Evri Ni Bae I Bodaon, i kam long J. Kirk Richards

22–28 Ogis

Ol Sam 102–103; 110; 116–119; 127–128; 135–139; 146–150

“Olgeta Samting We I Gat Laef, Evriwan I Mas Presem Hem”

Ol Sam 119:105 i tijim se tok blong God i “soemaot rod blong [yu].” Taem yu stap ridim Ol Sam, raetemdaon ol sentens mo ol aedia we i givim yu insperesen mo helpem blong givim laet long rod blong yu i gobak long Papa long Heven.

Raetemdaon Ol Filing mo Tingting blong Yu

Kastom nem blong Buk blong Ol Sam hem i wan Hibru toktok we i minim “presem.” Toktok ia, Tehillim, hem i semmak wetem singaot ia “haleluia” (we i minim “presem Jehova” o “presem Lod”). Sapos blong yu jusum wan toktok blong tokbaot ful stamba mesej ia blong Ol Sam, “presem” bae hem i wan gud joes. Sam long Ol Sam i gat stret invitesen blong “Yufala i presem Lod” (luk speseli long Ol Sam 146–50), mo evriwan i save givim insperesen ia blong gat filing blong wosip. Ol Sam i invaetem yumi blong lukluk long paoa blong Lod, sore blong Hem, mo long ol gudfala samting we Hem i bin mekem. Bae yumi neva save pembak Hem long eni long ol samting ia, be yumi save presem Hem from ol samting ia. Ol pres ia bae oli kam long ol defren kaen blong ol pipol—bae oli singsing, prea, o serem testemoni. Oltaem bae i lid i go long komitmen we i moa dip long Lod mo blong folem ol tijing blong Hem. Nomata wanem toktok ia, “Yufala i presem Lod”, i minim long laef blong yu, yu save faenem moa insperesen blong mekem hemia taem yu stap rid mo tingting hevi long Ol Sam.

Ol Aedia blong Skripja Stadi blong Yuwan

Ol Sam 102–3;116

Lod i save kamfotem mi long ol hadtaem blong mi.

Tekem not olsem wanem Ol Sam 102:1–11 i tokbaot ol filing blong bigfala wari mo stap yuwan we oltaem i kam long ol hadtaem. Maet yu bin eksperiensem ol filing olsem ia, mo ol samting we oli tokbaot blong helpem yu andastanem ol eksperiens moa gud. O maet ol ves ia bae oli helpem yu andastanem ol filing blong ol narafalawan we oli stap safa.

Taem yu stap ridim Ol Sam 102:12–28; 103; 116, lukaotem ol sentens we oli mekem yu gat moa tras blong “singaotem nem blong Lod long ol hadtaem blong yu (Ol Sam 116:13). Yu maet wantem makem, lanem baehat, o serem wetem ol narafala man ol sentens we oli givim yu hop long Hem.

Luk tu long Aesea 25:8; 2 Korin 1:3–7; Hibrus 2:17–18; Alma 7:11–13; Evan A. Schmutz, “God Shall Wipe Away All Tears,” Liahona, Nov. 2016, 116–18.

Hiling, i kam long J. Kirk Richards

Ol Sam 110; 118

Ol Sam oli save poenem mi i go long Sevya.

Ol Sam, insaed long ol, i gat ol skripja we oli poen i go long laef mo seves blong Jisas Kraes. Hemia samfala eksampol:

• Ol Sam 110:1–4 (luk long Matiu 22:41–45; Hibrus 5:4–10; 6:20)

• Ol Sam 118:22 (luk long Matiu 21:42; Ol Wok 4:10–11; 1 Pita2:7)

• Ol Sam 118:25–26 (luk long Matiu 21:9)

?Wanem nao ol trutok long ol ves ia i tijim yumi abaot Jisas Kraes? ?Hao nao blong save se ol trutok ia i blesem yu?

Taem yu stap ridim Ol Sam long wik ia, gohed blong teknot long ol narafala skripja we oli tijim yu abaot Sevya. Maet yu wantem rid o lisin long sam long ol fevret hym blong helpem yu tingbaot hem.

Ol Sam 119

Tok blong God bambae i kipim mi i stap long rod blong Hem.

Buk blong Ol Sam ia i gat plante sentens we bae i komperem laef blong yumi long wan rod blong yumi i gobak long Papa long Heven. Taem yu stap rid, lukaotem ol toktok ia olsem folem, rod, mo traehad. Tingting long rod blong laef blong yuwan—wea yu bin go long hem, wea ples yu stap long hem naoia, mo wanem rod yu stap folem naoia. ?Wanem nao yu lanem long buk blong ol sam ia abaot rod blong yu blong gobak long hom blong yu? Folem toktok long ol sam ia, ?wanem nao God i bin givim blong helpem yu stap long stret rod?

Maet bae yu intres blong save se long stret lanwis blong Hibru, ol fas eit ves long Ol Sam 119 i stat wetem fas leta blong Hibru alfabet. Nekis eit ves i stat wetem nekis leta, mo afta i go kasem en blong alfabet.

Luk tu long Aesea 42:16; 2 Nifae 31:17–21; Alma 7:19–20.

Ol Sam 134–36

Lod i gat moa paoa bitim eni narafala aedol.

Luksave ol risen we oli givim long Ol Sam 135:15–18 abaot from wanem hem i olsem wan krangke fasin blong trastem ol giaman god. ?Wanem nao bae i semmak long ol aedol ia we bae i save temtem yu blong yu trastem olsem we oli tokbaot long ol ves ia?

Maet yu wantem listim ol samting we i gat paoa we Lod i save mekem, olsem we oli tokbaot long Ol Sam 134–36. ?Wanem nao ol samting we oli gat moa paoa we Lod i bin mekem blong yu?

Ol Sam 146–50

“Yufala i presem Lod.”

Taem yu stap rid i go long ol las pat blong pres blong ol sam, tingbaot ol risen from wanem yu mas presem Lod. ?From wanem hem i impoten blong presem Lod? ?Wanem sam wei we yu save presem Lod?

Ol Aedia blong Famli Skripja Stadi mo Haos Naet

Ol Sam 119:105.Maet famli blong yu save krietem wan rod mo wokbaot long hem long tudak, yusum wan laet blong i saenem rod long fored. Taem yu stap wokbaot, yu save askem ol kwestin olsem: “?Wanem nao long ol laef blong yumi i olsem tudak ia?” o “Olsem wanem toktok blong God i olsem wan laet?” Singsing wan singsing abaot laet blong God, olsem “Tijim Mi blong Folem Laet Ia blong God” (STSP, 66), i save helpem yu blong mekem i kam strong prinsipol ia we oli tijim long Ol Sam 119:105.

Ol Sam 127–28.?Hem i minim wanem blong Lod i helpem yumi “bildim haos blong [yumi]? (Ol Sam 127:1). ?Olsem wanem nao bae yumi mekem Hem i kam pat long ol efot blong yumi blong krietem wan hom we i stret moa gud? Blong helpem famli blong yu ansa long kwestin ia, maet yu wantem dro wan haos long wan pis pepa mo katem olsem ol pis blong pasol. Biaen long wanwan pis ia, ol memba blong famli oli save raetem o dro ol wei blong mekem Lod i kam pat blong hom blong yu. Afta, oli save putum tugeta ol pasol ia. ?Wanem bakegen we yumi faenem long ol sam ia we i givim insperesen long yumi blong wokbaot long wei blong Lod?

Ol Sam 139.Afta we yu ridim ol ves 1–4, ol memba blong famli oli save tokbaot olsem wanem oli kam blong save se God i save olgeta wanwan (luk tu long ol ves 14–15, 23–24).

Ol Sam 146–50.Maet yu wantem blong invaetem famli blong yu blong ridim laod sam ves blong Ol Sam 146–50, mo traem blong soemaot ol filing blong man we i raet. ?Olsem wanem nao yumi soem pres blong yumi long Lod? Ol memba blong famli oli maet glad blong raetem ol sam blong olgetawan mo serem long wanwan long olgeta.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Tijim Mi blong Folem Laet Ia blong God,” STSP, 66.

Kam Antap long Fasin blong Yumi blong Stap Tij

Yusum samting long odio rekoding. Taem yu stap tijim famli blong yu, tingting blong lisin long odio vesen blong ol skripja, we i stap long ChurchofJesusChrist.org long Gospel Laebri ap. Blong stap lisin long ol sam, hem i gat moa paoa from se oli minim blong oli ridim olgeta laod.

“Plis yu givhan long mi blong oltaem mi stap obei long ol tok we yu yu putum, from oli mekem mi mi glad” (Ol Sam 119:35).