?I No Yumi Evriwan I Ol Man blong Askem Samting?
I Kam long Elda Jefri R. Holan
Blong Kworom blong Olgeta Twelef Aposol
Nomata yumi rijman o puaman, yumi “mas mekem wanem yumi save mekem” taem ol narawan oli stap long nid.
Hemia i wan gudfala niu samting ia we oli putum insaed long jeneral konfrens blong yumi. Bien hecho, (gud tumas) Eduardo.
Long wanem we i sapraes, taem long stat blong seves blong Hem, Jisas i stanap long haos blong prea long homples blong Hem, Nasaret, mo i ridim ol toktok ia we Aesea i profesae long hem mo oli raetemdaon long Gospel blong Luk: Hae God i jusumaot mi, mo paoa blong Spirit blong hem i kam fulap long mi blong mi talemaot gud nius long ol puaman. Hem i sanem mi blong mi talemaot long ol man we oli stap long kalabus se, ‘Yufala i go fri,’ mo blong mi talemaot long ol man we oli blaen se, ‘Ae blong yufala i save kam gud,’ Hem i sanem mi blong mi mekem ol man we oli stap harem nogud [andanit] long han blong narafala man oli go fri, mo blong mi talemaot se ‘Taem i kam finis we Hae God bambae i sevem ol man blong hem.’”1
Olsem ia nao Sevya i bin mekem fas pablik anaonsmen blong seves blong Hem olsem Mesaea. Be ves ia i talemaot klia tu se long rod blong hem blong mekem sakrifaes ia blong pem praes from man mo Laef Bakegen long Ded blong Hem, fas stamba diuti blong Mesaea i blong blesem olgeta we oli pua, mo tu, olgeta we oli pua long spirit.
Long stat blong seves blong Hem, Jisas i lavem bigwan olgeta we oli gat nid mo olgeta we oli no gat samting. Hem i bon long haos blong tufala kaen pipol ia, mo i groap long medel blong plante long olgeta. Yumi no save ful stori blong laef blong Hem long wol ia, be hem i bin talem,: “Ol wael dog oli gat ol hol blong slip blong olgeta, mo ol pijin oli gat ol bed blong olgeta. Be mi mi Pikinini blong Man, mi no gat ples blong mi, blong go slip long hem.”2 I luk se Krieta blong heven mo wol, “mo evri samting we i stap long hem,”3 long ful laef blong Hem, Hem i no gat wan haos.
Truaot histri, fasin blong stap pua i ol jalenj we oli moa bigwan mo oli stap evri ples. Safaring blong hem i long saed blong bodi, be long saed blong spirit mo ol filing, safaring blong Hem i moa bigwan. Long eni wei, singaot blong bigfala diuti we Hae Ridima i givim long yumi, i blong joenem Hem blong leftemap hevi trabol blong ol pipol. Olsem Jehova, Hem i talem se bae Hem i jajem no gud haos blong Isrel from ol samting blong ol man we i gat nid i stap insaed long ol haos blong yufala.
Hem i talem: “ol haos blong yufala oli fulap gud long ol ting blong ol puaman we yufala i stap stilim long olgeta.”4
Man we i raetem Ol Proveb i talem hemia i klia moa: “Man we i stap mekem i nogud long ol puaman, hem i stap mekem i nogud long Hae God we i mekem olgeta. … sapos yu blokem sora blong yu blong no harem puaman we i stap krae long yu blong yu givhan long hem, nao biaen yu trabol, mo yu krae blong man i givhan long yu, be bambae i no gat man i save lesin long yu.”5
Long dei blong yumi, Jos we i kambak blong Jisas Kraes i no luk fasfala lafet blong makem fas yia blong hem we, Lod i bin givim oda long ol memba blong Hem blong lukaotgud long olgeta we oli pua mo olgeta long nid, mo givhan long olgeta blong oli no mas safa.6 Luk gud long strong tok blong hem long ples ia—“bae oli no mas safa.” Lanwis ia nao God i stap yusum taem Hem i givim oda.
From bigfala jalenj ia blong tokbaot ol rabis samting long wol, ?wanem nao wan man o wan woman i save mekem? Masta Hemwan i givim ansa. Long taem we, bifo oli salem Hem mo hangem Hem long Kros, Meri i anoentem hed blong Jisas wetem wan oel we i sas tumas, Judas Iskariot i tok from hemia mo i komplen agensem Meri.7
Jisas i talem:
“Yufala i livim woman ia. … Hem i mekem wan gudfala samting long mi. …
“Woman ia i mekem wan samting we hem i naf blong mekem.”8
“!Hem i mekem samting we hem i naf blong mekem!” Hemia wan toktok we i gat paoa. Wan taem, wan junalis i kwestinim Mama Teresa blong Kalkuta from wok blong hem blong sevem ol man we oli stap long wan siti we i no gat samting long hem. Hem i se, folem ol namba, Mama Teresa i no winim wan samting nating. Gudfala smol woman ia i tokbak, i talem se wok blong hem i abaot lav, i no abaot ol namba. Nomata bigfala namba blong ol pipol we hem i no save helpem, hem i talem se hem i save obei long komanmen ia blong lavem God mo neiba blong sevem olgeta we hem i save kasem olgeta wetem wanem we hem i gat. “Wanem we yumi mekem i nating nomo, i wan smol drop blong wota nomo long bigfala solwota,” be hem i talem long ol nara taem se; “be sapos yumi no mekem, bigfala solwota ia i mestem wan drop blong wota.”9 Wetem krae, junalis i talem se, i tru Kristin fasin i no wan wok blong ol namba. Hem i talem se sapos i gat moa glad long heven from wan man nomo i sakem sin bitim naentinaen man we oli no sin, i soem klia nomo se God i wari nating long ol namba. 10
So, olsem wanem nao yumi save “mekem wanem we yumi naf blong mekem?”
Yumi save, olsem King Benjamin i tijim, stop blong holemtaet ol samting we yumi gat from se yumi luk se olgeta nomo oli mekem olgeta bakegen i pua. Ating sam oli mekem trabol blong olgetawan bakegen, be ?olsem wanem long yumi? ?yumi no stap mekem sem samting? I no rula we i gat lav mo sore i talem: “?i no yumi evriwan i ol man blong askem samting? 11 ?Yumi evriwan i krae from help mo hop mo ansa long prea blong yumi? ?Yumi evriwan i askem fogivnes from ol mistek we yumi mekem mo ol trabol we yumi mekem? ?Yumi evriwan i askem se gladhat blong Hem bae i tekemaot ol samting we yumi no strong long hem, se sore bae i winim panismen long kes blong yumi? I no blong nating we King Benjamin i talem se yumi kasem fasin blong kam klin aot long ol sin blong yumi taem yumi plis long God, we wetem lav mo sore i ansa; be yumi holemtaet fasin blong kam klin aot long sin taem we, wetem lav mo sore, yumi givhan long olgeta we oli pua we oli askem samting long yumi.12
Antap long soem sore long olgeta, yumi mas prea tu blong olgeta we oli stap long nid. Wan grup blong ol man blong Soram oli luk se samfala long olgeta oli “doti” mo oli ol “makas,” mo oli ronemaot olgeta long haos blong prea blong olgeta “from oli no luk naes mo klin wetem ol klos blong olgeta.” Momon i talem se “oli bin pua long saed blong ol samting blong wol; mo tu oli bin pua long hat” 13—tu samting we i go tugeta oltaem. Ol misinari kompanion, Alma mo Amulek oli agensem fasin ia blong sakemaot olgeta we oli no dresap gud mo talem se nomata long ol samting we ol narawan oli no givim long olgeta, bae oli save prea oltaem—long garen, mo long haos, mo long ol famle mo long hat blong olgeta.14
Be afta, long grup ia we oli ronemaot olgeta, Amulek i talem: “Afta yufala i prea, sapos yufala i no wantem luksave olgeta we oli gat nid, mo olgeta we oli neked, mo no visitim olgeta we oli sik mo olgeta we oli harem nogud, mo no serem ol samting blong yufala, we yufala i gat, long olgeta we oli gat nid—Mi talem long yufala, … prea blong yufala i blong nating nomo, mo i no gat yus long yu, mo yufala i olsem ol man we oli gat tufes we oli tanem baksaed long fet.”15 Hemia wan bigfala toktok blong rimaenem yumi se nomata yumi rijman o puaman, yumi mas mekem wanem yumi save mekem taem ol narawan oli stap long nid.
Nao, i no gud se mi stap proposem wan bigfala wol program we bae i no save wokaot blong helpem ol puaman we bae i mekem yumi fil gud, o talem se blong stap askem samting long rod i wan gud samting, mi wantem talem se mi respektem bigwan ol prinsipol blong fasin blong wok, no spendem mane tumas, fasin blong no dipen mo wantem gud samting. Oltaem yumi mas mekem samting blong yumiwan bifo yumi askem help long ol narawan. Antap long hemia, mi no save stret olsem wanem wanwan long yufala i mas mekem diuti blong yufala long olgeta we oli no save helpem olgetawan bakegen. Be mi save se God i save, mo bae Hem i lidim yufala long ol aksen blong lav mo sore blong wan disaepol sapos yu wantem mo prea mo lukaotem ol wei blong obei wan komanmen we Hem i givim long yumi bakegen mo bakegen.
Yufala i andastanem se mi stap tokbaot ol strong nid long sosaeti we i no blong ol memba blong Jos nomo. Laki nomo, wei blong Lod blong helpem ol memba i isi; evriwan we i save mekem, i mas folem loa blong livim kakae. Aesea i raetem:
“[I no hemia nao fasin blong livim kakae we mi bin jusum? …
“[Yufala i mas givim kaekae long olgeta we oli hanggri, mo tekem olgeta puaman oli stap long haos blong yufala, yufala i mas givim klos long olgeta, blong mekem yufala i karemaot trabol blong olgeta mo letem olgeta oli gro fri.]”16
Mi talemaot witnes blong mi long ol merikel, we i long saed blong spirit mo bodi, we oli kam long olgeta we oli laef folem loa blong livim kaekae. Mi talem witnes blong mi long saed blong ol merikel we oli kam long mi. I tru, olsem we Aesea i raetem, mi bin prea taem mi livim kakae, mo i tru, God i bin ansa “Mi hemia.”17 Holemtaet gud tabu janis ia we yu gat evri manis, mo givim gud donesen long fas ofring blong yu mo long ol nara donesen blong yumaniterian, edukesen, mo misinari. Mi promes se God bae i givim fulap long yu, mo olgeta we oli faenem help long han blong yu bae oli blesem nem blong yu oltaem. Mo bitim haf blong ol milian memba blong Jos oli kasem help las yia tru long fas ofring we ol bisop mo Rilif Sosaeti presiden oli givim. Hemia fulap Lata-dei Sent we oli talem tangkyu.
Ol brata mo sista. Wan toktok olsem tu i askem mi blong luksave ol blesing long laef blong mi we mi no naf blong kasem, long saed blong bodi mo long spirit. Olsem yufala, mi mas wari long mane long wanwan taem, be mi neva bin pua, mo mi no save se olsem wanem ol puaman oli filim. Antap long hemia, mi no save evri risen blong ol situesen blong yumi abaot taem yumi bon, helt mo edukesen mo faenens oli defdefren long wol ia, be taem mi luk nid long laef blong plante man, mi no save be sapos i no from gladhat blong God, bae mi semmak nomo.18 Mi save tu se nomata mi no man blong lukaot long brata blong mi, be mi brata blong brata blong mi, mo from se Lod i givim plante long mi, mi tu, mi mas givim.19
Long saed ia, mi presem Presiden Tomas S. Monson. Mi bin gat blesing blong wok wetem man ia blong 47 yia nao, mo pikja we bae mi holemtaet abaot hem kasem taem bae mi ded, i taem we hem i flae i gobak hom, i aot long Is Jemani we oli gat bigfala problem long saed blong mane, mo hem i werem slipa from se hem i givim seken fulsut, mo ol narafala sot blong hem, mo tu, ol sus we hem i bin werem. “I gud tumas blong luk man i wokbaot kam kros long ol bigbigfala hil [mo tru long eapot] blong kam talemaot gud nius we i nius blong pis.”20 Presiden Monson, bitim eni nara man we mi save, oltaem i “mekem evri samting we hem i save mekem,” long olgeta we oli wido mo olgeta we oli no gat papa, ol puaman mo olgeta we oli harem nogud tumas.
Long wan revelesen long 1831 i go long Profet Josef Smit, Lod i talem se wan dei, ol puaman bae oli luk kingdom blong God i kam mekem olgeta i fri wetem paoa mo bigfala glori.21 Bae yumi help blong mekem profesi ia i kamtru taem yumi kam wetem paoa mo glori blong membasip blong yumi long tru Jos blong Jisas Kraes, blong sevem eniwan we yumi save long pua laef we i holemtaet olgeta i prisena mo prapa spolem gud plante long ol drim blong olgeta, mi prea, long nem blong Jisas Kraes we i gat sore, amen.