Kraes i werem wan hat blong King we oli mekem wetem ropnil, mo ol soldia oli stap jikim hem

Taem Oli Jikim Kraes, i kam long Carl Heinrich Bloch

26 Septemba–2 Oktoba

Aesea 50–57

“Olgeta Samting we I Stap Mekem Yumi Harem Nogud, Hem I Karem Olgeta Evriwan. Ol Sobodi we Hem I Karem, Hemia Ol Sobodi blong Yumi”

Tingting hevi long ol niu tingting we yu kasem aot long Aesea 50–57 we i helpem yu blong go kolosap moa long Sevya. Raetemdaon ol filing mo tingting we yu kasem.

Raetemdaon Ol Filing mo Tingting blong Yu

Truaot long seves blong hem, Aesea i tokbaot wan strong man blong sevem ol man (eksampol, luk long Aesea 9:3–7). Olgeta profesi ia, bae oli mas impoten tumas ia long Ol Man Isrel plante handred yia afta, taem we oli bin stap prisena long Babilon. Wan we bae i kapsaetem ol wol blong Babilon ia, i tru, bae hem i wan strong man blong faet. Be hemia i no kaen Mesaea ia we Aesea i bin tokbaot long ol japta 52–53: “Nao yumi lukluk nogud long hem, yumi tanem baksaed long hem. Hem i wan man we i harem nogud plante taem, mo i savegud olgeta samting we i stap mekem man i harem nogud. Yumi tanem fes blong yumi, olsem we hem i nating nomo, mo i no gat man i save lukluk i go long hem.… Be yumi, yumi ting se God nomo i stap panisim hem, hem nao i stap kilim hem, i stap mekem hem i harem nogud” (Aesea 53:3–4). Taem Hem i bin sendem kaen man ia blong mekem man i kam fri, God i tijim yumi abaot tru fasin blong kam fri. Blong sevem yumi long strong rul, mo hadtaem, God i bin sendem Wan ia we Hemwan “oli mekem i strong tumas long hem, mo … [hem i harem nogud].” Long ples we sam oli ting blong luk wan laeon, be Hem i sendem wan smol sipsip i kam (luk long Aesea 53:7). I tru. Ol wei blong God oli no ol wei blong yumi (luk long Aesea 55:8–9). Jisas Kraes i mekem yumi kam fri, i no taem Hem i jes openem doa blong kalabus, be taem Hem i kam tekem ples blong yumi. Hem i karemaot ol jen blong krae sore mo harem nogud blong yumi, mo i tekem olgeta long Hemwan (luk long Aesea 53:4–5,12). Hem i no go stap longwe mo stap sevem yumi. Hem i stap safa wetem yumi, tru long wan aksen “[wan lav we i neva finis samtaem]” mo “[bae i neva gowe long yufala]” (Aesea 54:8, 10).

stadi blong yuwan pikja aekon

Ol Aedia blong Skripja Stadi blong Yuwan

Aesea 50–52

Fiuja i gud tumas long ol pipol blong Lod.

Iven we Ol Man blong Isrel oli spendem plante yia olsem prisena—mo iven we oli bin prisena from oli no mekem gud joes—Lod i bin wantem olgeta blong luk i go long fiuja wetem hop. ?Wanem mesej we i gat hop we i stap long Aesea 50–52? ?Wanem nao Lod i stap tijim yumi abaot Hemwan long ol japta ia, mo from wanem hemia i givim hop long yumi? (eksampol, luk long Aesea 50:2, 5–9; 51:3–8, 15–16; 52:3, 9–10).

Yu save mekem lis blong evri samting long ol japta 51–52 we Lod i stap invaetem Isrel blong mekem blong fiuja ia i wan tru samting. ?Wanem nao yu filim se Lod i wantem yu blong mekem tru long ol toktok ia? Eksampol: ?Yu yu ting se i minim wanem blong “girap” mo “kam long paoa”? (Aesea 51:9; luk tu long Aesea 52:1; Doktrin mo Ol Kavenan 113:7–10). ?Yu ting se from wanem nao, invitesen ia blong “lisin gud” ( o lisin wetem tingting blong stap obei), oli stap ripitim plante taem. (Russell M. Nelson, “Lisin Gud long Hem,” Liahona, Mei 2020, 89).

Luk tu long Mosaea 12:20–24; 15:13–18; 3 Nifae 20:29–46.

wan kaving blong Kraes we i stap karem kros

From Lav, i kam long woman blong mekem kaving, Angela Johnson

Aesea 53

Jisas Kraes i tekem long Hemwan ol sin blong mi, mo ol sobodi blong mi.

Samfala japta long skripja oli tokbaot misin ia blong pemaot man, we i blong Jisas Kraes; oli tokbaot hemia long wan moa naes wei long Aesea 53. Tekem taem blong tingting hevi long ol toktok ia. Wetem evri ves, stop smol, mo lukluk gud long wanem we Sevya i bin safa—ol harem nogud, mo ol fasin blong brekem loa we Hem i bin tekem—blong evri pipol, mo speseli, blong yu. Maet yu save riplesem ol toktok olsem “yumi” mo “blong yumi” wetem “mi” mo “blong mi” taem yu stap rid i go. ?Wanem filing o tingting nao, ol ves ia oli givim long yu olsem insperesen? Tingting blong raetemdaon ol samting ia.

Maet yu wantem luklukbak long Mosaea 14; 15:1–13 blong luk olsem wanem profet Abinadae i bin yusum ol toktok blong Aesea blong tij abaot Sevya.

Aesea 54; 57:15–19

Jisas Kraes i wantem mi blong gobak long Hem.

Yumi evriwan i gat ol taem we yumi filim se yumi stap longwe long Lod from ol sin o ol wiknes blong yumi. Sam, oli givap hop ia se bae Hem i fogivim olgeta wan dei. Aesea 54 mo57 oli ol gudfala japta blong ridim, blong mekem tingting blong yumi i kwaet mo blong leftemap tingting blong yumi long ol kaen taem olsem. Speseli long Aesea 54:4–10; 57:15–19, ?wanem nao yu yu lanem abaot sore blong Sevya mo abaot ol filing we Hem i gat abaot yu? ?Wanem defren samting nao hemia i mekem insaed long laef blong yu taem yu yu save ol samting ia abaot Hem?

?Olsem wanem nao, ol blesing we oli tokbaot long Aesea 54:11–17, oli blong yu tu?

Aesea 55–56

Lod i stap invaetem evriwan blong “yufala i holem ol tok blong promes blong mi.”

Blong plante jeneresen, Isrel i bin stap olsem kavenan pipol blong God. Be, plan blong God, oltaem insaed i gat moa bitim wan nesen, from se “[olgeta]evriwan we i tosta,” Lod i invaetem olgeta blong “kam” (Aesea 55:1). Kipim hemia long maen blong yu taem yu stap ridim Aesea 55 mo56, mo tingting hevi long wanem nao i minim blong stap wan pipol ia blong God. ?Wanem nao hem i mesej blong God long olgeta we oli filim se oli seperet long Hem blong oltaem? (Aesea 56:3). Tingting blong makem ol ves ia we oli tokbaot ol fasin mo ol aksen blong olgeta we oli “stap holem ol tok blong promes” (luk long Aesea 56:4–7).

famli stadi pikja aekon

Ol Aedia blong Famli Skripja Stadi mo Haos Naet

Aesea 51–52.Taem yufala i stap toktok raon long ol invitesen blong Lod insaed long ol japta ia, yu save invaetem ol memba blong famli blong aktem olgeta. Olsem, ?Hem i olsem wanem blong “luklukgud long skae,” blong “wekap, girap,” o blong no “sidaon long graon … be girap”? (Aesea 51:6,17; 52:2). ?Wanem nao ol sentens ia oli stap tijim yumi abaot fasin blong stap biaen long Jisas Kraes?

Aesea 52:9.Afta we yufala i ridim ves ia, famli blong yu i save “singsing tugeta” wan hym o wan singsing blong ol pikinini, we i mekem olgeta oli glad. ?Wanem promes nao we i stap long Aesea 52 we i mekem yumi harem glad we glad?

Aesea 52:11; 55:7.Olgeta ves ia oli save lidim yufala blong toktok raon long wanem sentens ia: “Yufala i mas stap klin” i save minim. Olsem pat blong ol toktok storian blong yufala, yufala i save luklukbak long ol topik long Blong Ol Yut Oli Kam Strong (buklet, 2011) o ridim ol skripja abaot ol blesing blong stap klin long saed blong spirit (luk long 3 Nifae 12:8; Doktrin mo Ol Kavenan 121:45–46).

Aesea 53.Blong presentem wanem we Aesea i tokbaot abaot Sevya, famli blong yu i save tokbaot olsem wanem ol stori, ol muvi, mo ol nara media oli stap soemaot ol hiro we oli stap sevem ol pipol. Yu save komperem olgeta storian ia wetem ol toktok we oli tokbaot Sevya, we yu stap ridim long Aesea 53. Mo tu, yu save wajem “My Kingdom Is Not of This World” (ChurchofJesusChrist.org) mo tokbaot olsem wanem ol profesi long Aesea 53 oli stap kamtru. ?Wanem nao long ol krae sore mo harem nogud ia we Sevya i stap tekem long bihaf blong yumi?

Aesea 55:8–9.?Olsem wanem ol samting ia oli stap luk defren taem yu stanap antap moa bitim graon? ?Hem i minim wanem long yu se ol wei mo ol tingting blong God oli hae moa bitim hemia blong yumi?

Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “Mi Sapraes Tumas we Jisas Hem I Lavem Mi,” STSP, pej 22.

Stap Kam Antap long Stadi blong Yuwan

Yusum miusik. Ol hym oli stap tijim ol prinsipol blong gospel wetem paoa. Tingting blong stap lisin o blong stap ridim ol hym blong sakramen blong helpem yu blong andastanem ol trutok abaot Atonmen blong Jisas Kraes we oli stap tijim long Aesea 53. (Luk long Teaching in the Savior’s Way, 22.)

Pikja blong fes blong Kraes

Laet blong Hem, i kam long Michael T. Malm