!Stap Insaed long Bot mo Hang Strong!
I Kam long Elda M. Rasel Balad
Blong Kworom blong Olgeta Twelef Aposol
Sapos yumi gohed blong lukluk nomo long Lod, Hem i promesem yumi wan blesing we yumi no save komperem.
I no longtaem i pas, wan fren blong mi i tekem boe blong hem long trip daon long Kolorado Reva tru long Katarak Kanion we i stap long Saot Is Yuta. Kanion ia i samples 23 kilometa long wetem ol strong taed we i wan denja.
Blong rere long trip blong tufala, tufala i ridim gud ol samting long intanet pej blong Nasonal Pak Seves, we i gat ol impoten infomesen long olsem wanem nao blong rere long yuwan, mo ol denja we oli stap.
Long stat blong trip, wan long ol reva gaed we i gat eksperiens i talem bakegen ol sefti toktok, mo i ripitim trifala rul we bae i mekem grup i stap sef tru long ol strong taed ia. “Rul nambawan: !Stap insaed long bot! Rul nambatu: !Oltaem werem laefjaket! Rul nambatri:!Oltaem hang strong wetem tufala han!” Mo afta, hem i talem bakegen, i strong moa: “Antap long evri samting ia, tingbaot rul nambawan:!Stap insaed long bot!”
Trip ia i mekem mi tingbaot rod blong yumi long wol ia. Plante long yumi i gotru ol taem long laef taem wota i kwaet mo yumi laekem. Long sam nara taem, yumi fesem ol strong taed we yumi save komperem long ol strong taed ia we oli 23 kilometa long long Katarak Kenion—long ol jalenj ia i save gat problem blong helt blong bodi mo tingting, ded blong famle, ol drim mo hop oli brokbrok, mo—blong sam—wan jalenj blong fet, taem yumi fesem ol problem, ol kwestin mo plante tingting blong laef.
Lod, long gud fasin blong Hem, i givim help, wan bot, ol samting we yumi nidim olsem laefjaket, mo wan reva gaed we i gat eksperiens, we i lidim man, mo i givim sefti toktok blong helpem yumi blong go raon long reva blong laef i go kasem las ples we yumi mas stap long hem.
Bae yumi tingting long rul nambawan: “!Stap insaed long bot!”
Presiden Brigham Yang, oltaem i yusum toktok ia, “Olfala Sip Saeon” blong tokbaot Jos blong Jisas Kraes blong Ol Lata-dei Sent.
Wan taem hem i talem: “Yumi stap long medel blong bigfala solwota. Wan strong win i kam, mo olsem ol kru oli talem, sip i wokhad tumas. Wan i talem: “Bae mi no stap ia;” “Mi no biliv se hemia nao “Sip Saeon.” “Be yumi stap long medel blong bigfala solwota ia.” “Mi no wantem save. Bae mi no stap ia.” Kot i aot, mo i jiam long solwota. ?Bae hem i no draon? Yes. Mo olgeta tu we oli stap aot long Jos. Hemia “Olfala Sip Saeon, bae yumi stap insaed long sip.”1
Long wan nara taem, Presiden Yang i talem se hem i wari tu long ol pipol we oli stap lusum rod taem oli stap kasem ol blesing—taem we laef i gud.: “Hem i long gudtaem, mo olfala sip blong Saeon i sel wetem smol kwaet win, mo taem evri samting i kwaet long sip, nao sam brata oli wantem go aot long ol welbot blong go swim smol; mo sam oli draon, mo ol narawan oli glis i go longwe, mo ol narawan oli kambak bakegen long sip. Bae yumi stap nomo insaed long olfala sip, mo bae i tekem yumi i go long sef haba; yu no nid blong stap wari.”2
Mo laswan, Presiden Yang i mekem ol Sent oli tingbaot hemia: “Yumi stap long olfala sip Saeon. … God i lidim sip, mo bae i stap ia. … Evri samting i oraet, singsing Aleluia, from Lod i stap. Hem i talem samting, i gaedem, mo daerektem yumi. Sapos ol pipol oli gat ful tras long God blong olgeta, oli neva livim kavenan o God blong olgeta. Bae Hem i lidim yumi long raet wei.”3
Wetem ol jalenj we yumi evriwan i fesem tedei, ?olsem wanem nao yumi stap long Olfala Sip ia, Saeon?
!Hem i olsem ia! Yumi nidim blong gotru long wan jenis long laef we i gogohed taem yumi gat moa fet long Jisas Kraes mo stap moa fetful long gospel blong Hem long ful laef blong yumi—i no wan taem nomo, be blong oltaem. Alma i askem: “Mo nao luk, mi talem long yufala, ol brata [mo sista] blong mi, sapos yufala i bin gat wan jenis we i hapen long hat, mo sapos yufala i bin wantem blong singim singsing blong lav blong pemaot man, bae mi askem, ?yufala i save filim samting ia naoia?”4
Reva gaed we i gat eksperiens, tedei i olsem ol aposol mo ol profet blong Jos mo ol lokol prishud mo okseleri lida wetem insperesen. Oli helpem yumi stap sef mo kasem las ples we yumi mas stap long hem.
I no longtaem i pas, mi toktok long semina blong ol niu misin presiden mo givim advaes ia long ol lida ia:
“Mekem ol ae blong misin oli stap nomo long ol lida blong Jos. Bae mifala i no lidim yufala mo no save lidim yufala i go lus.
“Mo taem yufala i tijim ol misinari blong yufala, mekem ae blong olgeta oli lukluk i kam long mifala; tijim olgeta blong neva folem olgeta we oli ting se oli save moa long olsem wanem nao blong lidim ol wok blong Jos bitim Papa long Heven mo Lod Jisas Kraes tru long ol prishud lida we oli gat ol ki blong prisaed.
“Mi bin faenem, long seves blong mi, se olgeta we oli go lus mo stap konfius, oli olgeta ia nao we, plante taem, oli fogetem se taem Fas Presidensi mo Kworom blong Olgeta Twelef Aposol oli toktok wetem wan tok, hem i voes blong Lod blong taem ia. Lod i mekem yumi tingbaot bakegen se nomata oli kamaot tru long voes blong miwan o tru long voes blong ol wokman blong mi, i semmak [D&C 1:38].”5
Long nara toktok, oli aot long Olfala Sip Saeon—oli foldaon i go; oli mekem apostasi. Sore tumas, plante taem oli gotru sam nogud samting blong sot taem mo afta blong longtaem, i no olgetawan nomo, be famle blong olgeta tu.
Ol lokol lida blong yumi blong Jos, semmak olsem ol reva gaed wetem eksperiens, oli kasem ol lesen long ol eksperiens blong laef; oli kasem trening mo tijing blong maen we i kam long ol aposol, mo ol profet, mo ol nara ofisa blong Jos; mo, moa impoten, Lod Hemwan i tijim olgeta.
Long wan nara taem long yia ia, mi bin toktok long ol yang adalt blong Jos long JES Divosen long Mei brodkas. Mi talem:
“Mi harem se sam pipol oli ting se ol lida blong Jos oli stap laef ‘long wol blong olgeta nomo.’ Wanem oli fogetem, i we, mifala i ol man mo woman wetem eksperiens, mo mifala i laef long plante defren ples mo wok wetem plante pipol we oli kamaot long defren situesen. Ol wok blong mifala i sendem mifala i go raon long wol, mo mifala i mitim ol lida blong politik, relijin, bisnis, mo yumaniterian raon long wol. Nomata we mifala i visitim ol lida long Waet Haos long Wasington D.K. mo ol lida blong ol nesen mo relijin raon long wol, mifala i bin visitim tu ol famle mo pipol we oli no gat tumas samting long wol ia. …
“Sapos yufala i tingting gud long laef mo seves blong mifala, bae yufala i agri nomo se i no gat fulap man oli luk mo gat eksperiens long wol ia olsem mifala. Bae yufala i luksave se mifala i no laef tumas “long wol blong mifala” olsem sam pipol. …
“… I gat wan samting we i stap long saed blong wanwan man o woman mo kombaen waes blong ol lida blong Jos we i sapos blong givim sam kamfot. Mifala i gotru long evri samting, wetem tu ol risal blong ol defren pablik loa mo polisi, harem nogud, aksiden mo ded long famle blong mifala. Mifala i savegud wanem yufala i stap gotru long hem long laef blong yufala.”6
Wetem rul nambawan olsem we mi bin yusum, tingbaot ol rul nambatu mo nambatri: oltaem wetem wan laefjaket mo hang strong wetem tufala han. Ol toktok blong Lod, oli stap long ol skripja mo ol tijing blong ol aposol mo profet. Oli givim yumi advaes mo daereksen we, taem yumi folem, bae oli stap olsem ol laefjaket long saed blong spirit mo bae i helpem yumi save olsem wanem blong hang strong wetem tufala han.
Yumi nid blong kam olsem ol boe blong Mosaea we oli “oli bin kam strong long save blong trutok.” Yumi save kam ol man mo ol woman “we oli haremsave stret ol samting.” Hemia i save hapen nomo taem yumi “stadi long ol skripja wetem strong tingting, blong [yumi] save andastanem toktok blong God.”7
Taem yumi luklukgud long ol skripja mo ol toktok blong ol aposol mo profet blong bifo mo naoia, yumi mas luklukgud blong stadi, laef, mo lavem doktrin blong Kraes.
Antap long fasin blong developem fasin blong ridim skripja yumiwan, yumi nidim blong stap olsem ol boe blong Mosaea, mo givim yumiwan blong “mekem plante prea, mo livim kakae.”8
I luk se ol samting ia we oli no save skelem gud olgeta, oli impoten tumas. Stap lukluk nomo long ol simpol samting, mo no sakem ae olbaot.
Taem mi kam blong save ol pipol we oli no bin stap insaed long bot, mo oli no hang strong wetem tufala han blong olgeta long taem blong tes mo trabol, o oli no bin stap insaed long bot long taem we reva i kwaet, mi bin luk se plante long olgeta oli tekemaot ae blong olgeta long ol stamba trutok blong gospel—ol risen ia from wanem oli joenem Jos long fas ples; ol risen we oli bin komitim olgeta fulwan mo aktiv blong laef folem ol standet blong gospel mo blesem ol narawan tru long tru seves; mo ol wei we Jos i bin stap long laef blong olgeta olsem wan ples blong fidim olgeta long saed blong spirit mo gro.9
Josef Smit i bin tijim stamba trutok ia: “Ol bigfala stamba prinsipol blong relijin blong yumi oli ol testemoni blong ol aposol mo ol profet long saed blong Jisas Kraes, ‘se Hem i bin ded, oli berem Hem, mo Hem i girap long nambatri dei, mo i go long heven;’ mo evri nara samting, oli hang long ol prinsipol ia, long saed blong relijin blong yumi.”10
Sapos yumi gohed blong lukluk nomo long Lod, Hem i promesem yumi wan blesing we yumi no save komperem: “From samting ia, yufala i mas wokbaot fored wetem strong bilif long Kraes, wetem wan stret mo klin hop, mo wan lav blong God mo blong evri man. From samting ia, sapos yufala i gohed strong, mo stap kakae gud long toktok blong Kraes, mo stap strong kasem en, luk, olsem ia nao Papa i talem: Bae yufala i kasem laef we i no save finis.”11
Samtaem, ol fetful Lata-dei Sent mo ol tru investigeta oli stat blong lukluk long “ol samting we oli hang” long ol prinsipol ia be i no long ol bigfala stamba prinsipol. Hemia, from Setan i stap temtem yumi blong pulumaot ae blong yumi long simpol mo klia mesej blong gospel we i kambak. Olgeta we oli luk nara ples olsem, plante taem, oli nomo kam tekem sakramen from se oli lukluk nomo, mo stap tingting plante, long ol praktis mo tijing we oli no impoten.
Ol narawan oli lukluk nomo long ol kwestin mo ol tu tingting we oli stap gotru long hem. Yes, blong gat kwestin mo gat tu tingting, oli go wetem fasin blong stap disaepol. I no longtaem, Kaonsel blong Fas Presidensi mo Kworom blong Olgeta Twelef Aposol i talem: “Mifala i andastanem se, wanwan taem, ol memba blong Jos bae oli gat kwestin long saed blong doktrin, histri o praktis blong Jos. Oltaem ol memba oli fri blong askem ol kwestin olsem mo lukluk gud blong kasem moa save.”12
Tingbaot se Josef Smit hemwan i bin gat kwestin we i mekem Kambak blong gospel i bin stat. Hem i man blong lukaotem samting, mo olsem Ebraham, i faenem ansa blong ol impoten kwestin blong laef.
Ol impoten kwestin oli lukluk nomo long wanem i moa impoten—plan blong Papa long Heven mo Atonmen blong Sevya. Fasin blong lukaotem ansa i mas lidim yumi blong kam ol disaepol we yumi kaen, naes, gat lav, save fogiv, save wet longtaem. Yumi mas wantem, olsem Pol i tijim blong “givgivhan long ol trabol … mo long fasin ya mekem wanem, loa blong Kraes i talem.”13
Blong givgivhan long ol trabol, i tekem tu blong helpem, sapotem mo andastanem evriwan, wetem olgeta we oli sik, handikap, no strong long spirit mo bodi, olgeta we oli lukaotem ansa mo olgeta we tingting i fasfas, mo tu, ol nara memba we oli disaepol—wetem ol lida blong Jos we Lod i bin singaotem olgeta blong wok blong sam taem.
Ol brata mo sista. Stap insaed long bot, yusum laefjaket blong yu, hang strong wetem tufala han blong yu. !Stap longwe long ol samting we i pulum ae blong yu! Mo sapos eniwan long yufala i foldaon, i kamaot long bot, bambae mifala i lukaotem yu, faenem yu mo givhan long yu mo pulum yu i kambak long sef ples antap long Olfala Sip Saeon, ples we God Papa blong yumi mo Lod Jisas Kraes, Tufala i stap lidim sip mo lidim yumi stret; long hemia mi testifae long nem blong Jisas Kraes, amen.