We Oli Mekem Rere long Wan Fasin we I Neva Hapen Bifo
I kam long Linda K. Beton
Rilif Sosaeti Jeneral Presiden
Bambae yumi rere blong stap klin inaf blong yumi save kasem ol odinens we i save sevem sol, drop folem drop, mo kipim ol kavenan we i kam wetem, wetem ful hat blong yumi.
Taem las bon gel blong mitufala i kambak long haos afta long fas dei blong hem long skul, mi askem, “?Skul i olsem wanem?”
Hem i ansa, “I gud.”
Long nekis moning, taem mi wekemap hem blong go long skul, hem i foldem han blong hem mo talem strong, “!Mi go long skul finis!” I klia se mi no bin mekem hem i reregud o eksplenem gud long hem se skul i no blong go long hem wan dei nomo afta i finis, be bae yu mas go long skul faef dei long wan wik blong plante, plante yia.
Taem yumi stap tingting long stamba tingting blong stap rere, wetem mi pikjarem hemia. Yu stap sidaon long selestial rum blong tempol afta yu luk plante woman mo man we oli kam blong mared, oli stap lidim olgeta i go kwaet insaed mo kambak aotsaed bakegen taem oli stap wet blong kasem mared blong taem we i no save finis. Wan woman we bae i mared i holem han blong swit hat blong hem mo go insaed long selestial rum. Hem i werem wan simpol be naesfala tempol dres mo gat wan gudfala, pisful, wom smael long fes blong hem. Hem i mekem gud hem i luk naes be i no pulum ae tumas. Hem i sidaon, i lukluk raon mo sek nomo hem i fulap wetem spirit. I luk olsem wota blong ae blong hem i ron from respek we hem i gat long ples we hem i stap insaed long hem mo tabu odinens we hem i stap wet blong mekem wetem man we hem i lavem. I luk olsem se long tingting blong hem i se, “!Mi glad tumas blong stap long haos blong Lod tedei, rere blong stat folem wan rod we i no save finis wetem wan patna we mi lavem we i no save finis.” Yu luk save se hem i rere gud from plante moa samting bitim wanem bae i hapen long taem ia.
I no long taem i pas, naesfala apugel blong mitufala i livim wan not long pilo blong mi we i talem smol olsem: “Wan samting we mi luksave taem mi go insaed long tempol hem i spirit we i fulap wetem pis mo lav we i stap insaed. … Ol pipol oli save go long tempol blong kasem insperesen.” 1 Hem i raet. Yumi save kasem insperesen mo revelesen insaed long tempol—mo tu, paoa blong save stanap strong agensem enemi. Wanem we hem i lanem abaot tempol taem hem i stap tekpat oltaem blong karem ol nem blong famle blong hemwan blong mekem ol baptaes long tempol mo konfemesen, bae i mekem hem i rere blong kasem moa tempol odinens, kavenan, mo ol blesing, tugeta blong hemwan mo blong olgeta long narasaed vel.
Elda Rasel M. Nelson i bin tijim, “Olsem we oli stap rere long ol tempol from ol man, ol man oli nid blong rere olgetawan from tempol.”2
Taem mi stap ridim bakegen abaot Kapten Moronae insaed long Buk blong Momon, mi tingbaot bakegen se wan long ol bigfala samting we Moronae i mekem i gud tumas; hem i taem we hem i rere gud long ol man blong Nifae blong stanap strong agensem ol ami blong pipol blong Leman. Hem i rere gud long ol pipol blong hem olsem we yumi ridim: “Luk, long [ol pipol blong Leman] bigfala sapraes, [ol pipol blong Nifae] oli rere gud from olgeta, long wan fasin we i no bin gat save long hem.”3
Toktok ia, “We Oli Mekem Rere long Wan Fasin we I Neva Hapen Bifo,” i rili kasem mi.
?Olsem wanem nao yu save rere gud long yuwan blong kasem ol tabu blesing blong tempol? Lod i bin tijim, “Mo bakegen, bae mi givim long yufala wan paten long saed blong evri samting.” 4 Yumi lukluk long wan paten insaed skripja blong i helpem yumi rere gud. Taem Moronae i stap rere from ol enemi hem i tingting gud oltaem wetem bigfala fet, mo i semmak long paten ia.
Mi neva save taed long naesfala parabol ia blong Sevya we i tokbaot faef waes yang gel mo faef i no waes. Nomata parabol ia i stap minim blong rere gud from Seken Kaming blong Sevya blong yumi, yumi save yusum tu blong stap rere from ol blesing blong tempol, we i save kam wan kakae long saed blong spirit blong olgeta we oli rere gud.
Long Matiu 25 yumi ridim:
“Long taem ya we God bambae i tekem niufala wol i kamtru, we hem i king long hem, bambae i olsem. I gat ten yang gel we oli tekem laet blong olgeta, oli go blong mitim man we i jes mared we bambae i kam hom.
“Faef long olgeta oli no waes, be ol narafala faef oli waes. …
“Be [olgeta] faef ia we oli waes, oli tekem sam botel karsin wetem laet blong olgeta.
“Nao man ya we i jes mared, hem i tektaem tumas, nao ol gel ya oli foldaon mo slip.
“Be long medel naet, wan man i singaot se, ‘!Man ya we i jes mared, bambae i kamtru naoia! !Yufala i kam mitim hem!’
“Nao ol ten gel ya oli wekap, oli klinim ol laet blong olgeta.
“Nao olgeta ya we oli no waes, oli tale long olgeta se, ‘Plis yufala i givim sam karsin long mifala, from we ol laet blong mifala oli emti, klosap oli ded.
“Be olgeta ya we oli waes oli se, ‘No. Karsin ya i no naf blong yumi evriwan. Yufala i mas go long stoa blong pem blong yufala.
“Nao oli go pem karsin blong olgeta, Be taem oli stap longwe yet, man we i jes mared i kamtru. Hem i go insaed haos blong hem, mo ol faef waes gel ya oli go wetem hem, nao ol man oli satem doa.
“Biaen ol narafala gel ya oli kambak bakegen, oli singaot se, ‘!Masta, Masta! !Plis yu letem mifala i kam insaed!”
“Be man we i jes mared, i se, ‘Tru mi talem long yufala, mi mi no save yufala.’”5
Mi no ting i gat wan man, speseli long medel blong olgeta we i gat sopsop hat, we oli no sore nating long ol yang gel ia we oli no waes. Mo sam long yumi i wantem talem long ol nara yang gel ia, “?Yufala i no save serem nomo blong mekem se evriwan i glad?” Be tingbaot hemia. Hemia i wan stori we Sevya i bin talem, mo Hem nao i singaotem faef long olgeta “waes” mo faef we oli “no waes.”
Taem yumi luk parabol ia olsem wan paten blong rere from tempol, tingbaot ol toktok blong wan lata-dei profet we i tijim se “yu no save serem karsin ia blong rere long saed blong spirit.” 6 Presiden Spensa W. Kimbol i mekem i klia from wanem ol faef “waes” gel ia i no save serem karsin long laet blong olgeta wetem olgeta we oli “no waes”, taem i se: “Atendem sakramen miting, i ademap karsin long laet blong yumi, wan drop evri taem ova ol yia. Livim kakae, famle prea, hom tijing, kontrolem bodi, prijim gospel, stadi olgeta skripja—wanwan samting ia we yu mekem mo tru fasin blong obei i wan drop i go long laet. Ol kaen wok, pem ol ofring mo taeting, klin tingting mo aksen … —ol samting ia tu, oli impoten tu we yumi save fulumap karsin blong medel naet ol laet blong yumi i no save ded.”7
?Yu save luk paten blong stap rere—wan drop afta narawan—we i save helpem yumi taem yumi tingbaot hao yumi save gat moa paoa long tingting taem rere blong kasem ol tabu odinens blong yumiwan mo blong ol narawan? ?Wanem nao ol nara smol mo simpol samting we yumi save mekem blong fulumap moa drop blong karsin long saed blong spirit long ol laet blong yumi blong stap rere?
Yumi lanem long Elda Rijad G. Skot se “nid ia blong stap klin inaf yuwan i impoten sapos yu wantem stap glad long ol blesing blong tempol. … Fasin we i klin inaf i hapen moa long wan laef we oltaem i mekem ol joes we i stret mo i go wetem ol tijing blong Masta.” 8 Mi laekem toktok ia mekem semmak oltaem. Mekem semmak oltaem, i blong stap kwaet, oltaem, mo stap dipen. !Hemia i wan gud wei blong tokbaot prinsipol blong fasin blong stap klin inaf!
Baebol Diksonari i rimaenem yumi bakegen, “Hom nomo yu save komperem wetem tempol long saed blong ol tabu samting. 9 ?Ol hom o apatmen blong yumi oli tabu? Wan gudfala naes woman long wod blong mifala i kam long hom blong mifala i no longtaem i pas. Mi bin save se brata blong hem i jes kambak long misin, mo mi askem long hem se i olsem wanem blong gat brata blong hem long haos bakegen. Hem i se i gud tumas, be samtaem bae hem i stap askem blong i mekem miusik i go daon. Hem i talem, “! Hemia i no ol rabis miusik tu!” Bae i tekem taem blong yumi blong jekem yumiwan naoia mo afta blong mekemsua se ol hom blong yumi oli ol ples we yumi rere blong filim Spirit. Taem yumi rere long ol hom blong yumi blong kam ol ples we Spirit i welkam long hem, bae yumi rere blong filim moa “long hom” taem yumi go insaed long haos blong Lod.
Taem yumi stap rere long yumiwan blong stap klin inaf blong go insaed long tempol mo stap fetful long ol tempol kavenan, bae Lod i givim “plante moa blesing”10 long yumi. Gud fren blong mi, Boni Oskason, i jes talem klia wan skripja, taem hem i talem, “Taem oli askem moa samting, bambae oli givim moa samting.” 11 !Mi agri fulwan wetem hem!” From se yumi kam long tempol blong kasem ol blesing we oli no save finis; bae hemi no wan sapraes long yumi se bae i gat wan standet we i moa hae blong bae yumi mas kasem blong save kwalifae from ol blesing ia. Elda Nelson i bin tijim bakegen: “From se tempol i haos blong Lod, Hem i putum ol standet we yumi mas mitim blong yumi save go insaed. Yu go insaed olsem visita blong Hem. Blong gat wan tempol rekomen hem i wan janis we i gud tumas bitim evri narawan mo i wan saen we yu save luk mo tajem, blong soem se yu stap obei long Lod mo ol profet blong Hem.” 12
Ol top man blong spot raon long wol mo ol hae yunivesiti studen oli spendem aoa mo dei mo wik mo manis mo iven yia blong stap rere. I nidim blong oli ademap ol drop blong stap rere blong oli save win o pas. Semmak long olgeta we oli wantem kwalifae blong kam olsem wan god insaed long selestial kingdom. Oli mas laef folem wan hae standet blong fasin blong stap obei taem oli eksasaesem klin fasin ia blong obei evri dei mo drop afta drop.
Taem yumi ademap karsin oltaem wetem paoa long tingting, drop afta drop, long ol laet blong yumi long saed blong spirit, blong mekem ol smol mo simpol samting, yumi save gat ol laet blong yumi “we i klin mo i laet gud” 13 wetem gudfala priperesen. I no longtaem i pas, naesfala hasban blong mi we i wan stek presiden, i talem se oltaem hem i save talem taem wan man i rere mo i klin inaf blong go insaed long tempol, from “oli mekem rum i laet” taem oli kam askem blong gat wan tempol rekomen.
Long dedikesen prea blong Ketlan Tempol, Profet Josef Smit i askem Lod “se evri man we i kam insaed long doa blong haos blong Lod bambae i save filim paoa blong Lod, ... blong oli save gro i kam antap moa long Lod, mo kasem Tabu Spirit fulwan, ... mo stap rere blong kasem evri samting we bae oli nidim.”14
Hem i prea blong mi se blong yumi, blong stap go long tempol bae hem i moa bitim wan samting we bae yumi mekem wan taem nomo. Bae yumi stap rere blong stap klin inaf blong kasem ol odinens drop folem drop we bae i save sevem yumi mo kipim wetem ful hat blong yumi ol kavenan we oli kam wetem. Taem yumi mekem olsem, mi save se bae yumi kwalifae blong kasem ful blesing blong Tabu Spirit mo paoa blong Lod insaed long hom blong yumi mo wanwan laef blong yumi. Long nem blong Jisas Kraes, amen.