Esta, i kam long James Johnson

25–31 Julae

Esta

“Yu Yu Kam blong Bambae Yu Save Givhan long Yumi long Hadtaem Ia”

Taem yu stap ridim Esta, askem blong Spirit i tijim yu, mo raetemdaon ol tingting mo ol filing blong yu.

Raetemdaon Ol Filing mo Tingting blong Yu

Plante stori long buk blong Esta i luk olsem hem i laki blong hem o i hapen se i tekem ples long semtaem. ?Olsem wanem nao yu save eksplenem se wan gel Jiu we i nogat mama mo papa i kam kwin blong Pesia long raet taem blong sevem ol pipol blong hem blong oli no kilim olgeta i ded? ?Wanem nao ol janis i stap blong kasen brata blong Esta, Modekae, i hapen blong harem plan ia blong kilim king i ded? ?Oli sapraes?, o ?oli pat blong wan tabu plan ia? Elda Ronald A. Rasband i talem: “Wanem bae i luk olsem wan janis nomo, be i tru nomo, i gat wan Papa long Heven we i gat lav i stap luk daon long yumi. … Lod i stap long ol smol ditel blong laef blong yumi” (“Tru long Tabu Plan blong God,” churchofjesuschrist.org/general-conference/2017/10?lang=bis, Okt 2017, ). Bae oltaem yumi no luksave paoa blong Lod long ol “smol ditel” ia. Be yumi lanem long eksperiens blong Esta se Hem i save lidim rod mo rere long yumi “long taem ia” (Esta 4:14) taem yumi save kam ol tul blong wok long han blong Hem blong mekem ol stamba tingting blong Hem oli kam tru.

Blong gat wan bigfala lukluk long Buk blong Esta, luk long “Esther book of” insaed long Bible Dictionary.

Ol Aedia blong Skripja Stadi blong Yuwan

Esta

Lod i save mekem mi kam wan tul blong blesem ol narafalawan.

Sista Anne C. Pingree i tijim: “Blong kam wan tul long han blong God hem i wan bigfala janis mo tabu responsabiliti. Weaples yumi stap long hem, wanem samting yumi stap fesem long laef, i nomata se yu mared o no, o hamas yia blong yu, Lod i nidim wanwan long yumi blong mekem spesel pat blong [yumi] blong bildim kingdom blong Hem long las dispensesen ia” (“Knowing the Lord’s Will for You,” Liahona, Nov. 2005, 112).

Taem yu stap ridim storian blong Esta, tingting hevi olsem wanem toktok ia i blong hem. Lukaotem ol wei we Lod i mekem i posibol blong i save sevem Ol Man Jiu (eksampol, luk long Esta 2:21–23; 3:10–14; 4:14–16). Afta tingting hevi long olsem wanem Hem i lidim laef blong yu long ol wei we yu save blesem ol narafalawan. ?Wanem nao sam long ol situesen o rilesensip we yu filim se i lidim yu i go “long taem olsem hemia”? (Esta 4:14). Sapos yu gat wan petriakel blesing, tingting blong ridim mo lanem moa abaot wok we Lod i gat blong yu mekem.

Esta 3; 5:9– 14;7

Hae tingting mo kros i save spolem yu.

Long Buk blong Esta, yumi lanem olsem wanem Esta mo Modekae i stap fetful, mo tu, yumi lanem samting aot long hae tingting mo kros blong Haman. Taem yu stap rid long Esta 3; 5:9–14, tingting blong raetemdaon ol filing, toktok, mo aksen blong Haman. ?Wanem nao oli soem abaot hem mo wanem hem i wantem mekem? ?Wanem risal nao hem i fesem? (luk long Esta 7). Taem yu stap rid abaot Haman, bae i save mekem se yu wantem skelem wanem i stap pusum, o i stap biaen ol filing mo aksen blong yuwan. ?Yu bin kasem insperesen blong mekem eni jenis? ?Olsem wanem nao yu save tanem yuwan i go long Papa long Heven blong i helpem yu?

Luk tu long Ol Proveb 16:32; Alma 5:28.

Esta 3–4; 5:2–3; 8:11–12

Blong livim kakae i soem mi stap dipen long Lod.

Luk wanem kondisen nao i mekem Esta wetem ol narafala Jiu oli livim kakae (luk long Esta 3:13; 4:1–3, 10–17). ?Olsem wanem nao lego kakae i wan blesing long olgeta? (luk long Esta 5:2–3; 8:11–12). ?From wanem nao Lod i askem yumi blong livim kakae? (luk long Gospel Topics, “Fasting and Fast Offerings,” topics.ChurchofJesusChrist.org). Tingting long wanem yu save mekem blong fasin blong livim kakae i kam wan blesing long laef blong yu.

Luk tu long Aesea 58:6–12; Matiu 4:1–4; 17:14–21; “Fasting: Young Single Adult Ward, Amanda” (vidio), ChurchofJesusChrist.org.

Esta 3:1–11; 4:10–17; 5:1–4

Blong mekem wan samting we i raet i nidim strong paoa long tingting.

Taem we Modekae mo Esta i stanap from bilif blong tufala, tufala i putum laef blong tufala long denja. Ol joes blong yumi i gat ol risal we i maet no nogud tumas, be blong mekem wan raet samting i stil nidim blong wan i gat strong paoa long tingting. ?Wanem nao yu lanem long Esta 3:1–4; 4:10–17 abaot blong fasin blong gat strong paoa long tingting blong mekem wan raet samting? Luk se ol defren risal we Modekae mo Esta i fesem afta we tufala i soem strong paoa long tingting blong tufala (luk long Esta 3:5–11; 5:1–4). ?Wanem nao wan man i nid blong save abaot God blong save mekem ol joes we Esta mo Modekae i bin mekem—blong mekem wanem i raet nomata long ol risal blong hem?

Nekis taem yu tingting long risal blong mekem wanem i raet, yu maet wantem putum ol toktok blong Esta, we i gat paoa, long Esta 4:16 long situesen blong yuwan. Eksampol, yu save talem long yuwan, “Taem mi jusum raet, sapos mi [lusum ol fren], be mi [lusum ol fren] ia nao.”

Luk tu long Thomas S. Monson, “May You Have Courage,” Liahona, May 2009, 123–27.

Esta long fored blong King, i kam long Minerva K. Teichert

Ol Aedia blong Famli Skripja Stadi mo Haos Naet

Esta 1–10.Afta we yu luklukbak long stori blong Esta (luk long “Kwin Esta” long Ol Stori long OlTesteman o vidio “For Such a Time as This,” ChurchofJesusChrist.org), maet bae famli blong yu i laekem blong mekem ol simpol doli blong sam long ol pipol ia insaed long stori (luk long aktiviti pej blong wik ia long Kam Folem Mi—Blong Praemeri). Oli save yusum olgeta blong talem stori ia bakegen. Yu save singsing wan singsing abaot olsem wanem blong no stap fraet mo stap tru, olsem “Gud Wok Oltaem Stret Laef Oltaem” (STSP, 64) o “Do What Is Right” (Hymns, no. 237). ?Wanem toktok long singsing ia i mekem yu tingbaot Esta?

Esta 2:5–7.?Wanem nao yumi save lanem aot long eksampol blong Modekae blong helpem ol memba blong famli long ol taem blong tes? ?Huia long famli blong yumi i nidim sapot blong yumi? Mekem wan plan blong helpem olgeta.

Esta 4:15–17.Fasin blong Esta, blong no stap fraet, i save givim insperesen long famli blong yu blong toktok raon long olsem wanem yufala i save gat strong paoa long tingting blong stanap from trutok long ol situesen we oli stap fesem. ?Wanem nao Esta i minim taem hem i talem “Mo sapos i minim se mi mi mas ded from, be bambae i mas olsem”? ?Olsem wanem nao ol toktok blong hem i tijim yumi blong yumi no mas fraet? Vidio ia: “Courage” (ChurchofJesusChrist.org) i givim sam eksampol.

Esta 9:26–32.Lafet blong Purim blong Ol Man Jiu oli putum blong tingbaot storian blong Esta. Long taem blong kakae long wik ia, tingting blong serem ol stori blong ol taem we ol memba blong famli, we i tekem tu ol bubu blong bifo, oli blesem laef blong ol narawan taem oli stanap from raet samting olsem we Esta i bin mekem.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Gud Wok Oltaem, Stret Laef Oltaem,” STSP, 64.

Stap Kam Antap long Fasin blong Yumi blong Stap Tij

Gat wan laef we i semmak long laef blong Sevya. “Be paoa blong Jisas blong tij mo leftemap ol narawan, i kam long wei we Hem i bin stap laef mo i kam long huia Hem. Moa yu wok strong wetem strong tingting blong traehad blong laef olsem Jisas Kraes, moa bae yu kam blong save tij long wei we Hem i bin tij” (Teaching in the Savior’s Way, 13).

Kwin Esta, i kam long Mineva Tejet. © Wiliam mo Beti Stoks