Elaeja I Faet agensem Ol Pris blong Bal, i kam long Jerry Harston

27 Jun–3 Julae

1 King 17–19

“Sapos Hae God I God, I Gud Yufala I Mekem Wosip long Hem”

Plante pikinini oli laekem tumas ol stori. Helpem ol pikinini blong poenemaot ol trutok long stori we oli faenem insaed long 1 King 17–19 we bae i mekem fet blong olgeta long Jisas i kam moa strong.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem long ol pikinini ol pikja long aotlaen blong wik ia insaed long Kam Folem Mi—Blong Wanwan Man Woman, mo Famli. Askem ol pikinini blong serem wanem oli save abaot ol stori we ol pikja ia oli soem. ?Wanem nao yumi lanem long ol stori ia?

Tijim Doktrin: Ol Smol Pikinini

1 King 17

Lod i blesem olgeta we oli gat fet.

1 King 17 i rekodem sam eksampol blong ol man we oli gat bigfala fet. Olsem wan risal blong gat bigfala fet, ol pijin ia, ol reven, oli fidim Elaeja long hadtaem blong kasem kaekae, ol kaekae oli kam dabol blong wan wido mo pikinini boe blong hem, mo Elaeja i mekem boe blong wido i girap bakegen long ded.

Samfala Aktiviti we Yu Save Mekem

• Soemaot ol pikja o ol samting we i go stret wetem stori insaed long 1 King 17, olsem ol pijin, bred, o wan boe. Talem ol stori ia long ol pikinini (“Profet Elaeja” insaed long Ol Stori long OlTesteman ) i save help, mo invaetem olgeta blong faenem pikja o samting we i go stret wetem stori. Toktok bigwan long saed ia se, Elaeja mo wido, tufala i bin gat fet long Jisas Kraes mo kasem ol bigfala blesing.

• Helpem ol pikinini blong tingting long ol wei we oli save soem se oli gat fet long Papa long Heven mo Jisas Kraes, we i minim se oli bilif long Tufala mo trastem Tufala. Singsing wetem olgeta wan singsing abaot fet olsem: “Mi Save Ridima I Laef” (STSP, pej 8).

1 King 19:11–12

Mi save jusum blong folem Jisas Kraes.

Elaeja i talem strong long ol pipol blong Isrel blong mekem wan desisen blong folem Jisas Kraes. Helpem ol pikinini blong oli luk se olgeta oli save mekem ol semmak joes olsem.

Samfala Aktiviti we Yu Save Mekem

• Eksplenem long ol pikinini se ol pipol long taem blong Elaeja oli no sua sapos oli folem Lod. Serem stori abaot olsem wanem Elaeja i bin invaetem olgeta blong jusum blong folem Lod; luk long stori ia long 1 King 18:17–39 (luk tu long Elaeja mo Ol Pris blong Bal” insaed long Ol Stori long OlTesteman). Talem long ol pikinini from wanem yu jusum blong folem Jisas Kraes, mo askem olgeta from wanem oli jusum blong folem Hem.

• Ridim long ol pikinini wanem we Elaeja i bin talem long ol pipol: “Sapos Hae God I God, I Gud Yufala I Mekem Wosip long Hem” (1 King 18:21). ?I minim wanem blong folem Jisas Kraes? Helpem ol pikinini blong tingting long ol wanwan samting we bae oli mekem blong folem Jisas Kraes, mo invaetem olgeta blong droem ol pikja blong olgetawan taem oli stap mekem ol samting ia.

  

  Yumi save jusum blong folem Jisas Kraes.

1 King 19:9–12

Tabu Spirit i toktok long mi long wan voes we i kwaet, i smol.

Gaedem ol yangfala pikinini blong luksave paoa blong Tabu Spirit long laef blong olgeta. Tingting hevi long olsem wanem yu save helpem olgeta.

Samfala Aktiviti we Yu Save Mekem

• Talem long wan sot stori we oli save faenem insaed long 1 King 19:9–12, mo ridim ol ves 11–12. Invaetem olgeta blong mekem ol aksen we oli ripresentem wan strong win, graon we i muvmuv, mo faea. Afta, invaetem olgeta blong sidaon kwaet mo no muvmuv taem yu stap ridim en blong ves 12 long wan kwaet voes: “biaen long faea ia, profet i harem we Hae God i stap tok smosmol long hem.” Askem olgeta blong traem stap toktok long wan kwaet smol voes. Talem long olgeta abaot ol taem we yu bin eksperiensem wanem we Tabu Spirit i stap talem long yu.

• Helpem ol pikinini blong luksave wetaem we oli bin save filim paoa blong Tabu Spirit. Eksampol, plei o singsing wan revren singsing abaot Jisas, mo askem wanem oli filim taem oli tingbaot Hem. Askem olgeta olsem wanem oli filim long ol narafala revren aktiviti olsem, blong stap prea wetem famli blong olgeta, o blong stap tekem mo kakae sakramen. Eksplenem se ol filing ia oli kam tru long Tabu Spirit. Talem long ol pikinini olsem wanem paoa blong Tabu Spirit i bin blesem laef blong yu.

Stap Tijim Doktrin: Ol Bigfala Pikinini

1 King 17:8–16

Taem we Lod i askem mi blong mekem sakrifaes, mi save obei tru long fet.

Wido ia blong Jarefat i bin trastem Lod o profet blong Hem, iven hem i askem hem blong mekem wan bigfala sakrifaes. Stori ia i save helpem ol pikinini long taem we Lod i askem olgeta blong mekem ol sakrifaes.

Samfala Aktiviti we Yu Save Mekem

• Ridim long ol pikinini 1 King 17:8–16. Invaetem olgeta blong aktem stori taem yu stap ridim wan seken taem. Stop wanwan taem mo askem olgeta wanem oli filim sapos olgeta i bin Elaeja o wido ia. Invaetem olgeta blong serem wanem we oli lanem aot long stori ia.

• Invaetem wan pikinini blong droem long bod wan pikja blong wanem we Lod i bin askem wido blong givim long Elaeja (luk long 1 King 17:12–13). Invaetem wan narafala pikinini blong droem wanem we wido i kasembak long long Elaeja (luk long 1 King 17:15–16). ?Wanem nao samfala samting we Lod i askem yumi blong mekem sakrifaes from? Askem ol pikinini blong serem wanem oli bin kasem blesing from taem oli stap mekem ol sakrifaes.

1 King 18:17–39

Mi save jusum blong folem Jisas Kraes.

Ol laen blong Isrel oli no save mekem desisen abaot blong stap folem Lod. Tingting hevi long olsem wanem yu save givim insperesen long ol pikinini blong stap komitim olgeta long fasin blong stap wan disaepol.

Samfala Aktiviti we Yu Save Mekem

• Givim wok long wanwan pikinini blong ridim sam ves aot long 1 King 18:17–39 mo droem wan pikja blong wanem ves blong tokbaot. Helpem ol pikinini andastanem ol ves ia sapos i nid. Afta letem olgeta oli yusum ol pikja blong talem stori. ?Wanem nao stori ia i tijim yumi abaot Lod?

• Askem ol pikinini blong tokbaot ol taem we oli mas mekem desisen bitwin tu (2) samting. ?Wanem nao i helpem olgeta blong oli mekem desisen? Helpem ol pikinini blong tingting long ol situesen olsem taem we maet oli nidim blong disaed blong folem, o blong no folem Jisas Kraes. ?Wanem ol trutok aot long stori insaed long 1 King 18:17–39 i save helpem olgeta blong disaed?

1 King 19:9–12

Tabu Spirit i toktok long mi long wan voes we i kwaet, i smol.

Wol ia i gat fulap noes we i stap pulum tingting blong man we i mekem i had blong harem voes blong Tabu Spirit we i kwaet, i smol. ?Olsem wanem bae yu helpem ol pikinini blong harem voes ia blong Tabu Spirit?

Samfala Aktiviti we Yu Save Mekem

• Askem ol pikinini blong lisin gud taem yu stap ridim 1 King 19:11–12 long olgeta wetem fasin blong toktok kwaet. Invaetem olgeta blong luklukgud insaed long 1 King 19 blong faenem ol ves we yu ridim mo laenem wanem we Elaeja i stap mekem. Tokabaot wanem oli mas mekem blong harem wanem we yu stap talem, mo helpem olgeta blong komperem hemia wetem wanem yumi mas mekem blong harem “kwaet voes we i smol” blong Spirit. Letem ol pikinini blong gat wanwan janis blong stap ridim long wan kwaet fasin ol narafala ves aot long 1 King 19 mo semtaem ol narafala pikinini oli faenem ol ves ia insaed long ol skripja.

• Serem wetem ol pikinini sam narafala skripja we oli ademap we i tokbaot olsem wanem Spirit i stap toktok wetem yumi luk long Gaed long Ol Skripja, “Insperesen, Givim Tingting,” olskripja.ChurchofJesusChrist.org). Askem ol pikinini blong tokbaot ol taem we oli filim se Tabu Spirit i stap gaedem olgeta o i stap testifae long olgeta. ?Wanem nao oli stap mekem? ?Wanem nao i stap pulumaot tingting blong yumi blong stap luksave Spirit? Ridim tugeta Moronae 4:3, mo leftemap tingting blong ol pikinini blong jusum wan samting we bae oli mekem se oli save “oltaem gat Spirit blong hem i stap wetem olgeta.”

Stap Leftemap Tingting blong Lanem Samting long Hom

Invaetem ol pikinini blong tingting long wan samting we oli laekem blong mekem from wanem we oli bin lanem tedei. Eksampol: oli save putum wan gol long saed blong spirit, blong waes tingting, blong bodi o sosol laef blong kam moa olsem Jisas Kraes.

Stap Kam Antap long Fasin blong Yumi blong Stap Tij

Helpem ol pikinini blong luksave Spirit. “Wan long ol moa impoten samting yu save mekem olsem wan tija i blong helpem olgeta we yu tijim blong oli luksave paoa blong Tabu Spirit. … Helpem [ol pikinini] blong joenem ol filing blong olgeta long saed blong spirit wetem paoa blong Tabu Spirit.” (Teaching in the Savior’s Way, 11.)