Sakramen—I Mekem Sol I Kam Niu Bakegen
I Kam Long Jeril A. Esplin
Seken Kaonsela insaed long Praemeri Jeneral Presidensi
Tabu Spirit i hilim mo i mekem sol blong yumi i kam niu bakegen. Promes blesing blong sakramen hem i blong bae yumi “oltaem gat spirit blong Hem wetem [yumi].”
Wan taem, wan grup blong ol yang woman oli bin askem mi wantaem se, “?Wanem nao yu hop se yu bin save taem we yu yang olsem mifala?” Sapos bae mi ansarem kwestin ia naoia, bae mi ademap tingting ia: “Mi hop taem we mi yangfala olsem yufala mi bin andastanem gud mining blong sakramen bitim wanem mi bin save bifo. Mi hop mi bin andastanem sakramen long wei we Elda Jefri R. Holan i bin tokbaot. Hem i se “Wan long ol invitesen we i stap insaed long odinens blong sakramen hem i we hem i wan tru eksperiens long saed blong spirit, wan tabu komunion, hem i mekem sol i kam niu bagegen.’1”
?Hao nao sakramen i save “kam wan tru eksperiens long saed blong spirit, wan tabu komunion, i mekem sol i kam niu bakegen” long wanwan wik?
Sakramen i kam wan eksperiens we i stap mekem spirit i kam strong taem yumi lisin long sakramen prea mo promes bakegen blong kipim ol kavenan blong yumi. Blong mekem hemia, yumi mas wantem blong tekem long yumi nem blong Jisas Kraes. 2 Taem, tokbaot promes ia, Presiden Henri B. Aering i bin tijim: “Hemia i minim se yumi mas lukluk long yumi se yumi blong Hem. Bae yumi putum Hem faswan long laef blong yumi. Bae yumi wantem wanem we Hem i wantem be i no wanem we yumi wantem o wanem we wol i tijim yumi blong wantem.” 3
Taem yumi kakae sakramen, yumi mekem kavenan tu blong “tingbaot oltaem” 4 Jisas Kraes. Long naet bifo oli krusifaem Hem, Kraes i karem tugeta ol Aposol blong Hem mo i statem sakramen. Hem i brekem bred, blesem, mo talem, “Yufala i tekem, yufala i kakae; hemia hem i blong tingbaot bodi blong mi we mi givim blong pemaot yufala.” 5 Afta hem i tekem kap blong waen, talem tangkyu, givim long ol Aposol, mo talem, “Hemia hem i blong tingbaot blad blong mi…, we hem i ron blong hamas man we oli wantem blong bilif long nem blong mi.” 6
Long medel blong ol man blong Nifae mo bakegen long taem we Jos i Kambak long ol lata dei, Hem i talem bakegen se yumi mas tekem sakramen blong tingbaot Hem. 7
Taem yumi kakae sakramen, yumi witnes long God se bae yumi tingbaot oltaem Pikinini blong Hem, be i no blong smol taem blong sakramen odinens ia nomo. Hemia i minim se bae yumi oltaem lukluk long eksampol blong Sevya mo ol tijing blong Hem blong gaedem tingting blong yumi, ol joes blong yumi, mo ol aksen blong yumi.8
Prea blong sakramen tu i rimaenem yumi blong mas “kipim ol komanmen blong Hem.” 9
Jisas i talem: “Sapos yufala i lavem mi, bae yufala i save obei long ol tok blong mi.” 10 Sakramen i givim yumi janis blong lukluk bak long laef blong yumi mo hem i wan janis blong tanem hat mo tingting blong yumi i go long God. Fasin blong stap obei long ol komanmen i karem paoa blong gospel i kam insaed long ol laef blong yumi mo pis we i bigwan moa mo spirit i stap oltaem.
Sakramen i givim wan taem blong wan tru eksperiens long saed blong spirit taem yumi tingting long paoa blong Sevya blong pemaot ol sin mo mekem i posibol blong yumi kambak, tru long Atonmen blong Hem. I no long taem i pas; wan Yang Woman lida i bin lanem abaot paoa we yumi kasem taem yumi traehad blong tingting plante taem yumi tekem sakramen. Taem hem i stap wok insaed long buk ia, Progres blong Miwan, hem i putum wan gol blong lukluk moa long ol toktok blong ol sakramen him mo prea.
Evri wik, hem i lukluk bak long hemwan long taem blong sakramen. Hem i tingting bak long ol mistek we hem i mekem, mo hem i traehad blong kam moa gud long nekis wik. Hem i glad tumas we hem i save stretem ol samting bakegen mo kam klin. Lukluk bak long eksperiens ia, hem i talem, “Mi stap mekem wan pat blong Atonmen we i blong sakem sin.”
Wan Sandei afta we hem i stap lukluk bak long hemwan, hem i stat blong wari mo gat nogud tingting. Hem i luksave se hem i stap ripitim sem mistek ia, evri wik. Be afta wan nara tingting i kam se; hem i stap fogetem wan bigfala pat blong Atonmen—paoa blong Kraes blong mekem i posibol blong yumi kam klin bakegen. Hem i stap fogetem ol taem ia we Sevya i bin helpem hem blong kam olsem we hem i nid blong kam mo blong save givim moa seves bitim hamas hem i save mekem.
Wetem hem ia long tingting blong hem, hem i lukluk bak bakegen long wik we i pas. Hem i talem: “Wan filing blong glad i kam daonem ol harem nogud blong mi taem mi luksave se Hem i bin givim mi plante janis mo paoa. Mi luk save; wetem bigfala tangkyu; paoa ia we mi gat blong luksave nid blong pikinini blong mi taem we man i no luksave. Mi luksave se long dei ia we mi nomo save mekem wan moa samting, be mi bin save blong givim sam toktok we i mekem wan fren i kam strong moa. Mi bin soemaot fasin blong wet longtaem long wan situesen we oltaem mi stap mekem i defren”
Hem i endem: “Taem mi talem tangkyu long God from paoa blong Sevya long laef blong mi we i save mekem mi kam klin bakegen, mi gat wan strong filing blong wantem save moa abaot fasin blong sakem sin we mi stap go tru long hem mo mi lukluk i go long nekis wik wetem niu hop.”
Elda Melvin J. Balad i bin tijim hao sakramen hem i wan eksperiens blong stap mekem i kam gud mo mekem i stap klin. Hem i talem:
“?Huia long medel blong yumi we i no spolem spirit blong hem wetem ol toktok, tingting, mo aksen long ol dei bitwin wan Sabat kasem nara Sabat?” Yumi stap mekem ol samting we i mekem yumi sore biaen, mo wantem blong kasem fogivnes…Rod blong kasem fogivnes hem i… blong sakem ol sin blong yumi, blong go long olgeta we yumi mekem nogud long olgeta mo kasem fogivnes blong olgeta mo kambak long tebol blong sakramen we, sapos yumi sakem sin wetem wan tru hat, mo putum yumi kam stret bakegen, bambae yumi save kasem fogivnes, mo bae spirit i mekem sol blong yumi kam gud bakegen….
“Mi mi wan witnes,” Elda Balad i talem, “se i gat wan spirit i stap atendem wok blong sakramen we i givim wan wom filing long sol we i ron stat long hed kasem leg; yu filim ol so blong spirit i kam oraet, mo karemaot wanem we i hevi. Kamfot mo glad i kam long sol we i klin mo wantem tek pat long kakae blong spirit ia, wetem wan tru hat.” 11
Ol so blong sol i save kam oraet mo kam niu bakegen i no from nomo se bred mo wota ia i rimaenem yumi long sakrifaes blong Sevya long mit mo blad blong Hem, be from saen ia i rimaenem yumi tu se bae Hem i stap oltaem olsem “bred blong laef” 12 blong yumi mo “wota we i givim laef.” 13
Afta we Hem i givim sakramen i go long ol man blong Nifae, Jisas i talem:
“Hem we i kakae bred ia, i kakae long bodi blong mi from sol blong hem, mo hem we i dring long waen ia i dring long blad blong mi from sol blong hem; mo sol blong hem bae i neva hanggri mo tosta, be bae i kam fulap.
“Nao taem we evriwan long grup blong pipol ia i bin kakae mo bin dring, luk oli bin kam fulap wetem Tabu Spirit.” 14
Wetem ol toktok ia, Kraes i tijim yumi se Tabu Spirit i hilim mo i mekem sol blong yumi i kam niu bakegen. Promes blesing blong sakramen hem i blong yumi “oltaem gat Spirit blong Hem blong stap wetem [yumi].” 15
Taem mi tek pat long sakramen, samtaem mi pikjarem long maen blong miwan peinting we i soem Sevya we i laef bakegen long ded i stretem han blong Hem, olsem we Hem i rere blong putum han raon yumi wetem lav. Mi laekem penting ia. Taem mi tingbaot hemia long taem blong sakramen, i leftemap sol blong mi olsem we mi save harem ol toktok blong Sevya: “Luk, mi stap stretem han blong sore blong mi i go long yufala, mo eni man we bae i kam, hem bae mi akseptem, mo olgeta we i kam long mi i kasem blesing.” 16
Olgeta we oli holem Aronik Prishud oli ripresentem Sevya taem we oli priperem, blesem mo pasem sakramen. Taem wan we i gat prishud i stretem han blong hem blong givim long yumi ol tabu kakae, hem i olsem we Sevya Hemwan i stap stretem han blong sore blong Hem, invaetem wanwan long yumi blong tekpat long naesfala presen ia blong lav, we i kam long yumi tru long bigfala sakrifaes blong Hem blong pemaot sin blong yumi—ol presen blong fasin blong sakem sin, fasin blong fogiv, kamfot, mo hop.17
Moa yumi stap tingting hevi long mining blong sakramen, moa bae hem i kam tabu mo gat fulap mining long yumi. Hemia nao wanem we wan papa we i gat 96 yia i talem long boe blong hem taem we hem i askem, “Papa, from wanem yu stap go long jos??Yu no save lukluk, yu no save harem, yu no save wokbaot gud? Papa i ansa se, “Hem i sakramen. Mi go blong tekpat long sakramen.”
Bae wanwan long yumi i kam long sakramen miting rere blong gat “wan tru eksperiens long saed blong spirit, wan tabu komunion, mekem sol [blong yumi] i kam niu bakegen.” 18
Mi save se Papa blong yumi Long Heven mo Sevya blong yumi i stap laef. Mi tangkyu tumas from janis we sakramen i givim blong filim lav blong Tufala mo blong gat Spirit. Long nem blong Jisas Kraes, amen.