“17–23 Oktoba. Jeremaea 30–33; 36; Ol Krae 1; 3: ‘Olgeta we Naoia Oli Stap Harem Nogud, Oli Stap Krae, Mi Mekem Olgeta Oli Harem Gud Bakegen,’” Kam Folem Mi—Blong Wanwan Man, Woman mo Famli: OlTesteman 2022 (2021)
“17–23 Oktoba. “Jeremaea 30–33; 36; Ol Krae 1; 3,” Kam Folem Mi—Blong Wanwan Man, Woman mo Famli: 2022
Krae blong Jeremaea, we i Profet, i kamaot long wan kaving we i kam long Nasarin Skul
17–23 Oktoba
Jeremaea 30–33; 36; Ol Krae 1; 3
“Olgeta we Naoia Oli Stap Harem Nogud, Oli Stap Krae, Mi Mekem Olgeta Oli Harem Gud Bakegen”
Taem yu stap raetemdaon ol tingting mo filing blong yu long wik ia, tingbaot olsem wanem olgeta prinsipol long Jeremaea mo Ol Krae oli joen wetem sam nara samting we yu bin lanem insaed long OlTesteman.
Raetemdaon Ol Filing mo Tingting blong Yu
Fas taem we Lod i singaotem Jeremaea i kam profet, Hem i talem long hem se misin blong hem i blong “pulumaot, … mo brekemdaon” (Jeremaea 1:10)—mo long Jerusalem i bin gat plante nogud fasin blong pulumdaon mo brekemdaon. Be, hemia i wan pat ia nomo blong misin blong Jeremaea—God i bin singaotem hem tu blong “wokemgud, … mo blong stanemap” olgeta (Jeremaea 1:10). ?Wanem nao oli save wokemgud mo stanemap long wan ples we faet blong Ol Man Isrel, i prapa spolem gud. Semmak, taem we sin o wanem we i kam agens long laef blong yumi i livim laef blong yumi i prapa nogud i stap, ?olsem wanem yumi save wokemgud bakegen mo stanemap samting? Ansa i stap long “wan man we i kamaot biaen long King Deved ya bifo. Man ya bambae i wan stret man, mo mi bambae mi putumap hem i kam king” (Jeremaea 33:15), we Hem i Mesaea we God i promesem. Mesaea i tekem “wan niu kavenan” (Jeremaea 31:31)—wan kavenan we i nidim moa bitim wan komitmen we man i luk aotsaed. Loa blong Hem, “mi bambae mi putum loa blong mi long tingting blong yufala, mo bambae mi raetemdaon long hat blong yufala.” Hemia nao ril mining blong “mi bambae mi God blong yufala, mo yufala bambae i man blong mi” (Jeremaea 31:33). Hem i wan samting we bae i hapen long wan ful laef, mo bambae yumi stap mekem mistek yet, mo bambae wanwan taem blong yumi krae sore. Be taem yumi mekem, yumi kasem promes ia we i kam long Lod: “Olgeta we naoia oli stap harem nogud, oli stap krae, mi bambae mi leftemap tingting blong olgeta, mi mekem olgeta oli harem gud bakegen” (Jeremaea 31:13).
Blong gat wan bigfala lukluk long Buk blong Ol Krae, luk long “Ol Krae, Buk blong Ol” insaed long Gaed long Ol Skripja (olskripja.ChurchofJesusChrist.org).
Ol Aedia blong Skripja Stadi blong Yuwan
Lod bae i tekem Isrel i kamaot long fasin blong stap prisena, mo bae i mekem olgeta oli kam tugeta wan ples.
Long Jeremaea 30–31; 33 Lod i luksave krae mo konkon harem nogud (Jeremaea 31:15) we Ol Man Isrel bae oli filim taem oli stap go stap olsem prisena. Be, Hem i givim ol toktok blong kamfot mo hop. ?Wanem sentens nao, insaed long ol japta ia, yu yu ting se bae i mekem Ol Man Isrel oli harem gud mo gat hop? ?Wanem promes nao yu yu faenem se Lod i givim long ol pipol blong Hem? ?Olsem wanem nao olgeta promes i oli blong yu tu, tedei?
“Mi bambae mi God blong yufala, mo yufala bambae i kam man blong mi bakegen.”
Nomata we Ol Man Isrel oli bin brekem kavenan blong olgeta wetem Lod, Jeremaea i bin profesae se Lod bambae i stanemap bakegen wan niu “promes … we bambae i stap oltaem, gogo i no save finis” wetem ol pipol blong Hem (Jeremaea 31:31; 32:40). Promes ia we i niu mo i stap oltaem gogo i no save finis” hem i “ gospel blong Jisas Kraes we i fulwan [luk long Doktrin mo Ol Kavenan 66:2]. Hem i niu evri taem we Hem i talemaot tru long revelesen bakegen afta wan taem blong apostasi. Hem i stap gogo i no save finis long wei ia we, hemia i promes blong God, mo i kamaot long evri dispensesen blong gospel, long ples we ol pipol oli glad blong kasem” (Gaed long Ol Skripja, “Kavenan we I Niu mo I No Gat En,” olskripja.ChurchofJesusChrist.org; oli ademap italik).
Taem yu stap ridim Jeremaea 31:31–34; 32:37–42, tingting hevi se hem i minim wanem long yu blong yu pat blong kavenan pipol ia. ?Olsem wanem nao, ol ves ia oli jenisim wei we lukluk long kavenan rilesensip blong yu wetem God? ?Hem i minim wanem blong letem Hem i raetem loa blong Hem long hat blong yu? (luk long Jeremaea 31:33).
Luk tu long Jeremaea 24:7; Hibrus 8:6–12.
Ol skripja oli save givim insperesen long yumi blong sakem sin, mo tanem yumi long Lod.
Ol skripja oli gat paoa blong tanem mi, blong mi tanem baksaed blong mi long ivel.
Lod i givim komanmen long Jeremaea blong hem i raetemdaon ol profesi blong hem long wan “buk,” mo i eksplenem se sapos ol pipol oli wantem harem ol profesi ia, “[ i blong ol toktok ia oli mekem evri man oli tanem baksaed long ol nogud fasin blong olgeta, blong mi save fogivim ol nogud fasin blong olgeta]” (Jeremaea 36:2–3). Taem yu stap ridim Jeremaea 36, tingting blong raetemdaon olsem wanem olgeta pipol ia oli bin filim abaot ol profesi ia:
Lod:
Jeremaea:
Baruk:
Jehudi mo King Jehoeakim:
Elnatan, Delaea mo Gemaria:
Tingting hevi long olsem wanem yu filim abaot ol skripja mo rol blong olgeta long laef blong yu. ?Olsem wanem oli bin helpem yu blong tanem baksaed blong yu long ivel, o rabis fasin?
Luk tu long Julie B. Beck, “My Soul Delighteth in the Scriptures,” Ensign o Liahona, May 2004, 107–9.
Lod i save karemaot harem nogud we yumi stap fesem from sin.
Buk blong Ol Krae, i wan grup blong ol poem we oli raetem afta we God i prapa spolem gud Jerusalem mo tempol blong hem. ?From wanem nao yu ting se i impoten blong oli holemtaet gud mo oli putum buk blong ol krae ia insaed long OlTesteman? Tingting se, ol pikja toktok we oli stap long Ol Krae 1 mo3, wanem nao oli stap helpem yu blong andastanem abaot bigfala harem nogud we Isrel i bin filim. ?Wanem mesej blong hop long Kraes nao yu yu faenem? (luk speseli long Ol Krae 3:20–33; luk tu long Matiu 5:4; Jemes 4:8–10; Alma 36:17–20).
Ol Aedia blong Famli Skripja Stadi mo Haos Naet
-
Jeremaea 31:3.?Olsem wanem nao Papa long Heven mo Jisas Kraes oli stap soem lav ia we i no save finis we Tufala i gat long yumi? Sapos yu soem ol pikja blong ol samting we Kraes i bin krietem blong yumi, o i bin mekem blong yumi long laef blong Hem long wol ia, i save helpem famli blong yu blong filim we Hem i stap lavem man tumas.
-
Jeremaea 31:31–34; 32:38–41.Tingting blong mekem wan lis blong ol samting, we oli stap long ol ves ia, we Lod i promesem taem yumi mekem ol kavenan wetem Hem. ?Wanem nao ol stori ia oli stap tijim yumi long hem long saed blong hamas ol skripja oli impoten?
Ol memba blong famli oli save raetem (o dro) long ol pepa hat wan samting we i soem olsem wanem oli stap filim abaot Sevya. ?Wanem nao i minim blong gat loa blong Hem we Hem i raetem long hat blong yumi? (luk long Jeremaea 31:33). ?Olsem wanem yumi soem long Lod we yumi wantem stap ol pipol blong Hem?
-
Jeremaea 36.?olsem wanem nao yu save yusum Jeremaea 36 blong helpem famli blong yu blong i lan abaot hamas ol skripja oli impoten? (eksampol, luk long ol ves 1–6, 10, 23–24, 27–28,32). Yu save askem wan memba blong famli blong ridim wan ves aot long japta ia, mo wan nara memba blong famli i raetem ves ia, semmak olsem Baruk i bin mekem blong Jeremaea. ?From wanem nao yumi stap talem tangkyu from ol hadwok blong ol pipol olsem Baruk, we oli bin holemtaet ol toktok blong ol profet? ?Wanem nao yumi save mekem blong soem long Lod we yumi tekem ol toktok blong Hem long ol skripja se oli impoten?
-
Ol Krae 3:1–17, 21–25, 31–32.Olsem wan famli, yufala i save tokbaot olsem wanem ol filing we oli talemaot long Ol Krae 3:1–17 i go wetem ol filing we yumi gat taem yumi mekem sin. ?Olsem wanem ol mesej insaed long ol ves 21–25, 31–32 oli lidim tingting blong yu long laef blong yu?
Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.
Wan singsing: “I Feel My Savior’s Love,” Children’s Songbook, 74–75.
Stap Kam Antap long Stadi blong Yuwan
Lukaotem revelesen. Taem yu stap tingting hevi truaot long dei, yu save kasem moa aedia mo filing abaot ol skripja we yu bin stadi long olgeta. Yu no tekem se, gospel stadi, i wan samting we yu mas “mekem taem from”, be tekem se i wan samting we yu stap mekem oltaem. (Luk long Teaching in the Savior’s Way, 12.)
Jeremaea we I Krae from Jerusalem I Stap Lus, i kam long Rembrandt van Rijn