Loa blong Livim Kakae: Wan Responsabiliti Blong Yuwan blong Kea long Ol Puaman mo Givhan long Olgeta long Nid
I Kam long Bisop Din M. Devis
Seken Kaonsela long Prisaeding Bisoprik
Olsem ol man blong folem Sevya, yumi gat wan responsabiliti blong yumiwan blong kea from ol puaman mo givhan long olgeta long nid.
Ol dia brata blong mi, mi lavem prishud, mo mi lavem blong stap wetem yufala. Mi glad tumas se yumi save mekem seves tugeta long bigfala wok ia.
Yumi stap laef long ol spesel taem. Ol meresin oli stap kam moa gud, saens, mo teknoloji i mekem laef blong plante man i kam moa gud. Be tu, i gat plante saen i stap soem se i gat bigfala safaring mo harem nogud long ol man long wol. Antap long ol faet mo ol nius blong faet, ol disasta oli kam antap—i gat bigfala wota, ol faea, graon i seksek, mo ol kaen kaen sik—i stap spolem milian laef raon long wol.
Ol lida blong Jos oli luksave mo oli luklukgud long laef blong ol pikinini blong God long evri ples. Long taem mo ples we i save mekem, Jos imejensi risos we oli stap givimaot blong ansarem nid blong olgeta we oli nidim help. Eksampol, long manis Novemba we i pas, Hariken Haiyan i kilim smol nesen blong Filipin.
Wan strong hariken long kategori 5, Haiyan i livim biaen plante damej mo safaring. Plante taon i bin damej; plante laef i lus; milian hom oli damej nogud o smas gud; mo ol nomol seves olsem wota, rod blong doti wota, mo lektrisiti i nomo wok.
Ol risos blong Jos i bin go aot stret afta long disasta ia. Ol memba blong Jos we oli stap laef long Filipin oli bin kam tugeta blong sevem ol brata mo sista taem oli givimaot kaekae, wota, klos mo sam impoten samting long saed blong helt i go long ol memba mo semmak long olgeta we oli no memba.
Ol Jos mitinghaos oli kam ol ples we i sevem taosen long olgeta we haos blong olgeta i bin damej. Andanit long lidasip blong Eria Presidensi mo ol lokol prishud lida, oli bin putum ol tingting tugeta blong faenemaot olsem wanem blong helpem kondisen mo sefti blong plante long olgeta we oli lusum evri samting we oli gat. Ol plan tru insperesen i stat blong tekem ples blong helpem ol memba oli gat wan nomol laef bakegen mo stap dipen long olgetawan.
Oli bin givimaot ol simpol samting blong helpem ol memba blong Jos blong bildimbak ol haos blong olgeta. Oli no givim hemia fri. Ol memba oli kasem trening mo oli mekem wok ia blong olgetawan mo afta blong ol narafala.
Wan blesing blong hemia hem i we taem ol memba oli kasem ol skil blong kapenta, plama, mo ol nara skil blong bildim samting, oli save faenem ol gudfala janis blong wok taem oli stat blong bildimap bakegen ol taon kolosap mo ol komuniti.
Blong stap kea long ol puaman mo olgeta we oli stap long nid, i wan stamba doktrin blong gospel mo wan impoten pat insaed long plan blong fasin blongsevem man we i no save finis.
Bifo seves blong Hem long wol ia, Jehova i talemaot tru long ol profet blong Hem: “Oltaem bae i gat long ol laen blong yufala ol puaman, oli nogat sam samting. Mo mi talem long yufala se ol man olsem bambae yufala i mas givhan long olgeta long gladhat blong yufala.”1
Long dei blong yumi, blong stap kea long ol puaman mo olgeta we oli nidim help hem i wan long ol fo tabu Jos responsabiliti we i helpem wanwan man, woman mo famle blong kwalifae blong kam olsem wan god. 2
Blong stap kea long ol puaman mo olgeta we oli stap long nid i minim se yu stap givim wan seves tugeta long nid blong wol ia wetem long saed blong spirit. Hemia i tekem tu seves blong wanwan memba blong Jos taem wanwan long olgeta oli kea from ol puaman mo givhan long olgeta we oli stap long nid, mo tu, program blong Jos welfea, we ol prishud atoriti oli lukaotem.
Long medel long plan blong Lod blong kea from ol puaman mo olgeta long nid, i loa blong livim kakae. “Lod i putum loa blong livim kakae wetem fas ofring blong blesem ol pipol blong Hem mo blong givim wan wei long olgeta blong givim seves long olgeta we oli nidim help.” 3
Olsem ol man blong folem Sevya, yumi gat wan responsabiliti blong yumi wanwan blong kea from ol puaman mo olgeta long nid. Ol fetful memba blong Jos long evri ples oli stap help blong kea long ol puaman mo olgeta long nid taem oli stap livim kakae long wan taem long wan manis—oli no tekem kaekae o wota blong 24 aoa—afta oli givim i go long Jos, wan mane blong fas ofring we i semmak long amaon blong mane blong kaekae we oli sapos blong kakae.
Evri hom i mas stadi gud mo tijim wetem prea ol toktok blong Aesea:
“Fasin we mi mi wantem luk i olsem. Tekemaot jen long olgeta we yufala i stap mekem i strong long olgeta, tekemaot ol hevi samting long olgeta, mo letem olgeta we oli olsem ol slef oli go fri, mo naoia yufala i mas tekemaot evri samting ia long olgeta.”
“Yufala i mas givim kaekae long olgeta we oli hanggri, yufala i mas letem olgeta we oli nogat haos blong kam stap long haos blong yu, givim klos long ol puaman we oli nogat klos, mo yufala i no mas blokem ol famle blong yufala we oli kam askem help long yufala.”4
Aesea i gohed blong talemaot ol naesfala blesing we Lod i promesem long olgeta we oli stap obei long loa blong livim kaekae. Hem i talem:
“Bambae i olsem san i kam antap, bambae mi mekem ol so blong yufala i kam gud bakegen kwiktaem: mo oltaem mi bae mi stap wetem yufala blong sevem yufala, bambae paoa blong mi i stap wetem yufala long evri saed.
“Sipos yufala i prea i kam long mi, bambae mi mi harem yufala, sipos yufala i singaot i kam long mi, bambae mi mi ansa long yufala, Mi hemia. …
“Yufala i mas givim kaekae long olgeta we oli hanggri, mo yufala i mas givhan long olgeta we oli trabol; mo bae tudak ia we i raonem yufala bambae i kam delaet:
“Nao oltaem bambae mi stap lidim yufala, mi stap givim ol gudgudfala samting long yufala mekem yufala i harem gud.”5
Long saed blong skripja ia, Presiden Harol B. Li i gat hemia blong talem: “Bigfala blesing we i kam [long fasin blong livim kakae] oli bin mekem i klia gud long evri dispensesen, mo long ples ia Lod i stap talem long yumi tru long bigfala profet ia from wanem yumi mas livim kakae, mo ol blesing we i kam taem yumi livim kakae. Sapos yu stadi gud japta 58 long buk blong Aesea bae yu faenemaot from wanem Lod i wantem blong yumi pem fas ofring, from wanem Hem i wantem blong yumi livim kakae. Hem i from se taem yumi kwalifae long hemia bambae yumi save singaot mo bae Lod i ansa. Yumi save krae mo bae Lod i talem, “Mi hemia.’”
Presiden Li i ademap: “?Yu wantem stap long wan situesen we bae yu singaot afta bae Hem i no ansa? ?Yu wantem krae long harem nogud blong yu mo bae Hem i no stap wetem yu? Mi ting se hem i taem blong yumi stap tingting long stamba tingting ia, from se, i gat ol dei we oli stap kam, taem we bae yumi nidim moa mo moa blesing blong Lod, taem we Hem i givimaot jajmen; wetem ful paoa blong Hem; long wol ia.”6
Profet we yumi lavem tumas, Presiden Tomas S Monson, i bin serem testemoni blong hem long ol stamba toktok ia—wan testemoni we hem i givim long eksperiens blong hemwan. Hem i talem: “I nogat wan memba blong Jos we i bin helpem olgeta long nid mo fogetem o no laekem eksperiens ia. Hadwok, gudfala tingting, stap dipen long yuwan, mo stap serem samting long ol nara man, i no niu long yumi.” 7
Ol brata, ol memba blong Jos blong Jisas Kraes blong Ol Lata-Dei Sent oli ol pipol blong mekem kavenan, mo ol pipol blong obei long komanmen. Mi no save tingbaot wan loa, wan komanmen, we, sapos yumi kipim wetem fet, bae i isi moa blong kipim mo bae i givim bigfala blesing moa bitim loa blong livim kakae. Taem yumi livim kakae mo givim wan ones fas ofring, yumi ademap i go long stoahaos blong Lod wanem we yumi sapos blong spendem long kaekae. Long semtaem, Hem i promesem yumi ol spesel blesing, olsem we yumi bin tokbaot bifo.
Loa blong livim kakae hem i blong evri memba blong Jos. Ol yangfala pikinini tu, yumi save tijim olgeta blong livim kakae, stat wetem wan taem blong kakae afta tu taem blong kakae, taem oli kam blong andastanem mo bodi blong olgeta i save mekem, blong kipim loa blong livim kaekae. Ol hasban mo ol waef, ol singgel memba, yut, mo ol pikinini oli mas statem fasin blong livim kakae wetem wan prea, talem tangkyu long ol blesing long laef mo semtaem stap lukaotem ol blesing blong Lod mo paoa long taem blong livim kakae. Blong kipim fulwan loa blong livim kakae hem i taem we i gat wan fas ofring i go long wokman blong Lod, we hem i bisop.
Ol bisop, yu yu daerektem welfea program insaed long wod. Yu gat wan tabu wok blong faenem mo kea long ol puaman. Wetem sapot blong Rilif Sosaeti presiden mo ol Melkesedek Prishud kworom lida, gol blong yu i blong helpem ol memba blong oli save helpem olgetawan mo save stap dipen long olgetawan. Yu givhan long ol nid blong wol mo nid blong saed blong spirit blong ol memba taem yu yusum gud ol fas ofring olsem wan sapot blong sot taem nomo mo ademap wetem sapot blong ol famle mo komuniti. Taem yu yusum prishud ki wetem prea mo gud tingting blong helpem ol puaman mo olgeta we oli stap long nid, bae yu kam blong save se stret yus blong fas ofring hem i blong sapotem laef, be i no standet blong laef.
Ol presiden blong Aronik prishud kworom, yufala i holem ki mo gat paoa blong mekem ol wok we man i save luk. Yu wok wetem bisop mo talem long ol memba blong kworom ol prishud wok we oli mas mekem mo go faenem ol Jos memba mo givhan long olgeta blong olgeta tu, oli save livim kakae. Taem yufala we oli holem Aronik Prishud oli givim ona long wok blong prishud blong yu mo givhan long evri Jos memba, samtaem yu stap mekem i isi blong kasem ol promes blesing blong livim kakae; long olgeta we oli nidim moa. Bae yu witnesem se spirit blong kea long ol puaman mo givhan long olgeta long nid i gat paoa blong mekem ol strong hat oli kam sopsop mo blesem laef blong olgeta we oli no stap kam long Jos oltaem.
Presiden Monson i bin talem, “Ol bisop we oli yusum ol Aronik Prishud kworom blong tekpat long kolektem ol fas ofring bae oli save faenem moa sakses long tabu wok ia” 8
Ol bisop, tingbaot se ol situesen i defren long wanwan eria mo long wanwan kantri. Blong ol Aronik Prishud kworom oli folfolem ol haos blong kontaktem ol memba, samtaem bae hem i no stret tumas long ples we yu stap long hem. I nomata long hemia, mifala i invaetem yu blong tekem wetem prea advaes blong profet mo lukaotem insperesen long ol stret wei we olgeta we oli gat Aronik Prishud i save givim ona long prishud we oli holem, taem oli stap tekpat blong kolektem ol fas ofring.
Insaed long japta 27 blong 3 Nifae, Lod we i laef bakegen i askem, “?Yufala i wantem kam ol wanem kaen man?” Hem i ansa, “Be yufala i kam olsem mi.” 9Taem yumi tekem long yumi nem blong Kraes mo traehad blong folem Hem, bae yumi save kasem luk fes blong Hem mo stanap strong blong kam olsem Hem. Blong stap kea long ol puaman mo givhan long olgeta long nid hem i seves blong Sevya. Hem i stap long evri samting we Hem i mekem. Hem i go aot mo leftemap evriwan. Yok blong Hem i isi, mo wok blong Hem i no hevi. Mi invaetem wanwan long yumi blong kam moa olsem Sevya blong kea long ol puaman mo givhan long olgeta long nid mo blong givim fas ofring wetem wan gud hat. Wetem wan tingting i stap daon, mi testifae se blong stap fetful blong kea long ol puaman mo givhan long olgeta long nid, i soemaot se spirit i gro i kam antap mo bae hem i blesem, tugeta, hemia we i givim mo hemia we i kasem. Long tabu nem blong Jisas Kraes, amen.