“20–26 Jun. 2 Samuel 5–7; 11–12; 1 King 3; 8; 11: ‘Kingdom blong Yu I Stap Oltaem, Gogo I No Save Finis,’” Kam Folem Mi—Blong Praemeri: OlTesteman 2022 (2021)
“20–26 Jun. 2 Samuel 5–7; 11–12; 1 King 3; 8; 11,” Kam Folem Mi—Blong Praemeri: OlTesteman 2022
King Deved I Sidaon long King blong Jea, i kam long Jerry Miles Harston
20–26 Jun
2 Samuel 5–7; 11–12; 1 King 3; 8; 11
“Kingdom blong Yu I Stap Oltaem, Gogo I No Save Finis”
Taem yu stap ridim ol skripja, Tabu Spirit i save givim long yu ol filing, mo insperesen long yu blong save wanem ol samting we oli gat moa mining blong yu tijim long ol pikinini.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Askem sam long ol pikinini blong tokbaot ol eksperiens blong olgeta taem oli stap ridim ol skripja (olgetawan, wetem ol famli blong olgeta, o long jos). ?Wetaem mo weaples nao oli stap ridim ol skripja blong olgeta? ?Olsem wanem nao oli filim taem oli stap ridim skripja? ?Wanem ol blesing we oli stap kasem taem oli stap obei long komanmen ia?
Tijim Doktrin: Ol Smol Pikinini
Sapos mi nidim wan blong gaedem mi, mi save askem Papa long Heven.
Ol ves ia i tokbaot olsem wanem Deved i bin prea from help mo daereksen olsem king blong Isrel. ?Olsem wanem nao yu save leftemap tingting blong ol pikinini blong lukluk long God tru long prea taem oli stap long nid?
Samfala Aktiviti we Yu Save Mekem
-
Eksplenem long ol pikinini se, taem Deved i nidim help, hem i bin “askem,” o bin prea blong kasem ansa. Taem yu stap ridim 2 Samuel 5:19, 23, invaetem ol pikinini blong lisin long toktok ia “askem” mo blong oli foldem han blong olgeta taem oli harem toktok ia. Testifae se, oltaem, yumi save prea long Papa long Heven taem yumi nidim help.
-
Blong helpem ol pikinini abaot wanem maet oli talem taem oli prea, yu save askem olgeta olsem wanem bae oli save finisim ol sentens olsem hemia: “Mifala i talem tangkyu from …” mo “Mifala i askem Yu blong …” Askem ol pikinini blong droem ol pikja blong ol samting we maet bae oli talem tangkyu from o askem long wan prea.
Pikjagel i stap preaYumi save prea long Papa long Heven blong helpem mo gaedem yumi.
-
Talem long ol pikinini abaot wan taem we yu bin prea from help long Papa long Heven. ?Olsem wanem nao Hem i bin ansarem prea blong yu? ?Wanem i mekem se i defren blong gat Hem i helpem yu? Invaetem ol pikinini blong serem ol eksperiens blong olgeta.
Jisas Kraes i King blong yumi.
Taem Deved i bin king blong Isrel, Lod i bin talem long hem se “kingdom blong yu i stap oltaem, gogo i no save finis” (2 Samuel 7:16). Promes ia, i tokbaot Jisas Kraes, King blong yumi we i No Save Finis, we i bin bon tru long laen blong Deved.
Samfala Aktiviti we Yu Save Mekem
-
Askem wan long ol pikinini blong mekem olsem se hem i wan king o kwin. Sapos i posibol givim long pikinini ia wan pikja blong fes blong king o kwin blong hem i holem. ?Wanem i wan kwin o king? ?Wanem nao oli stap mekem? Talem long ol pikinini se Deved i bin wan king, mo hem i wan laen blong Jisas Kraes we yumi singaotem “King blong olgeta king” (Revelesen 19:16). Helpem ol pikinini blong tingting long ol wei we yumi save soem se yumi bilif se Jisas Kraes i King blong yumi we I No Save Finis.
-
Taem ol pikinini oli komplitim aktiviti pej blong wik ia, singsing o plei wan singsing we oli rekodem we i tokbaot Kraes olsem King blong yumi, olsem “He Died That We Might Live Again,” “Called to Serve,” “Rejoice, the Lord Is King!” o “I Believe in Christ” (Children’s Songbook, 65, 174–75; Hymns, ol namba 66, 134). Askem ol pikinini blong lisin long toktok ia “King” mo leftemap wan pikja blong Jisas taem oli harem. ?Yumi filim olsem wanem taem yumi singsing abaot Jisas?
Mi save wokbaot long ol wei blong God.
Long Ol Man Isrel, blong stap bildim mo dediketem tempol, i bin wan spesel janis, blong tanem hat blong olgeta i go long Lod mo komitim olgeta bakegen blong “wokbaot long ol wei blong blong hem” (1 King 8:58). ?Olsem wanem nao yu save helpem ol pikinini we yu stap tijim blong “wokbaot long ol wei blong hem”?
Samfala Aktiviti we Yu Save Mekem
-
Soem long ol pikinini wan pikja blong wan tempol blong taem blong yumi tedei mo tempol we Solomon i bin bildimap (luk long aotlaen blong wik ia insaed long Kam Folem Mi—Blong Wanwan Man, Woman mo Famli). Eksplenem se taem Solomon i bildim tempol blong ol laen blong Isrel, hem i leftemap tingting blong olgeta blong “oltaem nomo oli save stap long laef ia we hem (Lod) i wantem blong oli stap long hem” (1 King 8:58). Talem long ol pikinini olsem wanem tempol i helpem yu blong wokbaot long ol wei blong Lod. Invaetem ol pikinini blong serem olsem wanem nao oli stap filim abaot tempol. Singsing wetem ol pikinini wan singsing abaot tempol, olsem hemia “I Love to See the Temple” (Children’s Songbook, 95).
-
Givim long sam pikinini ol pepa hat mo long ol narafala ol pepa we fut step oli stap long hem. Ridim 1 King 8:58, mo askem ol pikinini blong leftemap ol hat taem yu talem toktok ia “hat” mo ol fut step taem yu talem toktok ia “wokbaot long ol wei blong hem.” Helpem ol pikinini blong andastanem se, yumi wokbaot long ol wei blong Lod taem yumi folem Jisas mo traem blong kam olsem Hem. Askem ol pikinini wanem oli save mekem blong wokbaot long ol wei blong Lod. Yu save singsing long wan singsing abaot stap folem Jisas olsem: “Mi Traem blong Kam Olsem Jisas” (Liahona, Epril 2012, 64).
Stap Tijim Doktrin: Ol Bigfala Pikinini
Jisas Kraes i King blong yumi.
Ol king we yumi stap rid abaot long OlTesteman oli gat ol samting we oli no strong long hem mo ol mistek—iven ol gudfalawan. Be King ia we oli profesae se bae i kamaot long laen blong Deved, Jisas Kraes, i stret evriwan, mo bae i rul blong oltaem.
Samfala Aktiviti we Yu Save Mekem
-
Invaetem ol pikinini blong ridim wanem we profet Netan i bin talem long King Deved insaed long 2 Samuel 7:16–17, mo askem olgeta blong talem se profesi ia i minim wanem long blong olgeta. ?Olsem wanem nao kingdom blong Deved i no gat en? Helpem ol pikinini blong faenem mo ridim ol pat blong skripja we oli tijim se Jisas Kraes i wan laen blong Deved, Hem i wan King, olsem long Luk 1:32–33; Jon 18:33–37; mo Revelesen 19:16. ?Olsem wanem nao Jisas Kraes i olsem wan King? ?Wanem nao samfala wei we yumi save soem se Jisas Kraes i King blong yumi we i no gat en?
-
Singsing wetem ol pikinini samfala hym we i stap talem se Kraes Hem i King blong yumi olsem: “Come, O Thou King of Kings,” “Rejoice, the Lord Is King!” o “Jesus, Once of Humble Birth” (Hymns, ol namba 59, 66, 196). ?Wanem nao ol hym ia oli stap tij abaot mining blong gat Jisas Kraes olsem King blong yumi?
Mi save winim temtesen.
Ol pikinini we yu stap tijim oli mekem smol be ol impoten desisen evri dei. ?Olsem wanem nao yu save helpem olgeta blong andastanem se i impoten blong stap jusum wanem i raet iven taem we i had?
Samfala Aktiviti we Yu Save Mekem
-
Luklukbak long 2 Samuel 11 wetem ol pikinini mo stap poenemaot ol joes we Deved i bin mekem. Askem ol pikinini se wanem nao ol gudfala joes we Deved i sapos blong mekem. ?Wanem sam samting we yumi save mekem taem yumi kasem temtesen we i save mekem yumi jusum raet?
-
Blong serem wan eksampol blong wan we i no olsem Deved, we i stap longwe long temtesen, askem ol pikinini sapos oli tingbaot stori blong Josef mo waef blong Potifa (luk long Jenesis 39:7–12). Yu save luklukbak long stori ia wetem ol pikinini mo helpem olgeta blong komperem wetem stori blong Deved. ?Wanem nao yumi save lanem long ol stori blong Deved mo Josef abaot olsem wanem blong stap longwe long temtesen?
Stap Leftemap Tingting blong Lanem Samting long Hom
Helpem ol pikinini blong oli tingbaot wan samting we oli save mekem blong praktisim wanem oli bin laenem. Afta, leftemap tingting blong olgeta blong tekem aksen folem ol plan blong olgeta.
Stap Kam Antap long Fasin blong Yumi Blong Stap Tij
Folemap ol invitesen blong tekem aksen. Taem yu invaetem ol pikinini blong tekem aksen folem wanem we oli stap lanem, folemap invitesen ia long nekis klas. Hemia i soem long ol pikinini se yu kea long olsem wanem gospel i stap blesem laef blong olgeta. Taem oli stap serem ol eksperiens blong olgeta, bae oli kam moa strong mo bae i helpem olgeta wanwan blong laef folem gospel.