wanwan long yumi.

Mekem se fas taem we yu ridim ol skripja long Aesea, eksampol, tingting long hem olsem fas taem blong yu blong mitim wan niu man. Askem yuwan, “?Wanem nao hem i bigfala tingting blong mi?” ?Olsem wanem nao skripja ia i mekem yu gat filing—iven sapos yu no andastanem evri toktok? Ridim bakegen, plante taem sapos i nid. Sam pipol oli faenem sam moa mining taem we oli ridim ol skripja ia laod. Tingbaot se ol toktok we Aesea i jusum, speseli ol toktok we yu pikjarem long maen blong yu. ?Ol pikja ia oli mekem yu filim olsem wanem? ?Wanem nao pikja nao i talem olsem wanem Aesea i filim? Moa yu stadi long ol toktok blong ol man blong raetem poem long OlTesteman, bae yu faenemaot se oli minim blong jusum ol toktok blong olgeta mo teknik blong olsem wanem nao oli save soem ol dip mesej long saed blong Spirit.

Ol poem oli save kam ol naesfala fren from se oli helpem yumi blong save andastanem ol filing mo eksperiens blong yumi. Ol poem insaed long OlTesteman oli impoten, from se oli helpem yumi blong andastanem ol filing mo eksperiens blong yumi we oli impoten—olgeta we i mekem yumi i gat wan rilesensip wetem God.

Taem yu stap stadi poem long OlTesteman, tingbaot se skripja stadi hem i moa impoten taem i lid yumi i go long Sevya. Lukaotem ol saen, pikja, mo trutok blong bildim fet blong yu long Hem. Lisin long ol kwaet toktok blong Tabu Spirit taem yu stap stadi.

Buk we I Givim Waes

Wan kategori blong poem blong OlTesteman we ol man blong tij oli singaotem “waes tok.” Job, Ol Proveb, mo Prija oli foldaon long kategori ia. Be ol sam, oli soem ol filing blong presem, krae, mo wosip, tok blong waes we i lukluk long taem we yumi stap long hem o dip, kwestin long saed blong politik. Eksampol, Buk blong Job, i lukaotem jastis blong God, mo ol risen from wanem ol man oli stap safa. Ol Proveb i givim ol kaonsel long olsem wanem yumi stap laef, wetem ol waes toktok we oli karem mo pasem i kam daon long ol jeneresen blong bifo. Mo Prija i blong gat tu tingting abaot ol kwestin blong stamba tingting blong laef—taem we evri samting i grup tugeta mo i olbaot, ?wea yumi save faenem tru mining? Yu maet ting se ol waes tok olsem wan storian we i gat mining wetem ol tija we i gat insperesen we oli wantem blong serem sam lukluk blong olgeta abaot God mo wol we Hem i krietem—mo ating bae i helpem yu blong andastanem ol samting ia moa bitim wanem yu save bifo.