Jisas Insaed long Laet blong Hem, i kam long Greg K. Olsen

3–9 Oktoba

Aesea 58–66

“!Ol Man blong Mi! Bambae Mi Mi Kam long Taon Ya Jerusalem”

Taem yu stap stadi long Aesea 58–66, tingting long wei we ol toktok blong Aesea oli tekem glad mo hop blong fiuja i kam long yu.

Raetemdaon Ol Filing mo Tingting blong Yu

Long stat blong seves blong Hem long wol ia, Jisas Kraes i bin visitim wan haos blong prea long Nasaret, vilej ia we Hem i bin groap long hem. Long ples ia, Hem i bin stanap blong ridim ol skripja, i openem buk blong Aesea, mo i ridim wanem we, tedei, yumi save olsem Aesea 61:1–2. Nao, hem i anaonsem: “Tedei, long taem ya we yufala i stap lesin … God i stap mekem ol samting we tok ya i talem, oli kamtru.” Hemia i wan long ol stret tok we Sevya i bin talem, se Hem nao God i bin Jusum Hem, Hem we bae i hilim ol hat we oli brokbrok, mo blong talemaot long ol man se bae oli kam fri. (luk long Luk 4:16–21). Skripja ia, i tru, i kamtru long dei ia. Mo, olsem plante nara profesi blong Aesea, hem i gohed blong i kamtru long taem blong yumi tedei. Sevya i gohed blong hilim ol brokbrok hat we oli stap go long Hem. I gat plante prisena i stap we bae oli mas prijim fasin blong kam fri. Mo i gat wan fiuja blong glori blong stap rere from—wan taem we Lod bae i “mekem niufala heven mo niufala wol bakegen,” (Aesea 65:17) mo “hem bambae i mekem we yumi kam stret man, mo we yumi stap presem hem long fes blong ol man blong ol narafala kantri” (Aesea 61:11). Taem yumi ridim Aesea, i openem ae blong yumi long wanem Lod i bin mekem finis, wanem Hem i stap mekem naoia, mo wanem bambae Hem i mekem yet blong ol pipol blong Hem.

Ol Aedia blong Skripja Stadi blong Yuwan

Aesea 58:3–12

Fasin blong livim Kakae i karem ol blesing oli kam.

Olgeta ves ia oli talem se, long plante Man Isrel, fasin blong livim kakae i moa olsem wan hevi samting bitim we hem i wan blesing. Plante long yumi i save andastanem filing ia samtaem. Sapos yu wantem faenem moa mining mo stamba tingting long saed blong livim kakae, ridim Aesea 58:3–12 blong faenemaot ansa blong Lod long kwestin ia: “?From wanem yumi stap livim kakae?” Long eksperiens blong yu, ?olsem wanem nao fasin blong livim kakae i save katemaot ol rop blong nogud fasin, mo brekem evri yok? (Aesea 58:6). ?Long wanem wei nao, fasin blong livim kakae i tekem ol blesing i kam we oli stap tokbaot long Aesea 58:8–12? ?Olsem wanem nao Aesea 58:3–12 i jenisim wei we yu tingting abaot fasin blong livim kakae?

Long mesej blong hem long Mei 2015, Presiden Henry B. Eyring i serem samfala eksampol long wei we ol pipol oli gat blesing ia taem oli bin livim kakae mo kasem fas ofring.?Hemia Nao Fasin blong Livim Kakae We Mi Bin Jusum?”Jeneral Konfrens. ?Yu yu bin witnesem ol semmak blesing long laef blong yu?

Luk tu long Gospel Topics, “Fasting and Fast Offerings” (topics.ChurchofJesusChrist.org).

Aesea 59:9–21; 61:1–3; 63:1–9

Jisas Kraes I Sevya mo Ridima blong Mi.

Long Aesea 58–66 bambae yu faenem plante refrens long misin ia blong Jisas Kraes, we i blong pem praes from sin. Hemia samfala eksampol, wetem sam kwestin blong helpem yu blong tingting hevi long olgeta skripja ia.

• Aesea 59:9–21. ?Hao nao bae yu save talemsot, situesen long saed blong spirit, blong ol pipol we oli stap tokbaot olgeta long ol ves 9–15? ?Wanem nao i tajem yu long wei we oli tokbaot man ia we bae i toktok long bihaf blong yumi, long ol ves 16–21, mo kavenan ia we Hem i mekem wetem olgeta we oli tanem olgeta, oli luk i go long Hem?

• Aesea 61:1–3. ?Olsem wanem nao Jisas i bin blesem yu long ol wei we oli tokbaot long ol ves ia? ?Wanem sam “gudfala nius” we Hem i tekem i kam long yu? ?Olsem wanem nao Lod i bin givim yu ol samting we oli naes, be i no ol asis?

• Aesea 63:7–9. “?Wanem nao sam fasin blong lav blong Lod? Ol ves ia, ?insaed long hat blong yu, oli givim yu wanem kaen filing long Sevya?

?Wanem nara refrens long Sevya yu yu faenem long Aesea 58–66?

Luk tu long Mosaea 3:7; Doktrin mo Ol Kavenan 133:46–53.

“Mi mi Hae God, mi nomo bambae mi laet blong yufala, gogo i no save finis” (Aesea 60:19). Wan Presen we I Laet, i kam long Eva Timothy

Aesea 60; 62

“Mi mi Hae God, mi nomo bambae mi laet blong yufala, gogo i no save finis.”

Aesea 60 mo62 oli stap tokbaot laet mo tudak, ol ae mo fasin blong luk, blong stap tijim wei we gospel blong Jisas Kraes bambae i blesem wol ia long ol las dei. Lukaotem ol aedia ia, speseli long Aesea 60:1–5, 19–20; 62:1–2. Taem yu stap ridim ol japta ia, tingting hevi long wei we God i stap pulum tugeta ol pikinini blong Hem aot long tudak i go long laet blong Hem. ?Wanem nao rol blong yu long wok ia?

Luk tu long 1 Nifae 22:3–12; 3 Nifae 18:24; Doktrin mo Ol Kavenan 14:9; Bonnie H. Cordon, “Blong Oli Save Luk,” Liahona, Mei 2020, 78–80.

Aesea 64:1–5; 65:17–25; 66

Kraes bambae i rul long wol ia long taem blong Mileniom.

Aesea i tokbaot wan wei taem we “ol trabol ia we oli kasem yufala bifo, bambae oli finis olgeta, yufala i nomo save tingbaot olgeta” (Aesea 65:16). I nomata we yumi luk se profesi ia i kam blong mekem plante samting i kamtru, long ful mining blong hem, dei ia i stap kam yet—taem Jisas Kraes bambae i kambak long wol ia, mo i statem wan taem blong pis mo stret mo gud fasin, we yumi stap singaotem, Mileniom. Aesea i tokbaot dei ia long fiuja long Aesea 64:1–5; 65:17–25; 66. Tek not long hamas taem nao hem i yusum ol toktok olsem “glad” mo “stap glad.” Tingting hevi long kwestin se, from wanem kambak blong Sevya ia, bambae i wan dei blong yu yu stap glad long hem. ?Wanem nao yumi save mekem blong rere from taem ia we bae Hem i kam?

Luk tu long Ol Toktok blong Bilif 1:10; Russell M. Nelson, “Fiuja blong Jos: Stap Mekem Wol I Rere blong Seken Kaming blong Sevya,” Liahona, Epril 2020, 6.

Ol Aedia blong Famli Skripja Stadi mo Haos Naet

Aesea 58:3–11.Maet ol memba blong famli bae oli save andastanem gud moa mesej blong Aesea abaot fasin blong livim kakae sapos oli aktem kaen fasin blong livim kakae ia we oli tokbaot long Aesea 58:3–5 mo kaen fasin blong livim kakae ia we oli tokbaot long Aesea 58:6–8. ?Olsem wanem nao yumi save mekem taem we yumi stap livim kakae, i olsem fasin ia we God i bin jusum? ?Wanem blesing yu yu bin kasem afta we yu bin livim kakae?

Aesea 58:13–14.?Wanem i defren bitwin “[faenem glad blong yuwan” mo “kasem glad ia” long Lod long Sabat dei? ?Olsem wanem yu save mekem Sabat i “wan glad”?

Aesea 60:1–5.Taem yu stap ridim Aesea 60:1–3, ol memba blong famli oli save onem wan laet taem ol ves oli tokbaot laet, mo oli ofem taem ol ves oli tokbaot tudak. ?Olsem wanem gospel ia blong Jisas Kraes i olsem wan laet long yumi? ?Wanem nao Aesea i bin luk finis se bae i hapen taem we ol pipol blong God oli serem laet ia blong gospel? (luk long Aesea 60:3–5).

Aesea 61:1–3.Long ol ves ia, ?olsem wanem nao Sevya i mekem ol profesi blong Aesea oli kamtru? Yu save invaetem ol memba blong famli blong oli lukaotem ol pikja blong Sevya we oli filim se i soemaot ol defren pat blong misin blong Hem (ol pikja ia, yu save faenem olgeta long Gospel Art Buk). Mo tu, yu save singsing wan singsing abaot wei we Sevya i blesem yumi, olsem “I Feel My Savior’s Love” (Children’s Songbook, 74–75).

Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “When He Comes Again,” Children’s Songbook, 82–83.

Stap Kam Antap long Stadi blong Yuwan

Stap rere ol samting raon long yu. Wanem i stap raon long yumi i save spolem hamas yumi save lanem samting. Faenem wan ples blong stadi long ol skripja, wan ples we yu save filim paoa blong Spirit. (Luk long Teaching in the Savior’s Way, 15.)

“!Yufala i girap! !Naoia i taem blong taon ya blong yufala i saen olsem san! !Mi mi Hae God, mo bigfala laet we i soemaot we mi mi stap, bambae i saen i kam long hem!” (Aesea 60:1). Laet mo Laef i kam long Mark Mabry