Elaeja I Traem Ol Pris blong Bal, i kam long Jerry Harston

27 Jun–3 Julae

1 King 17–19

“Sapos Hae God I God, I Gud Yufala I Mekem Wosip long Hem”

Taem yu stap ridim olgeta skripja, yu stap praktisim fet blong yu, we i rere long hat mo maen blong yu blong harem “kwaet smol voes” blong Spirit (1 King 19:12).

Raetemdaon Ol Filing mo Tingting blong Yu

Haos blong Isrel i olbaot. Yuniti mo jeneresen we i kam long Deved mo Solomon i pas longtaem finis, mo rilesensip blong kavenan blong nesen wetem Lod i, blong plante pipol, wan memori blong longtaem. Kingdom blong Isrel i seraot, wetem ol ten traeb we oli mekem Not Kingdom blong Isrel, mo tu (2) traeb we i mekem Saot Kingdom blong Juda. Tufala kingdom ia i no stap gud long saed blong spirit; ol king we i lidim olgeta oli brekem ol kavenan blong olgeta wetem Lod mo oli mekem ol narafalawan oli mekem i semmak (uk long 1 King 11–16). Be apostasi i strong tumas, speseli long Not Kingdom; longwe, King Ehab i leftemap tingting blong Isrel blong oli wosipim giaman god ia, Bal.

Hem i long taem ia nao we oli singaotem profet Elaeja blong hem i prij. Stori blong seves blong hem i mekem i klia se fet blong yuwan long Lod i save mekem yu stanap strong iven long wan ples we i fulap long sin. Samtaem Lod i ansa long kaen fet olsem ia wetem ol bigfala, pablik merikel, olsem faea we i kamaot long heven mo i foldaon i kam. Be God i mekem tu ol kwaet, praevet merikel, olsem blong helpem nid blong wan fetful wido mo boe blong hem. Mo plante taem, ol merikel blong Hem oli blong yu nomo mekem se yu nomo yu save—eksampol, taem we Lod i soemaot Hemwan long yu mo i talemaot tingting blong Hem tru long “wan kwaet smol voes” (1 King 19:12).

Blong save moa abaot Elaeja, luk long “Elijah” long Bible Dictionary.

Ol Aedia blong Skripja Stadi blong Yuwan

1 King 17:1–16

Wan invitesen blong mekem sakrifaes i wan janis blong praktisim fet blong miwan.

Maet long fas ples bae i had blong andastanem from wanem nao profet Elaeja i askem wido long Jarefat blong givim hem kaekae mo wota bifo hem i fidim hemwan mo boe blong hem we i hanggri i stap. Be rikwes blong Elaeja, bae i luk olsem wan blesing long smol famli ia. Oli nidim blesing blong Lod, mo sakrifaes i karem ol blesing oli kam—we i tekem tu blesing blong gat wan fet we i strong moa.

Taem yu stap ridim stori ia, putum yuwan long ples blong gudfala wido ia. ?Wanem nao i tajem yu abaot wido ia? Tingting long ol janis we yu gat blong praktisim fet blong yu—we i tekem tu, ol janis blong mekem sakrifaes. ?Olsem wanem yu save kam moa olsem wido ia?

Luk tu long Matiu 6:25–33; Luk 4:24–26; Lynn G. Robbins, “Tithing—a Commandment Even for the Destitute,” Liahona, May 2005, 34–36.

1 King 18

“Sapos Hae God I God, I Gud Yufala I Mekem Wosip long Hem.”

Ol Man Isrel maet oli gat ol gud risen blong oli wosipim Bal i nomata we komanmen blong Lod i talem se: “Bambae yufala i no mas mekem wosip long narafala god” (Eksodas 20:3). Bal, oli save long hem olsem god blong hariken mo ren, mo afta tri yia we ples i drae, oli wantem tumas blong gat wan strong win mo ren. Mo king mo kwin i akseptem blong oli mekem wosip long Bal. Taem we yu stap ridim 1 King 18, tingting long eni situesen long laef blong yu we bae i komperem yu long situesen we Ol Man Isrel oli stap long hem. ?I bin gat wan taem finis i hapen we yu no save disaed se bae yu folem Lod o no, from i luk se ol narafala wei we oli stap oli moa stret mo i moa swit? (luk long 1 King 18:21). Long ol samting we oli hapen long japta ia, ?wanem nao yu ting se Lod i stap traem blong tijim ol pipol abaot Hem mo abaot Bal? ?Wanem eksperiens nao i bin tijim yu abaot ol semmak trutok ia?

Maet bae i intresting blong teknot long ol samting we Elaeja i talem mo mekem long japta ia we i soemaot fet blong hem long Lod. ?Wanem nao yu lanem aot long Elaeja abaot fet?

Luk tu long Josua 24:15; 2 Nifae 2:26–28; D. Todd Christofferson, “Choice and Commitment” (worldwide devotional for young adults, Jan. 12, 2020), ChurchofJesusChrist.org.

Wan simbol peinting blong 1 King 19:11–12. Profet Ia, © Robert Booth Charles/Bridgeman Images

1 King 19:1–18

Lod oltaem i toktok long wan wei we i simpol.

Taem we Kwin Jesebel i harem abaot wanem i hapen long ol pris blong hem long Hil Kamel, hem i no konvet nating—hem i bin kros. From se hem i fraet from laef blong hem, Elaeja i ronwe i go long waelples, mo lukaotem ples blong haed long wan hol blong ston. Long ples ia, hem i gat trabol blong faet wetem filing blong stap hemwan mo slak tingting; nao hem i bin gat wan eksperiens wetem Lod we i defren long wanem i bin hapen long Hil Kamel. ?Wanem nao, eksperiens we Elaeja i gotru long hem long 1 Kings 19:1–18 i tijim yu abaot wei we Lod i stap toktok long yu long ol taem blong nid blong yu? Tingting long ol taem long laef blong yu we yu bin eksperiensem voes blong Hem. ?Wanem nao yumi nidim blong mekem blong kasem ol blesing blong kavenan ia plante moa taem?

Tingting hevi long ol tok mo ol sentens we oli yusum long ol ves ia blong talemaot olsem wanem Lod i toktok wetem yumi: Hileman 5:30; 3 Nifae 11:3–7; Doktrin mo Ol Kavenan 6:22–23; 8:2–3; 9:8–9; 11:12–14; 36:2.

Luk tu long Sam 46:10; 1 Nifae 17:45; Russell M. Nelson, “Lisin Gud long Hem,” Liahona, Mei 2020, 88–92.

1 King 19:19–21

Blong wok blong Lod i faswan ova long ol samting blong wol.

I tru se Elisa i gat 12 yok blong buluk mo maet hemia i soem se hem i wan man we i gat rij samting. ?Wanem nao i tajem yu abaot ol aksen blong hem we oli raetem long 1 King 19:19–21? ?Olsem wanem nao bae yu folem eksampol blong Elisa?

Luk tu long Matiu 4: 18–22.

Ol Aedia blong Famli Skripja Stadi mo Haos Naet

1 King 17:1–16.Vidio ia “Elijah and the Widow of Zarephath” (ChurchofJesusChrist.org) o peinting we i go wetem aotlaen ia i save helpem famli blong yu blong gat wan pikja abaot stori we i stap long 1 Kings 17:1–16. Afta we yu ridim ol ves ia mo lukluk long ol risos ia, wanwan memba blong famli i save raetemdaon ol insperesen kwaliti we wido i gat. ?Wanem nao Lod i askem yumi blong mekem blong soemaot fet blong yumi?

1 King 18.“Elijah and the Priests of Baal” (insaed long Ol Stori long OlTesteman) i save helpem famli blong yu blong lanem stori ia long 1 King 18. ?Ol samting ia oli stap stopem yumi blong yumi komitim yumi fulwan long Lod? ?Olsem wanem nao bae yumi soem se yumi jusum blong folem Hem? (luk long ves 21).

1 King 19:11–12.?Wanem nao bae i helpem famli blong yu andastanem olsem i impoten blong lisin long “kwaet smol voes ia”? Yu save rid long 1 King 19:11–12 tugeta long wan voes we i kwaet, o yu save singsing kwaet long wan singsing we i tokbaot Spirit, olsem “The Holy Ghost” (Children’s Songbook, 105). Maet yu wantem ademap sam noes we i distebem yu blong soemaot hao nao Setan i stap traem blong blokem yumi blong harem kwaet, smol voes ia. Maet ol memba blong famli oli save serem wanem oli stap mekem blong harem voes blong Spirit.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “The Holy Ghost,” Children’s Songbook, 105.

Stap Kam Antap long Stadi blong Yuwan

Raetemdaon ol filing mo tingting blong yu. Taem yu filim se Spirit i stap toktok long yu, tingting blong raetemdaon wanem yu filim we Hem i stap talem long yu. Tingting ia we i tekem yu blong putum ol tingting ia i go long ol toktok bae i save helpem yu blong tingting hevi mo holemtaet olgeta.

Wido blong Jarefat, i kam long Rose Datoc Dall