“18–24 Julae. Esra 1; 3–7; Nehemaea 2; 4–6; 8: ‘Mi Mi Stap Mekem Wan Bigfala Wok,’” Kam Folem Mi—Blong Wanwan Man, Woman mo Famli: OlTesteman 2022 (2021)
“18–24 Julae. Esra 1; 3–7; Nehemaea 2; 4–6; 8,” Kam Folem Mi—Blong Wanwan Man, Woman mo Famli: 2022
Pikja blong Tempol blong Serubabel, i kam long Sam Lawlor
18–24 Julae
Esra 1; 3–7; Nehemaea 2; 4–6; 8
“Mi Mi Stap Mekem Wan Bigfala Wok”
Presiden Ezra Taft Benson i tijim se: “Tok blong God … i gat paoa blong mekem Ol Sent oli strong mo oli holem Spirit blong oli save stanap agensem ol rabis samting, holemtaet gud samting, mo faenem glad long laef ia” (Teachings of Presidents of the Church: Ezra Taft Benson [2014], 118).
Raetemdaon Ol Filing mo Tingting blong Yu
Ol Jiu pipol oli bin stap olsem ol prisena blong Babilonia blong 70 yia olsem. Oli lusum Jerusalem mo tempol, mo plante oli fogetem komitmen blong olgeta blong folem loa blong God. Be God i no fogetem olgeta. I tru, Hem i talemaot tru long profet blong Hem: “Mi tekem yufala i kambak long stret ples blong yufala bakegen” (Jeremaea 29:10). Stap tru long profesi ia, Lod i mekem wan wei blong Ol Jiu oli gobak, mo Hem i bin setemap ol wokman blong Hem blong flatem “bigfala wok” blong pipol blong Hem (Nehemaea 6:3). Ol wokman ia, i tekem tu wan gavna we nem blong hem Serubabel, we i stap lukluk long bildimbak haos blong Lod; Esra, wan pris mo man blong raet we i tanem hat blong ol pipol i gobak long loa blong Lod; mo Nehemaea, wan narafala gavna blong Juda, samtaem afta, we i lidim wok blong bildimbak ol wol blong protektem Jerusalem. I gat fasin blong go agens, yes i tru, be tu, oli kasem help we i kam long ol ples we oli no ting se bae help i save kam long hem. Ol eksperiens blong olgeta i save talem mo givim insperesen long yumi, from se yumi tu, yumi stap mekem bigfala wok ia. Mo olsem blong olgeta, yumi gat plante wok blong mekem wetem haos blong Lod, loa blong Lod, mo proteksen long saed blong spirit we yumi faenem long Hem.
Blong gat wan bigfala lukluk long Buk blong Esra, luk long “Ezra, book of” mo “Nehemaea” insaed long Bible Dictionary.
Ol Aedia blong Skripja Stadi blong Yuwan
Lod i givim insperesen long pipol blong mekem ol stamba tingting blong Hem.
Afta we Pesia i winim Babilonia, king blong Pesia, Sirus, i kasem insperesen long Lod blong sendem ol grup blong Ol Man Jiu blong go long Jerusalem we oli stap bildimbak tempol. Taem yu stap rid long Esra 1, teknot se Sirus i wantem tumas blong sapotem ol Jiu long impoten wok ia. ?Olsem wanem nao yu luk Lod i wok tru long ol man mo woman raon long yu, we i tekem tu olgeta we oli no memba blong Jos blong Hem? ?Wanem nao hemia i soemaot long yu abaot Lod mo wok blong Hem?
Luk tu long Aesea 44: 24–28.
Tempol i save karem glad i kam long mi.
Taem Babilonia i kam insaed long Jerusalem, oli prapa spolem gud tempol ia mo bonem gud long faea (luk long 2 King 25:1–10; 2 Kronikel 36:17–19). ?Bae yu filim olsem wanem sapos yu bin stap wetem Ol Jiu we oli bin witnesem wanem i bin hapen long taem ia? (Luk long Sam 137). Luksave hao nao ol Jiu ol filim, plante yia afta, taem oli letem olgeta blong kambak mo bildim bak tempol (luk long Esra 3:8–13; 6:16–22). Tingting hevi lon gol filing blong yuwan abaot tempol. ?From wanem tempol hem i stamba blong glad? ?Hao nao yu soemaot glad blong yu from ol tempol blong Lod?
Blong luk ol eksampol blong tedei blong glad blong bildim ol tempol, luk ol vidio ia “Practice, Celebration, Dedication: Temples in El Salvador” mo “The Laie Hawaii Temple Youth Cultural Celebration” (ChurchofJeusChrist.org).
Tempol i save stap olsem wan stamba blong glad long laef blong yumi.
Mi save help blong mekem wok blong God oli go fored iven sapos i gat fasin blong go agens.
Oltaem i mas gat agens long wok blong Lod, mo hemia i tru from ol efot we Serubabel mo Nehemaea i bin go tru long hem. Long tugeta kes, “enemi blong Juda” (Esra 4:1) hem i Ol Man Sameria—laen blong Ol Man Isrel we oli miks wetem Ol Jentael. Ridim abaot fasin blong go agens blong olgeta blong bildim tempol (luk long Esra 4–6) maet bae i lidim yu blong tingting hevi long enemi we wok blong God i fesem tedei mo olsem wanem bae yu ansa taem fasin blong go agens i kam.
Semmak nomo, taem yu stap rid abaot wok blong Nehemaea we i stap fiksim ol wol blong Jerusalem (luk long Nehemaea 2; 4;6) maet bae i save mekem yu luklukbak long wok we God i wantem yu blong mekem. ?Wanem nao yu lanem aot long eksampol blong Nehemaea?
Luk tu long Dieter F. Uchtdorf, “We Are Doing a Great Work and Cannot Come Down,” Liahona, May 2009, 59–62.
Mi kasem blesing taem mi stadi olgeta skripja.
Iven afta we oli bildim tempol bakegen, ol pipol, blong Jerusalem oli traehad long saed blong spirit, long pat ia from se, blong plante jeneresen, oli nogat tumas akses long “buk blong loa blong Moses” (Nehemaea 8:1). Esra, man blong raet i kasem raet long king blong Pesia blong go long Jerusalem, we hem bae “i tekem buk blong loa i go long olgeta” (Nehemaea 8:2). ?Hao nao bae yu folem eksampol blong Esra we oli talem long Esra 7:10? Taem yu stap rid long Nehemaea 8, we i givim wan sot storian blong Esra we i stap ridim loa long ol pipol, ?wanem ol tingting yu gat abaot paoa blong tok blong God long laef blong yu?
Luk tu long Teachings: Ezra Taft Benson, 115–24.
Ol Aedia blong Famli Skripja Stadi mo Haos Naet
-
Esra 3:8–13; 6:16–22.?Olsem wanem nao Ol Jiu oli soem glad blong olgeta from tempol taem oli stap bildimbak bakegen mo taem oli dediketem? ?Wanem nao yumi stap mekem blong soem glad blong yumi from tempol? Ating famli blong yu oli save lukluk long ol pikja blong tempol mo tokbaot hao nao tempol i karem glad i kam long yu (luk temples.ChurchofJesusChrist.org).
-
Esra 7:6, 9–10, 27–28.Plante taem long ol ves ia, Esra i raetem se han blong Lod i stap wetem hem taem hem i travel i go long Jerusalem. ?Wanem nao sentens ia i minim? ?Olsem wanem nao yumi bin stap filim han blong Lod long yumi? Ating ol famli memba oli save serem ol eksampol long laef blong olgeta.
-
Nehemaea 2; 4; 6.Stori blong Nehemaea i save givim insperesen long ol memba blong famli abaot taem oli fesem enemi taem oli stap mekem “bigfala wok ia” (Nehemaea 6:3). Ol memba blong famli oli save bildim wan wol long ol samting we i stap raon long haos blong yu taem yufala i rid tugeta ol ki skripja (olsem Nehemaea 2:17–20; 4:13–18; 6:1–3). ?Wanem nao yumi lanem abaot Nehemaea we i stap fesem fasin blong go agens? ?Wanem bigfala wok we Lod i wantem yumi blong mekem? ?Olsem wanem nao Lod i mekem yumi kam moa strong blong save winim fasin blong go agens long wok ia?
-
Nehemaea 8:1–12.Long Nehemaea 8, Esra i ridim loa blong Moses long ol pipol we oli wantem tumas blong harem tok blong God. Taem yu stap ridim ol ves 1–12 i save helpem famli blong yu blong luksave tok blong God. ?Hao ol pipol oli filim abaot loa blong God? ?Hao nao yumi save helpem wanwan long yumi “andastanem riding ia”? (ves 8).
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “I Love to See the Temple,” Children’s Songbook, 95.
Kam Antap long Fasin blong Yumi blong Stap Tij
Serem ol skripja olsem wan famli. Long taem blong famli skripja stadi, letem ol memba blong famli oli serem ol skripja long stadi blong olgetawan we i gat mining long olgetawan.
Pikja droing blong Esra i stap ridim olgeta skripja long ol pipol long Jerusalem, i kam long H. Willard Ortlip, © Providence Collection/oli karem laesens long goodsalt.com