“Ol Tingting blong Kipim long Maen: Ol Profet mo Ol Profesi,” Kam Folem Mi—Blong Wanwan Man, Woman mo Famli: OlTesteman 2022 (2021)
“Ol Tingting blong Kipim long Maen: Ol Profet mo Ol Profesi,” Kam Folem Mi—Blong Wanwan Man, Woman mo Famli: 2022
Ol Tingting blong Kipim long Maen
Ol Profet mo Ol Profesi
Long nomol Kristin wei we oli putum ol buk blong OlTesteman, las seksen (Aesea kasem Malakae), oli singaotem “Ol Profet.”1 Seksen ia, we i wan pat aot long fo blong ful OlTesteman, i gat insaed ol toktok blong ol wokman blong God, we oli bin kasem raet blong Hem, we oli bin toktok wetem Lod, mo afta oli bin toktok long bihaf blong Hem, mo oli bin serem mesej blong Hem wetem ol pipol we oli bin laef samples 900 mo 500 BKB.2
Ol profet mo ol profesi oli gat wan bigfala rol truaot long OlTesteman. Ol petriak ia, Ebraham, Aesak, mo Jekob, oli bin luk ol visen mo oli bin toktok wetem ol mesenja we oli kam long heven. Moses i bin toktok wetem God, we i luk fes blong Hem, mo afta, i talemaot tingting blong God long ol pikinini blong Isrel. Ol buk blong Fas mo Seken King, oli stap tokbaot bakegen ol gudfala wok mo mesej blong ol profet ia, Elaeja mo Elisa. OlTesteman i stap tokbaot tu ol woman profet olsem Meriam Eksodas 15:20) mo Debora (luk long Jajes 4), wetem ol nara woman we God i blesem olgeta wetem spirit blong profesi, olsem Rebeka (luk long Jenesis 25:21–23) mo Hana (luk long 1 Samuel 1:20–2:10). Mo i nomata se ol stret profet oli no bin raetem Ol Sam, olgeta tu oli bin fulap wetem spirit blong profesi, speseli taem oli stap luk i go long taem we bae Mesaea i kam.
I no gat wan long samting ia we i stap olsem wan sapraes long ol Ol Lata-dei Sent. Wanem i tru, i we, gospel ia we i kambak, we i blong Jisas Kraes, i stap tijim yumi se, ol profet, oli no jes wan intresting pis blong histri, be tu, i wan pat we i nid blong stap insaed long plan blong God. Taem we sam oli maet luk ol profet olsem se olgeta oli blong ol taem blong OlTesteman nomo, be yumi, yumi luk olgeta olsem wan samting we yumi gat we i semmak wetem ol taem blong OlTesteman.
Be yet, taem yu ridim wan japta aot long Aesea o Esikel, bae yu filim se i defren long taem we yu stap ridim wan mesej blong Jeneral Konfrens we i kam long Presiden blong Jos we i stap laef tedei. Samtaem, bae i had blong luk se ol profet blong bifo oli bin gat wan samting blong talem long yumi. From se, long en, wol ia we yumi stap laef long hem tedei, i defren olgeta long wol ia we oli bin stap long hem mo stap prij mo profesae. Mo tru samting i we, yumi gat wan profet we i stap laef, i save mekem man i askem wan kwestin: ?From wanem bae i wan gud samting—mo bae i nidim sam hadwok—blong stap ridim ol toktok blong ol profet blong bifo?
Oli gat wan samting blong talem long yumi tedei
Long plante ples long buk ia, ol profet blong OlTesteman oli no bin stap toktok long ol pipol blong tedei. Olgeta profet ia oli bin gat ol tru poen blong wari we oli bin stap toktok from long taem blong olgeta mo long ples blong olgeta—semmak olsem ol lata-dei profet blong yumi oli stap toktok from ol tru poen blong wari tedei.
Long semtaem, ol profet oli save luk i go bitim ol tru poen blong wari tedei. Wan samting i stap, oli bin tijim ol trutok we oli no save finis, we i blong eni taem. Mo, from se oli bin gat blesing ia blong kasem revelesen, oli bin luk bigfala moa pikja, oli bin gat bigfala lukluk ia blong wok ia blong God. Eksampol. Aesea i bin save givim woning long ol pipol blong taem blong hem abaot sin blong olgeta—be tu, hem i bin save raet abaot taem ia we Ol Man Isrel bae oli kam fri, hemia 200 yia long fiuja taem, mo semtaem, hem i bin tijim abaot fasin ia blong kam fri, we evri pipol blong God i stap lukaotem. Antap long hemia, hem i bin save raetem ol profesi, we iven tedei, oli stap wet yet blong kamtru—olsem ol promes ia blong “wan niufala wol” (Aesea 65:17) we “i fulap gud long ol man we oli savegud Hae God” (Aesea 11:9), ples ia we ol traeb blong Isrel we oli bin lus oli kam tugeta bakegen, mo ples we “naranarafala kantri … neva bambae oli save mekemrere bakegen blong go mekem faet” (Aesea 2:4). Pat blong glad ia mo insperesen we i kam taem yumi ridim ol toktok blong ol profet blong OlTesteman olsem Aesea, i blong luksave se yumi plei wan rol long dei blong glori ia we oli bin luk long visen.3
Mekem se, taem yu stap ridim ol profesi blong bifo, bae i help blong lan abaot taem ia we oli bin stap raetem ol toktok ia. Be tu, yu mas luk yu insaed long ol toktok ia, o yu mas save “yusum evri skripja long laef blong [yu],” semmak olsem we Nifae i talem (luk long 1 Nifae 19:23–24). Samtaem, hemia i minim blong luksave Babilon olsem wan saen blong stap folem fasin blong wol, mo gat hae tingting, be i no jes blong luksave se hem i wan bigfala taon blong bifo. Hem i save minim blong andastanem Isrel olsem wan pipol blong God long eni taem, mo blong andastanem se, Saeon, i wanem ol pipol blong God blong ol lata-dei oli stap akseptem, be i no jes wan nara toktok blong tokbaot Jerusalem.
Yumi save yusum ol skripja long yumiwan from se yumi andastanem se, wan profesi, hem i save kamtru long plante defren wei.4 Wan gudfala eksampol blong hemia, hem i profesi we i stap long Aesea 40:3: “Mi harem wan man i stap singaot se, ‘!Hae God i God blong yumi! !Yufala i go longwe long ples we i no gat man long hem, yufala i mekemrere rod blong hem! !Yufala i klinimgud rod ya long draeples, blong hem i save kam!” Long Ol Jiu we oli prisena i stap long Babilon, maet toktok ia i save tokbaot Lod we i givim wan rod blong kamaot long kalabus mo oli gobak long Jerusalem. Long Matiu, Mak, mo Luk, profesi ia i bin kamtru tru long Jon Baptaes, we i bin mekem rere rod blong Sevya blong Hem i givim seves blong Hem long wol ia.5 Mo Josef Smit i bin kasem wan revelesen se, profesi ia, i stap kamtru yet tru long ol wok blong mekem rere, long ol las dei ia, blong Kraes i kam mekem seves blong hem long mileniom taem ia.6 Long sam wei, yumi stap kam yet blong andastanem se ol profet blong bifo, oli bin stap toktok long yumi. Mo oli bin tijim plante trutok we oli impoten mo oli no save finis, we oli stret long yumi tedei, semmak olsem we oli bin stret long Isrel blong bifo.
Taem we Evri Wok blong God I Kamtru, i kam long Greg K. Olsen
Oli stap testifae abaot Jisas Kraes
Maet wan samting we i moa impoten bitim blong luk yuwan long ol profesi blong OlTesteman, i blong luk Jisas Kraes insaed long olgeta. Sapos yu lukluk gud blong faenem Hem, bae yu faenem Hem, iven sapos oli no talem nem blong Hem. Bae i save helpem yu blong yu kipim long maen blong yu se God blong OlTesteman, Lod ia we i Jehova, Hem i Jisas Kraes. Eni taem we ol profet oli stap tokbaot wanem we Lod i stap mekem, o wanem bambae hem i mekem, oli stap tokbaot Sevya ia.
Bambae yu faenem tu ol refrens long Wan we Oli Anoentem Hem (luk long Aesea 61:1), wan Ridima (luk long Hosea 13:14), mo wan fiuja King we bae i kamaot long laen blong Deved (luk long Aesea 9:6–7; Sekaraea 9:9). Olgeta ia, evriwan oli ol profesi abaot Jisas Kraes. Long bigfala toktok, bambae yu rid abaot fasin blong mekem man i fri, fogivnes, fasin blong pemaot sin, mo fasin blong putumbak gospel. Wetem Sevya long maen mo hat blong yu, olgeta profesi ia, bambae oli poenem yu i go long Pikinini blong God. Long en, bes wei blong andastanem profesi, hem i blong gat “spirit blong profesi,” we Jon i talem se hem i wan “testemoni abaot Jisas” (Revelesen 19:10).