Profet Aesea I Tokbaot Finis Taem Kraes Bae I Bon, i kam long Harry Anderson

5–11 Septemba

Aesea 1–12

“Hae God I God blong Mi, mo Hem I Stap Sevem Mi”

Lukaotem blong Spirit i lidim yu taem yu stap stadi. Nifae i tijim se ol toktok blong Aesea “oli klia long olgeta we oli fulap wetem spirit blong profesi” (2 Nifae 25:4).

Raetemdaon Ol Filing mo Tingting blong Yu

Iven sapos hemia i fas taem we bae yu ridim buk blong Aesea, bae yu faenem ol skripja we oli saon semmak. Hemia i we, aot long evri profet blong Ol Testeman, Aesea i wan we plante long olgeta oli bin kwotem, o talem bakegen toktok blong hem long ol nara buk blong ol skripja, mo Sevya tu Hemwan i bin yusum ol toktok blong Aesea. Ol toktok blong Aesea bae oli kamaot plante taem long ol hym, mo ol nara tabu miusik. ?From wanem oli stap ripitim toktok blong Aesea plante taem?

Wan pat blong risen ia, i we, Aesea i bin gat presen ia blong talemaot toktok blong God long wan kaen lanwis we man i save tingbaot isi. Be i moa long hemia. Aesea i bin givim insperesen long ol profet blong plante jeneresen from se ol trutok we hem i bin stap tijim, oli pas tru long jeneresen blong hem—Ol Man Isrel we oli bin stap laef bitwin 740 mo 701 BKB. Rol blong hem i blong openem ae blong yumi long bigfala wok ia blong God blong pemaot ol man, we i moa bigwan bitim wan nesen, o wan taem. Aot long Aesea, Nifae i bin lanem se hem mo ol pipol blong hem, nomata we oli seperet long haf blong Isrel, oli bin stil pat blong ol kavenan pipol blong God. Olgeta we oli bin raetem Niu Testeman, oli bin faenem, insaed long Aesea, ol profesi abaot Mesaea we oli stap hapen stret long fored blong ae blong olgeta. Mo insaed long buk blong Aesea, Josef Smit i bin faenem insperesen from lata-dei wok ia blong mekem Isrel i kam tugeta, mo wok ia blong bildimap Saeon. ?Taem yu stap ridim Aesea ?wanem nao yu faenem?

Blong save moa abaot Aesea mo ol raeting blong hem, luk long “Aesea” long Gaed long Ol Skripja. Blong gat moa infomesen abaot taem ia we Aesea i bin stap laef long hem, luk long 2 King 15–20 mo 2 Kronikel 26–32.

Ol Aedia blong Skripja Stadi blong Yuwan

Aesea 1–12

?Olsem wanem nao mi save andastanem gud moa ol tijing blong Aesea?

Taem Hem i bin stap tokbaot ol raeting blong Aesea, Lod i talem: “Yufala i mas stadi ol samting ia wetem strong tingting; from ol toktok blong Aesea oli bigwan tumas” (luk 3 Nifae 23:1–3). Yet, long plante, Aesea i wan buk we i had blong andastanem. Hemia i sam help blong yu faenem moa bigfala mining long ol toktok blong Aesea:

• Tingting hevi long ol simbol, ol pikja toktok we Aesea i bin yusum. Eksampol: tingting hevi long wanem yu ting se Aesea i wantem blong talem taem hem i stap raet abaot wan plantesen (luk long Aesea 5:1–7), ol wota blong Siloa (luk long Aesea 8:5–10), wan saen (luk long Aesea 5:26), mo wan flag (luk long Aesea 11:10,12).

• Afta evri japta we yu stap ridim, askem yuwan: “?Wanem nao mi mi lanem abaot Jisas Kraes?” (luk long 1 Nifae 19:23).

• Lukaotem sam topik we i go stret wetem laef blong yumi tedei, olsem laef mo misin blong Jisas Kraes, taem we Isrel i seraot mo kambak tugeta, mo Mileniom. Yu save mekem tu wan lis blong ol refrens aot long Aesea we oli stap tij abaot ol topik ia.

• Yusum ol tul blong stadi, olsem diksonari, ol futnot blong Baebol, ol japta heding, mo Gaed long Ol Skripja.

Luk tu long 2 Nifae 25:1–8.

Aesea 1; 3;5

“Stop blong stap mekem rabis samting.”

Oltaem nomo, Aesea i stap givim woning long Kingdom blong Juda abaot situesen blong olgeta long saed blong spirit. Afta we yu ridim Aesea 1, 3, mo 5, ?olsem wanem bae yu tokbaot situesen blong ol pipol ia, long saed blong spirit? ?Wanem woning nao yu faenem we i blong yusum tu long taem blong yumi tedei?

Antap long ol woning, yu save teknot tu long ol mesej blong hop i go long Isrel ia we i fulap long sin (eksampol, luk long Aesea 1:16–20, 25–27; 3:10). ?Wanem nao yumi lanem abaot Lod, aot long ol mesej ia?

Aesea 2; 4; 11–12

God bae i mekem wan bigfala wok long ol lata-dei ia.

Plante long ol raeting blong Aesea, oli ol profesi we oli gat spesifik mining tedei. ?Wijwan long ol toktok blong Aesea we i tokbaot gud moa ol las dei we yumi stap long hem, long ol japta 2; 4; 11–12 mo wijwan nao i givim moa insperesen long yu? (Doktrin mo Ol Kavenan 113:1–6 i givim wan niu wei blong lukluk long Aesea 11.) ?Wanem nao yu lanem abaot kam tugeta ia blong Isrel mo wok blong pemaot Saeon? Afta we yu ridim olgeta japta ia,?wanem insperesen nao i kam long yu blong yu go mekem?

Luk tu long Aesea 5:26; 10:20.

Aesea 6

God i singaotem ol profet.

Long japta 6, Aesea talem bakegen stori blong taem we God i singaotem hem i kam profet. Taem yu stap ridim japta ia, ?wanem nao i tajem tingting blong yu long saed blong wanem Aesea i stap gotru long hem? ?Olsem wanem japta ia i lidim wei we yu stap tingting long hem abaot Lod, ol profet blong Hem mo wok ia we God i singaotem olgeta blong mekem?

“Wan pikinini boe bambae i bon long mifala. Pikinini ya, bambae yu yu givim long mifala” (Aesea 9:6).

Aesea 7–9

Aesea i stap profesae abaot Jisas Kraes.

Long stat blong seves blong Aesea, Kingdom blong Isrel (we oli singaotem Efrem) i joen wetem Siria blong oli difendem olgeta agensem Asiria. Isrel mo Siria i bin wantem blong fosem Ahas, king blong Juda blong joenem tufala. Be Aesea i bin talem profesi finis se bae hemia i no save hapen mo i bin givim kaonsel long Ahas blong trastem Lod (luk long Aesea 7–9, speseli Aesea 7:7–9; 8:12–13).

Taem we Aesea i givim kaonsel long Ahas, hem i talem sam profesi ia, we fulap oli save long ol, olsem olgeta profesi we oli stap long Aesea 7:14; 8:13–14; 9:2, 6–7. Hem i no klia tumas se wanem nao ol profesi ia oli minim long Ahas long tetaem ia, be oli stret long Jisas Kraes (luk tu long Matiu 1:21–23; 4:16; 21:44; Luk 1:31–33). ?Wanem nao yu lanem abaot Sevya long ol ves ia?

Ol Aedia blong Famli Skripja Stadi mo Haos Naet

Aesea 1:16–18.Blong helpem ol memba blong famli blong andastanem ol ves ia, yu save ridim seksen ia “Sam long Yumi I Filim se Yumi Neva Gud Inaf” we i kamaot long mesej blong Sista Sharon Eubank: “Kraes: Laet Ia we I Stap Saen long Tudak” (  Liahona, Mei 2019,75). O, yu save soem olsem wanem oli save karemaot ol strong mak aot long ol klos. ?Olsem wanem nao mesej ia blong Lod insaed long ol ves ia oli defren long wanem Setan i wantem yumi blong biliv long hem?

Aesea 2:1–5.Ol memba blong famli oli save jusum wan long ol ves ia mo droem wanem ol ves ia oli stap tokbaot. ?Wanem nao tempol i stap tijim yumi abaot ol wei blong Lod? ?Olsem wanem nao yumi gat blesing taem yumi save “wokbaot long laet blong Lod”? (Aesea 2:5).

Aesea 4:5–6.?Wanem nao Lod i promesem yumi long ol ves ia? ?Yu ting se ol promes ia oli minim wanem? ?Olsem wanem nao Hem i mekem olgeta promes ia oli kamtru? (Luk tu long Eksodas 13:21–22.)

Aesea 7:14; 9:1–7.Yusum ol droing o ol pikja we oli kamaot long ol magasin blong Jos, mo mekem wan posta we i soemaot sam long ol samting we yumi stap lanem abaot Jisas Kraes aot long ol ves ia.

Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “Antap, Antap Tumas, Flaeg blong God Hem i Flae,” STSP, pej 30.

Stap Kam Antap long Stadi blong Yuwan

Askem Lod blong kasem sam help. Blong andastanem ol skripja, yumi nidim revelesen we i blong yumiwan nomo. Lod i bin promesem: “Sipos yufala i wantem samting, yufala i mas … askem, mo yufala i mas … lukaot, nao bambae yufala i … faenem, mo yufala i mas … kilkilim doa, nao bambae doa i save open …” (Matiu 7:7).

Aesea i bin tijim se tabenakol bae i “wan gudfala sefples,” mo “ren mo win i no save spolem olgeta” (Aesea 4:6).Aedaho Fol Aedaho Tempol