Jeremaea, i kam long Walter Rane

10–16 Oktoba

Jeremaea 1–3; 7; 16–18; 20

“Taem Mi Mi No Wokem Yu Yet long Bel blong Mama blong Yu, Be Mi Mi Save Yu Finis”

Elda David A. Bednar i bin talem: “Wan long ol wei we mi mi stap harem [Lod], hem i insaed long ol skripja. Ol skripja, oli voes blong Lod we oli bin rekodem, o raetemdaon finis bifo i kam” (“‘Hear Him’ in Your Heart and in Your Mind,” ChurchofJesusChrist.org).

Raetemdaon Ol Filing mo Tingting blong Yu

Long fas taem, Jeremaea i no ting se bae hem i save kam wan gudfala profet. “Mi mi no save toktok,” hem i talem long fas taem ia we Lod i singaotem hem(Jeremaea 1:6). Lod i talem gud long hem: “Naoia, mi mi givim tok blong mi long yu” (ves 9). Jeremaea i filim se hem i wan pikinini we i no gat eksperiens (ves 6), be Lod i eksplenem se hem i rere finis bitim wanem hem i tingting long hem—Lod i bin odenem hem long koling ia iven bifo hem i bon i kam long wol ia (luk long ves 5). Mekem se Jeremaea i putum fraet blong hem i go long saed, mo i akseptem koling ia. Hem i bin givim woning long ol king mo ol pris blong Jerusalem se, fasin ia blong priten blong stap tabu, bae i no sevem olgeta blong oli lus evriwan. “Pikinini” i a we i tingting se hem i no save toktok, i kam blong filim toktok blong God insaed long hat blong hem se i wan faea we i bon, mo hem i nomo save sarem maot blong hem (Jeremaea 20:9).

Stori blong Jeremaea i stori blong yumi tu. God i bin save yumi tu, bifo yumi bon, mo i mekem yumi rere blong mekem wok ia blong Hem long wol. Wetem sam samting moa, wok ia i tekem wan samting we Jeremaea i bin luk finis: kam tugeta ia blong ol pipol blong God, wan afta wan, blong “tekem olgeta oli kam long Saeon” (Jeremaea 3:14). mo iven sapos yumi no save stret wanem blong mekem o talem, yumi no mas fraet, … from Lod i talem se Hem i stap wetem yumi (Jeremaea 1:8,19).

Blong gat wan bigfala pikja abaot buk blong Jeremaea, luk long “Jeremaea” insaed long Gaed long Ol Skripja.

Ol Aedia blong Skripja Stadi blong Yuwan

Jeremaea 1:4–19; 7:1–7; 20:8–10

God i singaotem ol profet blong oli talem toktok blong Lod.

Taem yu stap rid long Jeremaea 1:4–19 abaot singaot blong God long Jeremaea blong hem i kam profet, tingting hevi long rol blong ol profet long laef blong yu. ?Wanem nao yu lanem abaot ol profet aot long ol toktok blong Jeremaea? (luk tu long Jeremaea 7:1–7). Prijing blong Jeremaea, we plante taem, oli stap sakemaot (luk long Jeremaea 20:8,10). ?Wanem nao yu lanem aot long ol toktok blong Jeremaea, we oli stap long Jeremaea 20:9? Kipim ol tingting ia oli stap insaed long maen blong yu truaot long stadi blong yu abaot ol tijing blong Jeremaea. ?Wanem nao yu faenem insaed long ol ol tijing ia we oli givim yu insperesen blong folem ol lata-dei profet blong yumi?

Jeremaea 1:5

God i bin save mi bifo mi bon i kam long wol ia.

Bifo Jeremaea i bon i kam long wol ia, God i bin save hem, mo i bin jusum hem, mo i bin odenem hem bifo, blong hem i mekem wan spesifik misin long wol ia (luk long Jeremaea 1:5). ?Yu ting se bae i from wanem nao i impoten tumas long Jeremaea blong hem i mas save samting ia?

God i bin save yu tu bifo yu bon i kam long wol ia, mo i odenem yu finis long samfala spesifik responsabiliti (luk long Alma 13:1–4; Doktrin mo Ol Kavenan 138:53–56; Ebraham 3:22–23). ?Save ia, i mekem wanem samting i defren insaed long laef blong yu? Sapos yu kasem wan petriakel blesing finis, yu save prea mo luklukbak long hem mo askem God wei blong mekem wanem we Hem i bin odenem yu finis blong mekem.

Luk tu long Gaed long Ol Skripja: “Odenem Man Bifo i Kam long Wol, Fasin blong,” “Laef Bifo Laef long Wol Ia,” olskripja.ChurchofJesusChrist.org.

Ol pipol long Isrel blong bifo oli yusum lasitern blong storem wota, we oli nidim tumas.

Jeremaea 2; 7

“Yufala i gowe long mi, we mi mi olsem wan springwota, we i save givim laef.”

Long draeples we Ol Man Isrel oli bin stap laef long hem, ol pipol oli putumgud wota we oli nidim tumas insaed long ol bigfala tank andanit graon we oli singaotem, lasitern. ?From wanem nao, blong kasem wota long wan springwota, i moa gud bitim blong stap dipen long lasitern? ?Hem i minim wanem blong ronwe long “springwota we i save givim laef”? Long tingting blong yu, ? “tang we i brok” we oli tokbaot long Jeremaea 2:13 hem i simbol blong wanem? Taem yus tap ridim Jeremaea 2 mo7, luk olsem wanem ol pipol oli bin stap ronwe long ol wota we i save givim laef, blong Lod, mo tingting se wei we yu stap akseptem wota ia we i stap givim laef insaed long laef blong yu.

Jeremaea 7 i go long olgeta we oli kam insaed long “doa blong haos blong [Lod] … blong mekem wosip long [Lod]” (Jeremaea 7:2). Be yet, i nomata long hao man i luk aotsaed se oli ol man blong God, oli bin rong from oli gat fulap nogud fasin (luk long ol ves 2–11). ?Wanem mesej nao yu yu filim se Lod i gat blong yu insaed long ol ves 21–23?

Jeremaea 3:14–18; 16:14–21

Lod i stap pulum tugeta ol pipol blong Hem.

Taem we Jeremaea i bin talem profesi abaot kam tugeta blong Isrel we i seraot olbaot, hem i bin talem se wok ia bae i moa bigwan bitim long Eksodas, o taem ia we oli muvaot long Ijip (luk long Jeremaea 16:14–15). Long wan semmak tingting, Presiden Russell M. Nelson i bin talem: “yufala i kam daon long wol ia long wan taem we oli makem stret blong yufala, … blong help karem i kambak Isrel. I nogat wan samting we i stap hapen long wol ia naoia we i moa impotem bitim hemia. Kam tugeta ia, i mas minim evri samting long yu. (Russell M. Nelson and Wendy W. Nelson, “Hope of Israel” [wol yut divosen, 3 Jun 2018], i go wetem New Era mo Ensign, Aug. 2018, 12, ChurchofJesusChrist.org).

Taem yu stap stadi long Jeremaea 3:14–18; 16:14–21, ?wanem nao i givim insperesen long yu long saed blong las dei wok blong mekem Isrel i kam tugeta? ?Wanem nao ol ves ia oli stap talem abaot wei we kam tugeta ia i mas hapen? ?Wanem nao sam moa tingting we yu yu faenem long nara haf blong mesej blong Presiden Nelson, we oli tokbaot antap ia?

Ol Aedia blong Famli Skripja Stadi mo Haos Naet

Jeremaea 1:5.Yu save yusum ves ia blong tokbaot laef blong yumi wetem Papa long Heven bifo yumi bin bon i kam long wol ia. Ol risos olsem “Mi Bin Laef long Heven” (singpraises.net/collections/bi/music-from-the-liahona) mo “Fas Toktok: Plan blong Papa blong Yumi long Heven” (long Ol Niu Testeman Stori, 1–5) oli save help. ?Olsem wanem nao, taem yu save abaot laef blong yumi bifo laef long wol ia, i save jenisim wei we yumi stap laef long wol ia?

Jeremaea 2:13; 17:13–14.Blong helpem ol famli blong gat wan pikja long wanem nao ol ves ia oli stap tijim, yu save soemaot wanem i hapen taem yu putum wota insaed long wan samting we i brok smol. ?Wanem nao ol “wota we i save givim laef” mo “ol tang we oli brokbrok” oli stap ripresentem? (Jeremaea 2:13). ?Olsem wanem yumi stap dring wota we i stap givim laef we i kam long Lod?

Jeremaea 16:16.Presiden Russell M. Nelson i komperem ol man blong pulum fis mo ol man blong sutum pijin insaed long ves ia, wetem ol Ol Lata-dei Sent misinari (luk long “The Gathering of Scattered Israel,” Ensign o Liahona, Nov. 2006, 81). Ol memba blong famli oli save lukaotem ol samting raon long hom blong yu, o oli save tokbaot olsem wanem wan i save “pulum fis” o “lukaotem pijin” blong mekem Isrel we i seraot i kam tugeta.

Jeremaea 18:1–6.Blong luklukgud long ol ves ia, yufala i save toktok raon o soem olsem wanem oli stap mekem graonpot. ?Wanem mesej nao Lod i givim long Isrel insaed long Jeremaea 18:1–6? ?Hem i minim wanem blong stap olsem graon ia long han blong Lod? (luk tu long Aesea 64:8). Blong luk wan nara stori we i komperem yumi long graon blong man blong wokem graonpot, luk long mesej blong Elda Richard J. Maynes “The Joy of Living a Christ-Centered Life” (Ensign o Liahona, Nov. 2015, 27–30).

Blong gat moa tingting blong tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “Israel, Israel, God Is Calling,” Hymns, no. 7.

Stap Kam Antap long Fasin blong Yumi blong Stap Tij

Yusum ol stori. Plante taem, Sevya i bin tij wetem ol stori. Tingting long ol stori we i kamaot long laef blong yuwan, we i mekem wan prinsipol blong gospel i kam laef. (Luk long Teaching in the Savior’s Way, 22.)

“?Weswe? ?Yufala i ting se mi mi no gat raet blong mekem long yufala olsem we man blong wokem graonpot ya i mekem long graon ya blong hem? Yufala i stap long han blong mi, stret olsem we graon blong wokem graonpot i stap long han blong man blong wokem graonpot” (Jeremaea 18:6).