Stap Hilim Blaen Man, i kam long Carl Heinrich Bloch

19–25 Septemba

Aesea 40–49

“Yufala I Go Toktok Gud long Ol Man blong Mi. Yufala I Leftemap Tingting blong Olgeta”

Plante taem Aesea i yusum wan lanwis wetem ol simbol. Luklukgud long ol tingting mo filing we ol simbol ia oli tekem i kam long maen mo hat blong yu. Maet hemia bae i helpem yu blong andastanem wanem Hem i bin tijim.

Raetemdaon Ol Filing mo Tingting blong Yu

“Leftemap tingting” i wan long ol fasfala toktok blong Aesea; luk long japta 40. Toktok ia i makem stat blong wan defren tiun, wan samting defren we mesej blong profet i wantem tokbaot bigwan. Ol fasfala raeting blong Aesea oli bin stap givim woning long Isrel mo Juda se bae oli prapa lus evriwan mo bae oli stap slef from ol sin blong olgeta, be rili, ol profesi ia oli kam blong givim kamfot long Ol Jiu ova 150 yia long fiuja taem blong olgeta—afta we Jerusalem i lus evriwan, we i nomo gat tempol, mo ol pipol oli stap prisena blong Babilon. Be ol profesi ia oli go moa long fiuja bitim we i go long Ol Man Isrel we oli lus mo hat blong olgeta i brok. Ol profesi ia oli toktok long yumi, we samtaem tu, yumi filim se yumi lus, hat i brok mo yumi lusum rod.

Mesej blong Aesea i go long olgeta mo long yumi, i simpol nomo: “Yufala i no mas fraet” (Aesea 43:1). Be evri samting i no lus. Lod i no fogetem yu, mo Hem i gat paoa ova long sam situesen we yumi luk se yumi nomo save kontrolem olgeta. ?Hemia i no Lod ia we “Hem i wokem skae, … mo hem i wokem wol ya, … Hem nao i mekem we yumi wetem ol narafala samting ya, yumi evriwan i gat laef, yumi stap pulum win”? (Aesea 42:5). ?Yu no ting se Hem i gat moa paoa bitim Babilon, bitim sin, bitim eni samting we i stap holemtaet yu i prisena? “Yufala i mas kambak bakegen long mi!” Hem i plis long yumi olsem, “!Mi mi mekem yufala i fri!” (Aesea 44:22). Hem i save hilim, putumbak, mekem i kam strong moa, fogivim, mo givim kamfot—eni samting we yu nidim, long kes blong yu, blong Hem i pemaot.

Blong lanem olsem wanem Nifae mo Jekob oli yusum Aesea 48–49 long ol pipol blong olgeta, luk long 1 Nifae 22 mo 2 Nifae 6.

Ol Aedia blong Skripja Stadi blong Yuwan

Aesea 40–49

Jisas Kraes i save givim kamfot long mi blong givim hop long mi.

Maet bae Ol Man Isrel oli harem se tingting i slak, oli harem nogud tumas, blong oli stap prisena long Babilon. Maet plante bae oli askem olgetawan sapos oli bin lusum ples blong olgeta olsem wan pipol blong kavenan we God i jusum. Taem yu stap ridim Aesea 40–49, lukaotem ol skripja we maet oli bin givim yu kamfot mo hop. Blong wanwan skripja we yu faenem, tingting hevi mo raetemdaon wanem we Lod i save talem long yu long ol ves ia. Hemia samfala ves we yu save stat wetem:

• 40:11, 29–31:

• 41:10–13, 17–18:

• 42:6–7:

• 43:1–7,25:

• 44:1–4, 21–24:

• 46:3–4:

• 49:7–16:

?Olsem wanem bae yu save serem olgeta mesej ia wetem wan we i nid blong oli leftemap tingting blong hem, o givim hop long hem? (luk long Aesea 40:1–2).

Luk long Jeffrey R. Holland, “Wan Stret mo Klin Hop,”   Liahona, Mei 2020, 81–84.

Taem yumi stap obei long Lod, yumi save gat pis olsem wan reva we i stap ron (Aesea 48:18).

Aesea 40:3–8, 15–23; 42:15–16; 47:7–11

Paoa blong God i moa bigwan long paoa ia blong wol.

Aesea i bin ripitim mo mekem ol pipol blong hem oli tingbaot se paoa blong God, i no gat wan samting i semmak long hem, iven sapos oli komperem long paoa ia blong wol we i stap raonem yumi. Lukaotem mesej ia taem yu stap ridim Aesea 40:3–8, 15–23; 42:15–16; mo 47:7–11 (teknot se japta 47 i go long hem we i holemtaet Isrel i prisena, we i Babilon). ?Wanem nao ol skripja ia oli stap tijim yu abaot ol samting blong wol ia? ?Wanem nao ol ves ia oli tijim yu abaot God? Tingting hevi se from wanem nao mesej ia, maet bae i impoten tumas long Ol Jiu we oli prisena i stap. ?From wanem i impoten tumas long yu?

Luk tu long “Abide with Me!” Hymns, no.166.

Aesea 41:8–13; 42:1–7; 43:9–12; 44:21–28; 45:1–4; 48:10; 49:1–9

“Yu yu wokman blong mi.”

Truaot long Aesea 40–49 Lod i stap toktok long “wokman” blong Hem mo ol “witnes” blong Hem. Long sam skripja, ol toktok ia, i luk olsem se i stap tokbaot Jisas Kraes (luk long Aesea 42:1–7), ol narawan oli tokbaot haos blong Isrel (luk long Aesea 45:4), mo sam narawan oli tokbaot King Saeras we i bin letem Ol Jiu blong gobak long Jerusalem mo bildimbak tempol (luk long 44:26–45:4). Long wanwan kes ia, bae yu save tingting long hao ol skripja ia oli blong yu olsem wan wokman mo wan witnes blong Lod. Eksampol: tingting hevi long ol kwestin olsem:

Aesea 41:8–13; 42:6; 44:21. ?Wanem nao Lod i singaotem yu blong mekem? Tingting long ol nomol koling blong Jos, mo tu, ol nara kavenan responsabiliti blong givim seves long Hem. ?Olsem wanem Hem i stap sapotem yu mo holem han blong yu (Aesea 42:6) taem yu stap givim seves long Hem? ?Long wanem wei nao Hem i mekem yu yu kam wokman blong Hem? (luk tu long Aesea 48:10).

Aesea 43:9–12. ?Long wanem wei nao yu yu wan witnes blong Jisas Kraes? ?Wanem eksperiens long laef blong yu i bin soem se Hem i Sevya?

Aesea 49:1–9. ?Wanem mesej yu yu faenem insaed long ol ves ia we i save help taem we ol hadwok blong yu mo seves blong yu oli “no win, … o oli blong nating” nomo? (ves 4).

Luk tu long Mosaea 18:9; Henry B. Eyring, “A Child and a Disciple,” Ensign o Liahona, May 2003, 29–32.

Ol Aedia blong Famli Skripja Stadi mo Haos Naet

Aesea 40:3–4.Blong lukluk moa se i minim wanem blong “mekemrere {wei blong Lod],” famli blong yu i save stretem wan samting we i kruked, kliarem wan floa we samting i stap olbaot long hem, o kliarem wan graon wetem ston. Mo tu, yu save soem ol pikja blong Jon Baptaes mo Josef Smit (luk long Gospel Art Buk, ol namba 35,87). ?Olsem wanem nao oli bin mekem rod i rere blong Lod i kam? (luk long Luk 3:2–18; Doktrin mo Ol Kavenan 135:3). ?Long wanem wei nao bae yumi help blong mekem rod i rere blong Hem i kam? (eksampol, luk long Doktrin mo Ol Kavenan 33:10).

Aesea 40:28; 43:14–15; 44:6.?Wanem nem o taetol blong Jisas Kraes nao yumi faenem long ol ves ia? ?Wanem nao wanwan nem i stap tijim yumi abaot Hem?

Aesea 41:10; 43:2–5; 46:4.Olgeta ves ia, oli kamaot long hym ia: “Tijing blong Jisas Oli Stamba blong Yumi” (STSP, pej 6). Maet bae famli blong yu i laekem blong singsing long hym ia tugeta, mo faenem ol sentens we oli semmak long ol ves ia. ?Wanem nao ol sentens ia oli stap tijim yumi abaot Jisas Kraes?

Aesea 44:3–4; 45:8.Afta we yufala i ridim ol ves ia, famli blong yu i save wotarem wan plant long sem taem we yufala i tokbaot ol blesing we Lod i bin kapsaetem long olgeta. ?Wanem nao i hapen long wan plante taem yumi givim wota long hem? ?Wanem nao Lod i wantem luk yumi mekem taem bae Hem i blesem yumi?

Aesea 48:17–18.Tingting blong soem ol pikja o ol vidio blong ol reva mo ol wef blong solwota. ?Olsem wanem nao bae pis i semmak olsem wan reva? ?Olsem wanem nao stret mo gud fasin i save stap olsem ol wef?

Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “Tijing blong Jisas Oli Stamba blong Yumi,” STSP, pej 6.

Stap Kam Antap long Stadi blong Yuwan

Talem mining blong ol toktok. Traem lukaotem mining blong ol toktok we yu no andastanem insaed long ol skripja—mo tu, ol toktok we yu ting se yu andastanem. Samtaem, ol mining ia oli save helpem yu blong ridim wan ves i defren, mo bae yu save kasem wan niu lukluk long saed blong spirit.

“Mifala ia i man blong Hae God, mifala i stap harem nogud tumas, be hem bambae i gat sore long mifala, hem bambae i leftemap tingting blong mifala” (Aesea 49:13).Pomad blong Giliad, i kam long Ann Adele Henrie