29 Ogis–4 Septemba

Ol Proveb1–4; 15–16; 22; 31; Prija 1–3; 11–12

“Sipos Man I Wantem Haremsave Mining blong Ol Samting, Hem I Mas Savegud Hae God”

Traem skelem se, olsem wanem nao stadi blong yu, long Ol Proveb mo Prija i save helpem yu blong “lisin long ol waestok ya, mo … traehad blong haremsave olgeta” (Ol Proveb 2:2).

Raetemdaon Ol Filing mo Tingting blong Yu

Long fas japta blong buk blong Ol Proveb, yumi faenem ol toktok ia: “Pikinini blong mi, yu yu mas lisin gud long ol samting we mi wetem mama blong yu, mitufala i stap tijim yu long hem, mo yu no mas lego ol samting ya” (Ol Proveb 1:8). Yumi save lukluk long Ol Proveb olsem wan grup blong ol waes toktok we oli kam long wan papa mo mama we oli gat lav, we stamba mesej blong tufala i we ol blesing blong pis mo gudlaef oli kam long olgeta we oli stap lukaotem blong kam waes—speseli kaen waes ia we God i stap givim. Be, afta long Ol Proveb, i gat buk blong Ol Prija, we i stap traem blong talem se: “i no simpol nating.” Prija ia we oli talem toktok blong hem long Ol Prija, i talem se “mi mekem tingting blong mi i strong blong faenemaot wanem i defren long fasin we i gat save mo fasin we i krangke, mo wanem i defren long tok blong man we i waes mo tok blong man we i no gat hed.” Be hem i luk se “samting ya i stap mekem hem i wari moa” mo “hem i harem nogud moa” (Prija 1:17–18). Long plante defren wei, buk ia i stap askem: “Bae i save gat wan samting we i gat ril mining long wan wol ia we i luk se evri samting i blong nating, i blong sot taem, mo i no save stap?”

Be yet, tufala buk ia i luk long laef long ol defren kaen lukluk, mo oli tijim ol semmak trutok. Prija i talemaot: “Antap long ol samting ya, wan samting nomo mi wantem talem long yu, se yu mas tinghevi long God, yu mas ona long hem, mo yu mas obei long ol tok blong hem, from we hemia nao samting we hem i mekem yumi from” (Prija 12:13). Hemia i semfala prinsipol we i stap truaot long Ol Proveb: “Yu mas trastem Hae God long olgeta tingting blong yu. … I nogud yu ting se yu yu wan waes man. Yu mas tinghevi long Hae God, yu mas ona gud long hem” (Ol Proveb 3:5,7). I nomata wanem laef i givim i kam, iven taem we yu luk se samting i fasfas mo i olbaot, oltaem, hem i gud moa taem yumi trastem Lod Jisas Kraes.

Blong gat wan bigfala lukluk long ol buk ia, luk long “Proveb, Toktok” mo “Prija” insaed long Gaed long Ol Skripja.

Ol Aedia blong Skripja Stadi blong Yuwan

Ol Proveb 1–4; 15–16

“Lisin long ol waestok ya.”

Buk blong Ol Proveb, insaed long hem i gat fulap niu tingting abaot waes. Tingting blong makem toktok ia, “waes” mo ol nara toktok we oli go wetem olsem “save” mo “andastaning,” olsem we yu faenem olgeta long ol japta 1–4 mo 15–16. ?Olsem wanem ol japta ia oli jenisim wei we yu tingting abaot waes? Folem wanem we yu faenem, ?olsem wanem nao yu tokbaot waes we “i kamaot long [Lod] nomo”? (Ol Proveb 2:6). Lukluk long wei we yu stap lukaotem help blong Lod blong yu “waes we yu gat hed” (Ol Proveb 16:21). ?Wanem blesing nao i kam from waes ia blong God?

Luk tu long Ol Proveb 8–9; Matiu 7:24–27; 25:1–13.

Ol Proveb 1:7; 2:5; 16:6; 31:30; Prija 12:13

?Wanem nao i “ona long Lod”?

Elda David Bednar i eksplenem: “Hem i no semmak long fraet ia blong wol we i mekem man i lukaot, mo i wari; fraet o ona long God i wan ples blong kasem pis, stret save, mo tras. … Hem i tekem wan dip filing blong bigfala kwaet, bigfala respek, mo sapraes long Lod Jisas Kraes; fasin blong stap obei long ol komanmen blong Hem; mo wet from Las Jajmen mo jastis long han blong Hem. … Blong stap fraet o gat respek long God i blong stap gat lav mo trastem Hem” (“Therefore They Hushed Their Fears,” Liahona, May 2015, 48–49).

Luk tu long Ol Proveb 8:13.

Ol Proveb 4

“Yu mas mekem gudfala plan fastaem, long ol samting we yu wantem mekem.”

Proverbs4 i tokbaot waes mo stret mo gud fasin olsem wan “rod”, o wan “wei” (luk tu long Ol Proveb 3:5–6). Taem yu stap ridim japta ia, maet bae yu faenem ol skripja we oli helpem yu blong tingting hevi long “plan” (ves 26) mo olsem wanem nao ol step blong yu oli stap tekem yu i go kolosap moa long Lod. Eksampol: ol ves ia, 11–12 mo 18–19 ?oli stap tijim wanem abaot ol blesing we wan i kasem taem hem i stap folem raet rod? ?Wanem nao ol ves mo 27 oli minim long yu?

Luk tu long 2 Nifae 31:18–21.

Ol Proveb 15:1–2, 4, 18,28; 16:24–32

“Spos yu toktok gud long wan man we i kros, bambae yu save mekem tingting blong hem i kam kwaet.”

Samfala long ol proveb we oli stap long ol japta 15 mo16 oli save givim insperesen long yu blong kam antap long wei we yu stap toktok wetem ol nara man, speseli olgeta we yu stap lavem olgeta. Eksampol: tingting long ol spesifik taem we yu bin save “toktok gud” be i no blong “toktok strong” (Ol Proveb 15:1). ?Olsem wanem nao kaonsel we i stap long Ol Proveb 16:24–32 i helpem yu tingting long ol toktok we yu stap yusum?

Tingting long niu tingting ia we i kam long Elda W. Craig Zwick: “Wan “kwaet toktok” i wan toktok we i gat mining long hem—ol toktok blong disiplin we i kam long wan hat we i stap daon. Hem i no minim se yumi neva tok stret, mo yumi tantanem trutok blong wan doktrin. Ol toktok we oli gat stret mo strong infomesen, oli save givim wetem wan spirit we i sofsof” (“What Are You Thinking?” Liahona, May 2014,42).

?Huia I Save Faenem Wan Woman wetem Klin Fasin?II, i kam long Louise Parker

Ol Proveb 31:10–31

“Woman we i stap ona long Hae God, i stret blong olgeta man evriwan oli stap leftemap nem blong hem.”

Ol Proveb 31:10–31 i tokbaot wanem i wan “[woman] we fasin blong hem i stret,” o wan woman we i gat paoa long saed blong spirit, i save wokem samting, mo i save lidim tingting blong man. Yu save traem blong yusum toktok blong yuwan, mo talemsot wanem ol ves ia oli stap talem abaot woman ia. ?Wijwan fasin blong hem nao we yu yu save traem mekem i semmak?

Prija 1–3;12

Laef long wol ia i blong sot taem.

?From wanem bae i impoten long yu blong tingbaot se plante samting long wol ia, olsem Prija 1–2 i talem, i “blong nating nomo” (o i blong sot taem, mo plante taem i no impoten)? ?Wanem nao yu faenem insaed long japta 12 we i mekem se laef i wan impoten samting?

Ol Aedia blong Famli Skripja Stadi mo Haos Naet

Ol Proveb.Maet famli blong yu i laekem blong krietem wan “buk blong Ol Proveb” blong yufalawan—hem i wan lis o grup blong ol waes kaonsel we oli kamaot long ol skripja, mo ol profet blong lata-dei.

Ol Proveb 1:7; 2:5; 16:6; Prija 12:13–14.Blong helpem ol memba blong famli blong oli andastanem Ol Proveb 1:7; 2:5; 16:6; Prija 12:13, bae i save help blong riplesem toktok ia, ona wetem ol toktok olsem gat respek, gat lav, o stap obei (luk tu long Hibrus 12:28). ?Olsem wanem hemia i jenisim wei we yumi stap tingting abaot ol ves ia? ?Olsem wanem nao yumi save soemaot se yumi gat ona long Lod?

Ol Proveb 3:5–7.Blong helpem ol famli blong gat wan pikja long wanem nao ol ves ia oli stap tijim, yu save invaetem olgeta blong oli lei long wan samting we i strong, mo i no save muv, olsem wol blong haos. Afta, oli save traem blong lei long wan samting we i no strong, olsem wan brum. ?From wanem nao bae yumi no “ting se yumi waesman”? ?Olsem wanem nao yumi soem se yumi trastem Jisas Kraes wetem ful hat blong yumi?

Ol Proveb 15:1–2,18; 16:24,32.?Olsem wanem nao ol toktok blong yumi i tajem spirit we i stap insaed long hom blong yumi? Maet ol memba blong famli oli save praktis blong givim wan “kwaet toktok,” be i no wan “strong toktok” mo i traem blong yusum wanem we oli lanem taem oli stap toktok wetem wanwan long olgeta. Wan singsing olsem “Kindness Begins with Me” (Children’s Songbook,145) i save help blong andastanem prinsipol ia gud moa.

Blong gat moa tingting blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “Where Love Is,” Children’s Songbook, 138–39.

Stap Kam Antap long Stadi blong Yuwan

Ol toktok blong ol skripja oli blong yumi evriwan. Sam long ol skripja oli tokbaot nomo ol man, o sam oli tokbaot ol woman nomo (olsem Ol Proveb 3:13; 31:10). Long plante kes, ol prinsipol long ol skripja ia oli blong evriwan.

“Long [evri samting] … yu mas tingbaot hem oltaem, mo … hem bambae i soemaot stret rod long yu … .” (Ol Proveb 3:6). Hem I Stap Lidim Mi, i kam long Yongsung Kim, havenlight.com