“15–21 Ogis. Ol Sam 49–51; 61– 66; 69–72; 77–78; 85–86: ‘Bambae Mi Talemaot long Yufala Ol Samting Ia We Hem I Mekem long Mi,’” Kam Folem Mi—Blong Wanwan Man, Woman mo Famli: OlTesteman 2022 (2021)
“15–21 Ogis. Ol Sam 49–51; 61– 66; 69–72; 77–78; 85–86,” Kam Folem Mi—Blong Wanwan Man, Woman mo Famli: 2022
Stap Sevem Hemia We I Lus, i kam long Michael T. Malm
15–21 Ogis
Ol Sam 49–51; 61–66; 69–72; 77–78; 85–86
“Bambae Mi Talemaot long Yufala Ol Samting Ia We Hem I Mekem long Mi”
Aotlaen ia haelaetem sam long ol doktrin topik we oli tokbaot long ol sam ia. Taem yu stap stadi, sam toktok, ol pikja, o ol aedia bae oli kamaot klia long yu. ?Wanem nao yu filim we Lod i stap traem blong tijim yu?
Raetemdaon Ol Filing mo Tingting blong Yu
Ol man we i raetem Ol Sam oli serem ol dip filing blong olgeta long poem. Oli raet abaot filing blong no gat strong paoa long tingting, fraet, mo sore long wanem oli mekem i rong. Samtaem, oli filim se God i fogetem olgeta, mo sam long ol sam ia i soemaot se oli kros o oli lusum hop. Sapos yu eva gat ol filing olsem ia, sapos yu stap ridim Ol Sam, bae i save helpem yu save se i no yuwan nomo. Be tu, bae yu faenemaot se ol sam i save leftemap yu taem yu stap gat ol kaen filing olsem ia, from se ol man we oli raetem ol sam, olgeta tu oli presem Lod from fasin blong Hem we i kaen, oli sapraes long bigfala paoa blong Hem, mo glad long sore blong Hem. Oli save se bae wol bae i harem nogud long rong mo sin, be Lod i “gud tumas long mifala, mo yu, mo i stap fogivim [yumi]” (Ol Sam 86:5). Oli andastanem se fet long Lod i no minim se bae yu neva traehad wetem bigfala wari, sin o fraet. Hem i minim se yu save Huia bae yu tanem yu i go long Hem taem yu nidim.
Ol Aedia blong Skripja Stadi blong Yuwan
Fasin blong pemaot man i kam nomo tru long Jisas Kraes.
Ol Sam 49 i gat mesej blong “!ol rijman mo ol puaman!” (ves 2). ?Wanem nao bae yu talem abaot mesej ia? ?Wanem nao yu filim Ol Sam 62:5–12 i ademap long mesej ia?
Sapos yu stap ridim ol sam ia, bae i save pusum yu blong tingting hevi long ol wei we sam pipol oli putum tras blong olgeta long wan samting, be i no long God, blong pemaot olgeta Ol Sam 49:6–9). ?Olsem wanem nao testemoni blong yu i wok long laef blong yu se bae “[God] bambae i tekemaot [yu] long paoa blong ded?”(ves 15).
Luk tu long Ol Proveb 28:6; Alma 34:8–17.
From sore blong Sevya, mi save kasem fogivnes from ol sin blong mi.
Ol krae blong sore long Ol Sam 51 oli blong King Deved, we hem i harem nogud long adaltri mo fasin blong kilim man i ded (luk long 2 Samuel 11). Iven sapos ol sin blong yumi oli no series tumas, yumi save tekem i kam long nid ia blong yumi blong Lod i gat sore, olsem we oli talem long sam ia. Yumi save lanem samting tu abaot wanem i minim blong sakem sin. Eksampol, ?wanem toktok o sentens long Ol Sam 51 we i tijim yu abaot fasin we yumi sapos blong gat blong save sakem sin? ?Wanem nao yu lanem abaot wanem risal Atonmen blong Sevya i save wokem insaed long laef blong yu?
Maet bae yu askem sem kwestin taem yu stap ridim Ol Sam 85–86. Yu save lukaotem tu ol sentens we oli tokbaot Lod. ?Olsem wanem nao ol sentens ia i mekem fet blong yu i kam strong moa, se Hem bae i fogivim yu? (eksampol, luk long Ol Sam 86:5, 13, 15).
Luk tu long Alma 36; Russell M. Nelson, “Yumi Save Mekem Gud Moa mo Stap Gud Moa,” Liahona, Mei 2019, 67–69; Carole M. Stephens, “The Master Healer,” Liahona, Nov. 2016, 9–12.
Ol Sam 51:13–15; 66:16–17; 71:15–24
Testemoni blong mi abaot Jisas Kraes i save helpem ol narafalawan oli kam long Hem.
Tingting hevi long olsem wanem yu bin kasem testemoni abaot Jisas Kraes mo paoa blong atonmen blong Hem. Mo taem, yu stap stadi Ol Sam 51:13–15; 66:16–17; 71:15–24, tingbaot olsem wanem yu save invaetem ol narafala man blong “kam, harem ol samting we God i bin mekem” (Ol Sam 66:5). ?Wanem nao i minim long yu blong “oltaem, stap tokbaot stret fasin blong [Hem] long wan ful dei” (Ol Sam 71:24). ?Hao nao bae yu talem long ol narafalawan “ol samting ia we hem i mekem blong yu” (Ol Sam 66:16).
Luk tu long Mosaea 28:1–4; Alma 26.
Yumi save serem, wetem ol narafalawan, ol testemoni blong yumi long wanem Lod i bin mekem blong yumi.
Lod bae i helpem mi taem we mi rili nidim hem.
Sam long ol sam i tokbaot, long wan klia lanwis, se i filim olsem wanem nao blong stap longwe long God mo blong rili nidim help blong Hem. Maet yu wantem blong lukaotem ol samting ia long Ol Sam 63:1, 8; 69:1–8, 18–21; 77:1–9. ?Wanem nao yu faenem long Ol Sam 63; 69; 77–78 we i givim long ol man blong raetem ol sam, wan gudfala filing long wok blong olgeta?
Taem we yu wari, ?hao nao i helpem yu blong “tingbaot ol wok blong Lod” mo “merikel blong Hem blong bifo”. (Ol Sam 77:11). Sam long ol merikel ia oli tokbaot long Ol Sam 78. Taem yu stap ridim abaot olgeta, tingting hevi long wanem i helpem yu blong “[yu] save trastem God” (ves 7). ?Wanem eksperiens aot long famli histri blong yu i givim insperesen long yu?
Ol Aedia blong Famli Skripja Stadi mo Haos Naet
-
Ol Sam 51:17.Tingting long olsem wanem maet yu save tijim famli blong yu wanem i minim blong gat wan hat we i brok. Eksampol, wanwan memba blong famli i save tekem wanwan taem blong brekem openem wan samting we sel blong hem i strong, olsem eg o wan nat. ?Hao nao, hat blong yumi, samtaem i olsem sel ia? ?Olsem wanem nao yumi brekem openem hat blong yumi long Lod? Stap ridim Ol Sam 51 tugeta maet bae i givim sam aedia.
-
Ol Sam 61:2–3.Ol memba blong famli maet bae oli gat gud taem, taem oli droem ol pikja blong ol simbol insaed long ol ves ia mo toktok raon long olsem wanem Jisas Kraes i olsem bigfala ston, wan ples blong haed blong yumi mo wan strong taoa.
-
Ol Sam 71:17; 78:5–7.?Wanem nao Lod i wantem yu blong letem ol pikinini blong yu save? (Ol Sam 78:5). Ating wanwan memba blong famli i save serem wan eksampol blong “merikel” blong Lod, olsem wan skripja stori, wan eksperiens, o testemoni blong yuwan, we bae i helpem olgeta blong putum hop long God (Ol Sam 71:17; 78:7).
-
Ol Sam 72.Ol Sam 72 King Deved i raet abaot boe blong hem Solomon, be fulap samting ia, yumi save putum tu i go long Jisas Kraes. Taem famli blong yu i stap ridim ol sam ia, oli save holem pikja blong Sevya mo pusum i go antap taem we oli faenem ol ves we i mekem olgeta i tingbaot Jisas Kraes. ?Olsem wanem bae yumi save help blong mekem tingting ia se “bae wol i fulap long glori blong hem” i hapen? (Ol Sam 72:19; luk tu long Doktrin mo Ol Kavenan 65:2).
-
Ol Sam 85:11.Ves ia i save givim insperesen abaot ol samting we i hapen long Restoresen blong gospel—olsem wanem nao Buk blong Momon i trutok we i kamaot long graon, mo olsem wanem ol man blong mesej long heven i kam daon long heven (luk tu long Moses7:62). Vidio ia: “Preparation of Joseph Smith: Tutored by Heaven” (ChurchofJesusChrist.org) i soem ol samting we i hapen long taem ia.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Mi Nidim Yu Oltaem,” STSP, pej 22.
Stap Kam Antap long Fasin blong Yumi blong Stap Tij
Yusum defren teknik. “Lukaotem ol defren wei we yu ademap defren teknik blong tijim gospel. Taem yu mekem olsem bae i ademap rij samting mo naesfala filing long eksperiens. … Tingting blong yusum miusik, ol stori, mo ol nara wei blong invaetem Spirit” (Teaching in the Savior’s Way, 22).
No Gat Tu Tingting, Tomas, i kam long J. Kirk Richards