Tabu Bus, i kam long Brent Borup

12–18 Septemba

Aesea 13–14; 24–30;35

“From Samting Ya, Bambae Mi Mi Mekem Olgeta Oli Sek. Bambae Mi Stap Mekem Ol Samting blong Sapraes”

Presiden Bonnie H. Cordon i bin tijim: “Ol skripja oli givim laet long maen blong yumi, oli fidim spirit blong yumi, oli ansarem ol kwestin blong yumi, oli mekem yumi gat moa tras long Lod, mo oli helpem yumi mekem laef blong yumi i lukluk nomo long Hem” (“Trust in the Lord and Lean Not,” Liahona, May 2017,7).

Raetemdaon Ol Filing mo Tingting blong Yu

Wan long ol samting we Lod i askem ol profet blong mekem, hem i blong givim woning abaot ol risal blong sin. Long kes blong ol profet blong OlTesteman, plante taem, hemia i minim blong talem long ol man we oli gat paoa mo oli rul long ol bigfala kingdom, se oli mas sakem sin, o bae oli lus. Hem i bin wan wok ia we i gat denja, be Aesea i no bin gat fraet, mo ol woning blong hem i go long ol kingdom blong dei ia—we i tekem Isrel, Juda, mo ol nesen raonabaot—oli bin tok stret mo oli bin klia (luk long Aesea 13–23).

Be, Aesea i bin gat tu wan mesej blong hop. Iven we ol taem we ol ples mo samting oli prapa lus evriwan long ol kingdom ia, olsem we hem i talem long profesi, oli bin hapen, Aesea i bin luk finis se bae i gat wan janis blong evri samting i kambak mo i kam niu. Lod bae i invaetem ol pipol blong Hem blong gobak long Hem. Bae Hem i mekem “ples we i sanbij nomo, we i hot tumas, bambae i gat bigfala lagun i stap long hem. Long graon we i drae we i drae, ol springwota bambae oli kamaot long hem” (Aesea 35:7). Bambae Hem i mekem “[wan wok blong sapraes]” (Aesea 29:14), mo bae i putumbak long Isrel, ol blesing ia we Hem i bin promesem olgeta. Aesea o eni narawan i no bin laef long tetaem ia blong luk gudfala wok ia. Be yumi stap luk we wok ia i stap hapen tedei. Be wanem i tru, i we, !yumi pat long hem!

Ol Aedia blong Skripja Stadi blong Yuwan

Aesea 13:1–11, 19–22; 14:1–20

Ol kingdom blong wol ia, we oli gat nogud fasin, mo ol man blong rul blong olgeta, bambae oli foldaon.

Aesea 13–14 oli singaotem se “visen” (wan profesi mesej abaot) Babilon (Aesea 13:1). Long wan taem, Babilon i bin wan strong kingdom wetem wan man blong rul we i gat paoa. Tedei oli tekem se Babilon i pat blong histri. ?So from wanem mesej ia i go long Babilon i impoten long yumi tedei? Long ol skripja, Babilon i simbol blong hae tingting, fasin we i folem fasin blong wol, mo sin, mo tedei, evri samting ia oli stap raon long yumi. Tingting abaot ol simbol taem yu stap ridim Aesea 13:1–11, 19–22; 14:1–20. Yu save traem ol kwestin olsem olgeta ia:

• ?Olsem wanem nao ol woning i go long Babilon oli semmak long ol profesi abaot wol ia bifo Seken Kaming blong Sevya (luk long Aesea 13:1–11; Doktrin mo Ol Kavenan 45:26–42).

• ?Wanem samting yu luk se i semmak bitwin hae tingting blong king blong Babilon mo hae tingting blong Setan? (luk long Aesea 14:4–20; Moses 4:1–4). ?Wanem woning yu yu faenem we i blong yuwan, insaed long ol ves ia?

• ?Olsem wanem nao Sevya i givim “spel [long ol harem nogud blong yumi mo fraet blong yumi]”? (Aesea 14:3).

Hem I Kam Bakegen blong Hem I Rul mo I King, i kam long Mary R. Sauer

Aesea 24:21–23; 25:6–8; 26:19; 28:16

Ol raeting blong Aesea oli poenem mi i go long Jisas Kraes.

Ol tijing blong Aesea, plante taem oli tokbaot misin blong Sevya, wetem sakrifaes blong Hem we i pem praes from sin, Laef Bakegen long Ded blong Hem, mo Seken Kaming. ?Wanem pat blong misin blong Hem i kam long maen blong yu taem yu stap ridim olgeta ves ia: Aesea 24:21–23; 25:6–8; 26:19; 28:16? ?Wanem nara ples long skripja bae yu yu faenem we i mekem yu yu tingbaot Sevya?

Luk tu long Aesea 22:22–25.

Aesea 24:1–12; 28:7–8; 29:7–10; 30:8–14

Apostasi, hem i minim blong tanem baksaed long Lod mo ol profet blong Hem.

Blong givim woning abaot ol risal blong tanem baksaed long Lod, mo blong sakemaot ol profet blong Hem, Aesea i yusum plante defren kaen pikja toktok. I gat, wan wol we i emti (Aesea 24:1–12), fasin blong stap drong (Aesea 28:7–8), fasin blong stap hanggri mo tosta (Aesea 29:7–10), wan wol blong haos we i brok o wan graon pot we i brokbrok (Aesea 30:8–14). Folem wanem we yu bin ridim long ol ves ia, ?from wanem hem i impoten blong stap kipim ol kavenan blong yumi? Tingting long wanem nao yu stap mekem blong yu stap tru long Lod mo long wokman blong Hem.

Luk tu long M.Russell Ballard, “Stay in the Boat and Hold On!” Liahona, Nov. 2014, 89–92; Gospel Topics, “Apostasy,” topics.ChurchofJesusChrist.org.

Aesea 29; 30:18–26;35

Lod i save mekem gud, o putumbak ol samting we oli lus o brokbrok.

Taem we ol pipol o ol sosaeti oli tanem olgeta longwe long Lod, Setan i wantem se bae yumi tingting se ol risal ia, bae oli no save tanem o jenisim bakegen. Be, Aesea i tokbaot sam gudfala samting we Lod bambae i mekem taem ol pipol oli sakem sin mo oli tanem olgeta i go long Hem. ?Wanem nao yu lanem aot long Aesea 29:13–24; 30:18–26;35 abaot Lod, lav blong Hem, mo paoa blong Hem?

Wan wei we Lod i soemaot paoa blong Hem long taem blong yumi tedei, hem i tru long Restoresen blong gospel blong Hem. Aesea 29, insaed long hem i gat samfala skripja we oli ron saedsaed long wanem i bin hapen long Restoresen. Eksampol:

• Komperem Aesea 29:11–12 wetem 2 Nifae 27:6–26 mo Josef Smit—Histri 1:63–65.

• Komperem Aesea 29:13–14 wetem Doktrin mo Ol Kavenan 4 mo Josef Smit—Histri 1:17–19.

• Komperem Aesea 29:18–24 wetem taetol pej blong Buk blong Momon.

?Wanem filing o tingting blong yu abaot Restoresen blong gospel olsem we yu bin stap ridim long ol skripja ia?

Luk tu long “Restoresen blong Gospel blong Jisas Kraes, we I Fulwan: Tu Handred Yia Ofisol Toktok I Go long Wol” (www.churchofjesuschrist.org/study?lang=bis).

Ol Aedia blong Famli Skripja Stadi mo Haos Naet

Aesea 25:4–9.?Weswe? ?Famli blong yu i bin gat blesing ia finis blong gat wan sef selta long taem blong strong win o i bin gat wan sed long wan dei we i bin hot tumas? (luk long ves 4). Tokbaot hemia taem yu ridim ol ves ia mo ol nara samting abaot Lod we yu faenem insaed long Aesea 25:4–9. ?Olsem wanem nao Lod i semmak long olgeta samting ia?

Aesea 25:8–9; 26:19.Soem ol pikja blong Sevya long Getsemane, antap long kros, mo afta we Hem I Laef Bakegen long Ded; hemia i save helpem famli blong yu blong luk olsem wanem ol ves ia oli joen long Jisas Kraes (luk long Gospel Art Buk, ol namba 56, 57, 58,59). Invaetem famli blong yu blong serem from wanem oli stap glad from Hem i sevem yumi (Aesea 25:9).

Aesea 29:11–18.Ol ves ia oli save helpem famli blong yu blong toktok raon long gudfala wok mo wan sapraes (ves 14) blong Restoresen blong gospel mo tu, wok blong Buk blong Momon i kamtru. ?From wanem nao ol samting ia oli gudfala mo oli wan sapraes long yumi? Invaetem ol memba blong famli blong faenem ol samting insaed long hom blong yu, we oli ripresentem ol gudfala blesing blong Restoresen.

Aesea 35.Maet bae famli blong yu i laekem blong droem ol pikja long japta ia we i helpem yumi blong andastanem olsem wanem Jisas Kraes i stap bildimap Saeon long taem blong yumi tedei. ?Wanem nao yumi lanem aot long ol pikja ia? ?Wanem nao yumi save mekem blong help blong bildimap Saeon?

Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “On a Golden Springtime,” Children’s Songbook,88.

Stap Kam Antap long Fasin blong Yumi blong Stap Tij

Letem ol pikinini oli soem wanem oli krietem. Taem ol pikinini oli krietem wan samting we i go wetem wan prinsipol blong gospel, hemia i stap helpem olgeta blong andastanem gud moa prinsipol ia. Letem olgeta blong bildimap samting, dro, kala, raet mo krietem wan samting. (Luk long Teaching in the Savior’s Way,25.)

“!Hae God i God blong yumi! Yumi stap trastem hem, mo hem i sevem yumi. Oltaem yumi stap trastem hem, mo yumi save harem gud, yumi save glad, from we hem i sevem yumi.” (Aesea 25:9). James Tissot (French, 1836–1902). Woman, Luk Pikinini blong Yu (Stabat Mater), 1886–1894. Strong kala peinting ova long grafit antap long grei pepa we oli wivim, Pikja: 11 11/16 x 6 inj (29.7 x 15.2 sm). Brooklyn Miusiom, Oli pem tru long pablik sabskripsen, 00.159.300