Welkam long Konfrens

I Kam long Presiden Thomas S. Monson

Taem yumi stap lisin, bae toktok i tajem hat blong yumi, mo fet i kam antap.

Ol brata mo sista blong mi. Mi glad tumas blong welkamem yufala long bigfala wol konfrens ia. Yumi kam tugeta long ol ples raon long wol blong lisin mo lanem samting aot long ol brata mo sista we yumi bin sastenem olgeta olsem ol Jeneral Atoriti mo ol jeneral ofisa blong Jos. Oli bin askem help blong heven long saed blong ol mesej we bae oli presentem, mo oli bin filim insperesen long saed blong wanem blong talem.

Konfrens ia i makem namba 90 aniveseri blong ol redio brodkas blong jeneral konfrens. Long taem blong Oktoba konfrens blong 1924, oli stap brodkastem ol sesen long redio blong fas taem tru long stesen we Jos i gat, KSL. Konfrens ia, i makem tu namba 65 aniveseri blong televisen brodkas blong konfrens. Long jeneral konfrens we oli holem long Oktoba 1949, oli luk ol sesen ia fas taem long televisen tru long Sol Lek eria long KSL televisen.

Yumi luksave ol blesing blong media blong tedei blong letem ol milian memba blong Jos blong lukluk, o lisin long jeneral konfrens. Ol sesen blong wiken ia, oli brodkastem tru long televisen, redio, kebol, satelaet, mo long Intanet, wetem tu ol mobael tul.

Long ol las sikis manis we yumi bin mit, oli dediketem wan niu tempol, mo wan, oli dediketem bakegen. Long manis Mei, Presiden Dita F. Ukdof i dediketem Fot Laodedel Florida Tempol. Oli presentem wan naes yut kalja selebresen wan dei bifo long dedikesen. Long nekis dei, long Sandei 4 Mei, oli dediketem tempol long trifala sesen.

Tu wik i pas, i bin spesel janis blong mi blong dediketem bakegen Ogden Yuta Tempol, we Presiden Josef Filding Smit i bin dediketem fas taem long 1972. Wan bigfala kalja selebresen i bin tekem ples long dei bifo long seken dedikesen, wetem plante yut oli tekpat long tufala seperet so we oli bin presentem, wetem defren man long wanwan so. Evriwan, i gat 16 taosen yut we i tekpat. Ol seves blong seken dedikesen i tekem ples long nekis dei, wetem plante Brata oli tekpat, wetem ol okseleri lida mo tempol presiden, ol kaonsela blong hem mo ol waef blong olgeta.

Wok blong bildim ol tempol i gohed gud. Nekis manis, bae oli dediketem niufala Feniks Arisona Tempol, mo nekis yia, long 2015, mifala i luk se bae mifala i dediketem mo dediketem bakegen faef tempol, mo maet sam moa, dipen long wok we i finis.

Olsem we mi talem long manis Epril, taem we evri tempol we oli bin anaonsem finis, oli bildim mo dediketem olgeta, bae yumi gat 170 tempol oli wok raon long wol. From se yumi stap putum fulap hadwok blong komplitim ol tempol we oli anaonsem bifo, mifala i no stap anaonsem naoia eni niufala tempol. Be, long fiuja, taem yumi faenemaot ol nid mo faenem ol ples, bae mifala i mekem moa anaonsmen blong ol tempol.

Jos i gohed blong gro. Naoia, yumi moa long 15 milian strong memba mo stap kam antap long namba. Ol misinari wok blong yumi oli gohed we i no gat samting i stopem. Yumi gat ova long 88 taosen misinari we oli givim seves, oli serem mesej blong gospel raon long wol. Yumi talemaot bakegen se misinari wok i wan prishud diuti, mo mifala i leftemap tingting blong evri yang man we oli fit mo klin inaf blong go long misin. Mifala i glad tumas long ol yang woman we oli givim seves. Oli mekem bigfala wok, nomata oli no gat sem diuti ia blong go long misin olsem ol yang man.

Naoia, mi invaetem yufala blong givim ful tingting blong yufala long ol brata mo sista we bae oli tekpat tedei mo tumoro long ol konfrens sesen blong yumi. Olgeta evriwan we oli askem olgeta blong toktok, oli filim wan bigfala responsabiliti blong mekem hemia. Taem yumi stap lisin, bae toktok i tajem hat blong yumi, mo fet i kam antap, mi prea wetem tingting i stap daon, long nem blong Jisas Kraes, amen.