Kasem Taem Yumi Mit Bakegen
I Kam long Presiden Thomas S. Monson
Bae yumi evriwan i tingting hevi long ol trutok we yumi bin harem, mo bae oli helpem yumi blong kam ol disaepol we i moa strong.
Ol brata mo sista blong mi. Yumi gotru long tufala dei blong glori wetem ol mesej blong insperesen. Toktok i kasem hat blong yumi, mo fet i kam strong moa taem yumi bin tekpat long spirit we i bin stap long ol konfrens sesen ia. Taem yumi stap endem konfrens ia, yumi talem tangkyu long Papa long Heven from ol fulap blesing blong Hem long yumi.
Naes miusik i leftemap mo givim insperesen long yumi long ol sesen ia. Ol prea we oli givim, oli tekem yumi i go kolosap moa long heven.
Mi wantem talem tangkyu blong hat blong mi blong ful Jos, i go long ol Brata we oli bin rilisim olgeta long konfrens ia. Bae mifala i misim olgeta. Wok blong olgeta long wok blong Lod i bin bigwan tumas, mo bae plante jeneresen we oli stap kam yet oli filim.
Bae yumi gobak hom wetem wan strong tingting long hat, blong kam gud moa bitim we yumi bin stap bifo. Bae yumi gat moa kaen fasin mo gat moa tingting. Bae yumi go aot blong help, i no long ol memba nomo, be tu, long olgeta we oli no blong Jos. Taem yumi fren wetem olgeta, bae yumi soem respek blong yumi long olgeta.
I gat olgeta we oli traehad evri dei wetem ol jalenj. Bae yumi go luk olgeta, mo givhan long olgeta. Taem yumi kea long wanwan long yumi, bae yumi gat blesing.
Bae yumi tingbaot ol olfala mo olgeta we oli no save aot long haos. Taem yumi tekem taem blong visitim olgeta, bae oli save se yumi lavem mo tekem olgeta oli impoten. Bae yumi folem wok we oli givim blong givhan long olgeta we oli no strong, mo leftemap han we i hang i kamdaon, mo mekem ol ni we oli no strong oli kam strong.1
Bae yumi wan pipol we i ones mo i stap tru, we i traem blong mekem raet samting long evri taem mo long evri situesen. Bae yumi ol fetful man mo woman we i folem Kraes, i stap ol eksampol blong stret mo gud fasin, mo olsem ia, kam ol laet insaed long wol.2
Ol brata mo sista. Mi talem tangkyu from ol prea long bihaf blong mi. Oli mekem mi kam strong moa mo i leftemap mi taem mi stap traehad wetem ful hat blong mi, mo paoa blong mi blong mekem tingting blong God mo wok blong Hem mo blong wok blong yufala.
Taem yumi aot long konfrens ia, mi askem ol blesing blong heven i stap long wanwan long yufala. Bae yufala, we i stap longwe long hom, i gobak sef mo faenem evri samting i stret i stap. Bae yumi evriwan i tingting hevi long ol trutok we yumi bin harem, mo bae oli helpem yumi blong kam ol disaepol we i moa strong bitim bifo konfrens ia i stat.
Kasem taem yumi mit bakegen long nekis sikis manis taem, mi askem blesing blong Lod i stap long yufala, mo yes, antap long yumi evriwan, mo mi mekem hemia long tabu nem blong Hem—we i Jisas Kraes, Lod mo Sevya blong yumi–amen.